តួកគី ថា តុលាការឧក្រិដ្ឋកម្មអន្តរជាតិ ICC គួរតែកាត់ទោស អ៊ីស្រាអែល

ប្រធានាធិបតីតួកគីលោក Recep Tayyip Erdogan កាលពីថ្ងៃសៅរ៍បានរិះគន់ប្រទេសអ៊ីស្រាអែលជាថ្មីម្តងទៀតចំពោះសកម្មភាពរបស់ពួកគេនៅក្នុងតំបន់ហ្គាហ្សា ហើយថែមទាំងមាន “ព័ស្តុតាងគ្រប់គ្រាន់” ដើម្បីឲ្យរដ្ឋាភិបាលអ៊ីស្រាអែលទទួលខុសត្រូវនៅតុលាការឧក្រិដ្ឋកម្មអន្តរជាតិ (ICC) ។

លោក Erdogan បាននិយាយ ក្រោយវិលត្រឡប់មកពីដំណើរទស្សនកិច្ចរយៈពេល ១ ថ្ងៃទៅកាន់អាល្លឺម៉ង់ថា “មានព័ស្តុតាងគ្រប់គ្រាន់សម្រាប់រដ្ឋបាលអ៊ីស្រាអែល គួរត្រូវបានកាត់ទោសនៅតុលាការឧក្រិដ្ឋកម្មអន្តរជាតិ (ICC) ។ យើងនឹងធ្វើអ្វីគ្រប់យ៉ាងនៅក្នុងអំណាចរបស់យើង ដើម្បីធានាថា ឧក្រិដ្ឋកម្មទាំងនេះត្រូវបានផ្តន្ទាទោសដោយមិនលំអៀង” ។

លោកប្រធានាធីបតីបានលើកឡើងថា “តួកគីនឹងឈរនៅក្បែរអ្នកដែលត្រូវគេជិះជាន់នៅតំបន់ហ្គាហ្សា ហើយនឹងបន្តធ្វើដូច្នេះបន្ថែមទៀតផងដែរ ។ អ៊ីស្រាអែលកំពុងព្យាយាមរារាំងជំនួយដូចជា អាហារ និងទឹកមិនឲ្យទៅដល់តំបន់ហ្គាហ្សា ប៉ុន្តែយើងមិនបោះបង់ចោលផែនការជួយសង្គ្រោះមនុស្សឡើយ ។ ទោះជាមានឧបសគ្គយ៉ាងណាក៏ដោយ យើងនឹងបន្តរក្សាតំបន់ហ្គាហ្សាឲ្យនៅគង់វង្ស ហើយស្នើដល់ពិភពលោកទាំងមូល ជាពិសេសប្រទេសឥស្លាម គួរតែបង្កើនការផ្តល់ជំនួយ” ។

រហូតមកដល់ពេលនេះ អ៊ីស្រាអែលនៅតែបន្តធ្វើការវាយប្រហារទាំងតាមផ្លូវអាកាស និងផ្លូវគោកដោយមិនប្រណីដៃលើតំបន់ហ្គាហ្សាស្ទ្រីប រួមទាំងមន្ទីរពេទ្យ កន្លែងស្នាក់នៅ និងវិហារឥស្លាមផងដែរ ចាប់តាំងពីក្រុមហាម៉ាសប៉ាឡេស្ទីនបើកការរវាយប្រហារឆ្លងព្រំដែនកាលពីថ្ងៃទី៧ ខែតុលា និងបានចាប់ចំណាប់ខ្មាំងប្រហែល ២៤០ នាក់ ។

យោងតាមក្រសួងសុខាភិបាលនៅតំបន់ហ្គាហ្សាបានឲ្យដឹងថា ចាប់តាំងពីពេលនោះមក ជនស៊ីវិលលើស ១២,០០០ នាក់ត្រូវបានសម្លាប់ រួមទាំងកុមារ និងស្ត្រីជាង ៨,៣០០ នាក់ ខណៈខាងអ៊ីស្រាអែលវិញមានមនុស្សជិត ១,២០០ នាក់បានបាត់បង់ជីវិត ។

ក្រៅ​ពី​ចំនួន​អ្នក​ស្លាប់ដ៏ច្រើនសន្ធឹកសន្ធាប់នេះ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការវាយប្រហារសងសឹករបស់អ៊ីស្រាអែលលើតំបន់ហ្គាហ្សា ក៏បានបណ្ដាលឲ្យមនុស្សជាង ៣០,០០០ នាក់ រងរបួសផងដែរ ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ គ្រាប់ផ្លោងជាច្រើនបាញ់រះចេញពី លីបង់ ហោះទៅកាន់ អ៊ីស្រាអែល