ព័ត៌មានអន្ដរជាតិ

ស្រ្តីពីរនាក់បងប្អូននៅអាមេរិក វិះនឹងស្លាប់ដោយសារតែប្រើសំឡីអនាម័យមួយប្រភេទ

បានផុស

៣ years មុន

នៅ

ថ្ងៃអង្គារ ២១ វិច្ឆិកា ២០២៣

ដោយ

បងស្រីទើបតែចេញពីបន្ទប់ ICU បន្ទាប់ពីពុលសារធាតុម្យ៉ាងនៅក្នុងសំឡីអនាម័យ tampon ពេលនោះប្អូនស្រីអាយុ ១៧ឆ្នាំ បានធ្លាក់ក្នុងស្ថានភាពគ្រោះថ្នាក់ដល់អាយុជីវិត ដោយសារតែសំឡីប្រភេទនេះម្ដងទៀត។

លោក Javon Johnson អាយុ ៤៦ ឆ្នាំ រស់នៅក្នុងទីក្រុង Elkhart រដ្ឋ Indiana សហរដ្ឋអាមេរិក ចែករំលែកជាមួយប្រព័ន្ធផ្សព្វផ្សាយថា “និយាយដោយស្មោះ យើងគិតថា យើងនឹងបាត់បង់កូនរបស់យើង”។

ទន្ទឹមនោះដែរ ស្រ្តីជាម្ដាយដែលមានកូនចំនួន ៦ នាក់បាននិយាយថា កូនស្រីអាយុ ២១ឆ្នាំរបស់នាងឈ្មោះ Devine បានធ្លាក់ខ្លួនឈឺក្នុងខែឧសភា ឆ្នាំ ២០២២ បន្ទាប់ពីបានប្រើសំឡីអនាម័យដែលមានឈ្មោះថា tampons ។ សំឡីមួយប្រភេទនេះមានរាងជាបំពង់ដែលអាចស្រូបបានយ៉ាងល្អសម្រាប់ស្រីៗពេលមករដូវ។ Devine ទើបតែបានបញ្ចប់រដូវនៅពេលដែលនាងមានរោគសញ្ញាដូចជាផ្តាសាយ ហើយមិនអាចដើរបានដោយគ្មានជំនួយ។ នាងត្រូវស្នាក់នៅក្នុងបន្ទប់សង្គ្រោះបន្ទាន់រយៈពេលមួយសប្តាហ៍។

ក្រោយមក នៅខែកក្កដាឆ្នាំ ២០២២ កូនស្រីទី ២ ឈ្មោះថា Jaya អាយុ ១៧ ឆ្នាំ ក៏ធ្លាប់មានរោគសញ្ញាស្រដៀងគ្នានេះដែរ ខណៈដែលគ្រួសារទាំងមូលកំពុងវិស្សមកាលនៅរដ្ឋផ្លរីដា។

លោក Johnson ជាឪពុកបានពន្យល់ថា “Jaya ទើបតែប្រើសំឡី tampon ជាលើកដំបូងកាលពីពីរថ្ងៃមុន ។ យើងនៅ Florida ក្នុងវិស្សមកាលគ្រួសារ ហើយ Jaya គ្រាន់តែចង់ប្រើវាដើម្បីហែលទឹក”។

ដំបូងឡើយ ម្តាយគិតថា កូនស្រីរបស់គាត់ កើតជំងឺគ្រុនក្តៅ ដោយសារគាត់ឃើញបាតដៃរបស់ Jaya ប្រែជាក្រហម ប៉ុន្តែស្ថានភាពរបស់នាងកាន់តែអាក្រក់ទៅៗ ក្រោយមកដោយក្អួត និងក្តៅខ្លួនខ្លាំង។ Jaya ត្រូវបានគេយកទៅបន្ទប់សង្គ្រោះបន្ទាន់ គ្រូពេទ្យបានចេញវេជ្ជបញ្ជាថ្នាំ Ibuprofen ហើយបញ្ជូននាងទៅផ្ទះ។ ភ្លាមៗ Jaya ក៏បាត់បង់ស្មារតី ទើបក្រុមគ្រួសាររបស់នាង ហៅរថយន្តសង្គ្រោះមកដឹកនាងត្រឡប់ទៅមន្ទីរពេទ្យវិញ។

ស្រ្តីជាម្តាយបាននិយាយថា “យើងមិនអាចជឿថារឿងនេះពិតជាកើតឡើងចំពោះគ្រួសារយើងម្តងទៀតទេ”។ Jaya ត្រូវបានគេធ្វើរោគវិនិច្ឆយថាមានជំងឺ sepsis ដោយសារមានរោគសញ្ញាពុលដូចនឹង Devine ដែរ។

យោងទៅតាមគ្លីនិក Cleveland ក៏បញ្ចាក់ដែរថា រោគសញ្ញានៃការឆក់ពុលដែលជារឿយៗត្រូវបានផ្សារភ្ជាប់ជាមួយនឹងការប្រើប្រាស់ tampon គឺជាលក្ខខណ្ឌបាក់តេរីដែលប៉ះពាល់ដល់មនុស្ស ១ នាក់ក្នុងចំណោម ១០០,០០០ វាអាចបណ្តាលឲ្យខូចសរីរាង្គធ្ងន់ធ្ងរ ឬស្លាប់តែម្ដង។

ស្រ្តីជាម្តាយបានបន្ថែមថា គ្រូពេទ្យបាននិយាយថា ការឆ្លងមេរោគរបស់ Devine និង Jaya គឺបណ្តាលមកពី សារធាតុគីមីដែលមានថាមពលខ្ពស់នៅក្នុងកន្សែងអនាម័យដែលស្រូបយកខ្លាំង។ សំឡីអនាម័យដែលក្មេងស្រីទាំងពីរបានប្រើគឺសុទ្ធតែនៅក្នុងប្រអប់តែមួយ។

ទោះយ៉ាងណាក៏ដោយ កូនស្រីទាំងពីររបស់លោក Javon Johnson ទាំងពីរនាក់បានជាសះស្បើយហើយ។ ក្រោយពីមានហេតុការណ៍នេះមក ផ្ទះរបស់ពួកគេលែងឲ្យកូនៗប្រើសំឡីប្រភេទនេះទៀត ហើយថែមទាំងព្រមានស្រីៗដែលនិយមប្រើ ព្រោះវាមិនមានសុវត្ថិភាពដល់សុខភាពនោះទេ៕