ក្រុមហ៊ុនអចលនទ្រព្យធំៗ ២ របស់ ចិន កើនភាគហ៊ុនវិញ ក្រោយរដ្ឋាភិបាល​បន្ថែមការគាំទ្រផ្នែកហិរញ្ញវត្ថុ

ក្រុមហ៊ុនអភិវឌ្ឍន៍អចលនទ្រព្យធំៗរបស់ចិនដែលកំពុងជំពាក់បំណុលរាប់ពាន់លានដុល្លារ រួមមាន Country Garden បានកើនភាគហ៊ុន ១៧ ភាគរយ ខណៈក្រុមហ៊ុន China Evergrande កើនឡើង ៦ ភាគរយ បន្ទាប់ពី​មានការគាំទ្រផ្នែកហិរញ្ញវត្ថុបន្ថែម ។

យោងតាមការចុះផ្សាយពីសារព័ត៌មាន Bloomberg បានឲ្យដឹងថា ក្រុមហ៊ុនជាប់បំណុលធំទាំងពីរ ត្រូវបានចុះក្នុងបញ្ជីព្រៀងនៃអ្ន​កអភិវឌ្ឍន៍​ក្នុងចំណោម ៥០ ដែលមានសិទ្ធិទទួលបានការគាំទ្របន្ថែមផ្នែកហិរញ្ញវត្ថុពីសំណាក់​រដ្ឋាភិបាល ។

ក្រៅពីក្រុមហ៊ុនធំៗទាំងពីរ នៅមានក្រុមហ៊ុនអចលនទ្រព្យផ្សេងៗទៀតដូចជា ក្រុមហ៊ុន Sino-Ocean Group បានកើនឡើង ៣០ ភាគរយក្នុងទីផ្សារហុងកុង ហើយ Kaisa Group កើនឡើងជាង ៧ ភាគរយ ។

ក្រុមហ៊ុន Country Garden ដែលជាអ្នក​អភិវឌ្ឍន៍ដ៏ធំមួយ​នៅក្នុងប្រទេសចិន ត្រូវបានគេដឹងថា ជាប់បំណុលជាង ១៩១ ពាន់លានដុល្លារក្នុងខែមិថុនា ចំណែកឯ Evergrande មានបំណុលច្រើនជាង ៣០០ ពាន់លានដុល្លារ ។

គួរបញ្ជាក់ថា វិស័យអចលនទ្រព្យ រួមចំណែក​​ ១ ភាគ ៤ ​នៃសេដ្ឋកិច្ចចិន ស្របពេលដែលបច្ចុប្បន្ន ចិនកំពុងដាក់ចេញផែនការដើម្បីជំរុញអចលនទ្រព្យ​ឲ្យមានសន្ទុះឡើងវិញផងដែរ ​៕

ប្រែសម្រួល៖ នាង រតនៈ

ប្រភព៖ CNA