ផ្ទុះអំពើហិង្សាក្នុងបាតុកម្មនៅមីយ៉ាន់ម៉ា ប៉ូលិសបាញ់គ្រាប់ពិតលើបាតុករ

អំពើហិង្សាបានផ្ទុះឡើងនៅថ្ងៃទី៤ នៃការតវ៉ាប្រឆាំងនឹងរបបយោធាក្នុងប្រទេសមីយ៉ាន់ម៉ា។ កាលពីថ្ងៃទី៩ខែកុម្ភៈ ប៉ូលិសបានចាប់ផ្តើមបំបែកក្រុមបាតុករនៅទីក្រុង ណៃពិដោ ដោយប្រើទាំងគ្រាប់កាំភ្លើងជ័រនិងគ្រាប់ពិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ត្រីម្នាក់ត្រូវបានគេបាញ់ចំក្បាលអំឡុងការតវ៉ា ហើយពេលនេះនាងកំពុងស្ថិតក្នុងសភាពធ្ងន់ធ្ងរនៅមន្ទីរពេទ្យ។

គ្រូពេទ្យម្នាក់បាននិយាយក្នុងលក្ខខណ្ឌមិនបញ្ចេញឈ្មោះថា “អ្នកជំងឺនៅតែដកដង្ហើមយឺតៗដោយមានជំនួយពីឧបករណ៍ដកដង្ហើម”។

ការបាញ់ដោយប៉ូលិសក្នុងហេតុការណ៍នេះ បានបណ្តាលឲ្យមនុស្សយ៉ាងហោចណាស់ប្រាំពីរនាក់រងរបួសខណៈម្នាក់ក្នុងចំណោមពួកគេ ត្រូវបានបាញ់ចំទ្រូងដោយគ្រាប់កាំភ្លើងពិត។ គាត់ត្រូវបានបញ្ជូនទៅកាន់មន្ទីរពេទ្យក្រុង ណៃពិដោ។

គ្រូពេទ្យបាននិយាយថា “គ្រាប់កាំភ្លើងបានចូលក្នុងខ្លួនរបស់គាត់ ប៉ុន្តែស្ថានភាពរបស់គាត់មិនមានគ្រោះថ្នាក់ដល់អាយុជីវិតទេ។ មន្ទីរពេទ្យត្រូវបានបិទដោយសារតែចលនាមិនគោរពតាមបញ្ជារបស់ជនស៊ីវិល ប៉ុន្តែក្រុមគ្រូពេទ្យខាងក្រៅកំពុងផ្តល់ការព្យាបាលដល់អ្នកជំងឺនៅពេលនេះ”៕

ប្រែសម្រួលដោយ៖ Vann Vann

ប្រភព៖ Myanmar Times