អ៊ីតាលី សម្រេចដើរចេញពីគម្រោង “ខ្សែក្រវាត់ និងផ្លូវ” របស់ ចិន

បើយោងតាមសារព័ត៌មាន Bloomberg បានចុះផ្សាយថា ប្រទេស​អ៊ីតាលី​សម្រេច​ចាកចេញពីគំនិត​ផ្តូចផ្តើម “ខ្សែក្រវាត់ និង​ផ្លូវ” ដែលជាគម្រោងដ៏ធំបំផុតរបស់ចិន ក្រោមហេតុផល មិនទទួលបានផលប្រយោជន៍ដែលអ៊ីតាលីចង់បាននោះឡើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈឧបនាយករដ្ឋមន្ត្រី និងរដ្ឋមន្ត្រីការបរទេសរបស់អ៊ីតាលី លោក Antonio Tajani បាននិយាយថា កិច្ចព្រមព្រៀងហេដ្ឋារចនាសម្ព័ន្ធ និងការវិនិយោគសកលដែលដឹកនាំដោយប្រទេសចិន គឺលែងជាអាទិភាពសម្រាប់អ៊ីតាលីទៀតហើយ ស្របពេលប្រទេស​ដែលមិនចូលរួមក្នុងគម្រោងនេះ ក៏មាន​លទ្ធផល​ល្អ​ប្រសើរ​ជាង​មុនដែរ ។

មុនសម្រេចចាកចេញនេះដែរ មន្ត្រីកំពូលរបស់អ៊ីតាលី រួមទាំងនាយករដ្ឋមន្ត្រីអ៊ីតាលី លោកស្រី Giorgia Meloni ក៏បានលើកយកគំនិតនេះ​ មកពិភាក្សាគ្នាអស់រយៈពេលជាច្រើនខែផងដែរ ។

ចំពោះអ៊ីតាលី បានចុះហត្ថលេខាចូលរួមជាមួយចិនក្នុងគំនិត​ផ្តូចផ្តើម “ខ្សែក្រវាត់ និង​ផ្លូវ” នៅឆ្នាំ ២០១៩ ហើយក៏ជាប្រទេសលោកខាងលិចដំបូងគេផងដែរដែលបានចាកចេញពីគម្រោងនេះទៅវិញ ។

នៅក្រោមគំនិតផ្តួចផ្តើមខ្សែក្រវាត់ និងផ្លូវ នេះធ្វើឲ្យរបាំងពាណិជ្ជកម្មរវាងចិន និងអ៊ីតាលីត្រូវបានកាត់បន្ថយ ខណៈដែលទីក្រុងប៉េកាំងបានសន្យាថា នឹងវិនិយោគលើកំពង់ផែ និងហេដ្ឋារចនាសម្ព័ន្ធផ្លូវដែករបស់អ៊ីតាលី ។

ទន្ទឹមនោះ ការប្រកាសរបស់ទីក្រុងរ៉ូមកើតមានឡើង នៅពេលដែលប្រទេសអ៊ីតាលី ក៏ដូចជាបណ្តាប្រទេស EU ជាច្រើនផ្សេងទៀត កំពុងតស៊ូដើម្បីធ្វើឲ្យមានតុល្យភាពរវាងការចង់ចូលរួមជាមួយប្រទេសចិនលើផ្នែកពាណិជ្ជកម្ម និងការវិនិយោគ​ ខណៈដៃម្ខាងទៀត រក្សាទំនាក់ទំនងជាមួយទីក្រុងវ៉ាស៊ីនតោន ។

គួរឲ្យដឹងថា គំនិតផ្តួចផ្តើមហេដ្ឋារចនាសម្ព័ន្ធ និងពាណិជ្ជកម្មពិភពលោក (BRI) របស់ចិន ត្រូវបានរៀបចំឡើងដើម្បីជំរុញទំនាក់ទំនងសេដ្ឋកិច្ច និងពង្រីកឥទ្ធិពលនៃប្រទេសដែលមានសេដ្ឋកិច្ចធំទី ២ របស់ពិភពលោកមួយនេះ ខណៈវាបានទាក់ទាញការវិនិយោគប្រមាណ ១ ពាន់ពាន់លានដុល្លារ ចាប់តាំងពីត្រូវបានបង្កើតឡើងក្នុងឆ្នាំ ២០១៣ ៕

ប្រែសម្រួល៖ នាង រតនៈ

ប្រភព៖​ RT

ចុចអាន៖​ ថៃ រំពឹងទទួលបានទេសចរបរទេស ២ លាននាក់ទៀតនៅខែធ្នូនេះ