ជប៉ុន ប្ដេជ្ញាដឹកនាំ អាស៊ី ឆ្ពោះទៅរកអព្យាក្រឹតភាពកាបូន

នាយករដ្ឋមន្ត្រីជប៉ុនលោក Kishida Fumio នៅថ្ងៃចន្ទនេះបានប្ដេជ្ញានឹងដឹកនាំកិច្ចខិតខំប្រឹងប្រែងដើម្បីសម្រេចបាននូវអព្យាក្រឹតភាពកាបូននៅក្នុងទ្វីបអាស៊ី ដោយប្រើប្រាស់ជំនាញបច្ចេកវិទ្យា និងកម្លាំងផ្សេងៗទៀតចេញពីប្រទេសរបស់លោក ។

លោក Kishida បានសម្តែងការប្តេជ្ញាចិត្តរបស់លោកនៅក្នុងកិច្ចប្រជុំសហគមន៍បំភាយឧស្ម័នសូន្យអាស៊ី (AZEC) ដែលមានការចូលរួមពីសំណាក់មេដឹកនាំប្រទេសជប៉ុន និងសមាជិកនៃសមាគមប្រជាជាតិអាស៊ីអាគ្នេយ៍ នៅឯការិយាល័យនាយករដ្ឋមន្ត្រីក្នុងទីក្រុងតូក្យូ ។

លោក Kishida បានលើកឡើងថា ការកាត់បន្ថយការបញ្ចេញកាបូន គឺជាបញ្ហាប្រឈមទូទៅសម្រាប់អាស៊ី ហើយការធ្វើនវានុវត្តន៍នឹងក្លាយជាគន្លឹះសំខាន់ក្នុងការសម្រេចបានលើបញ្ហានេះ ។ លោកនាយករដ្ឋមន្ត្រីបានសង្កត់ធ្ងន់ទៀតថា ការបង្កើតសហគមន៍បំភាយឧស្ម័នសូន្យអាស៊ី (AZEC) នឹងនាំទៅរកការបង្កើតថ្មី ក៏ដូចជាទីផ្សារកាត់បន្ថយការបញ្ចេញកាបូនទ្រង់ទ្រាយធំ ដែលនឹងទាក់ទាញការវិនិយោគពីទូទាំងពិភពលោកមកកាន់អាស៊ី ហើយ​ជប៉ុន​នឹងដឹកនាំ​ក្នុង​ការ​ជំរុញ​ការ​អភិវឌ្ឍ​បច្ចេកវិទ្យា និង​ធ្វើ​ឲ្យ​ប្រសើរ​ឡើង​នូវ​ប្រព័ន្ធ​ច្បាប់ផងដែរ ។

ទន្ទឹមនោះ មេដឹកនាំជប៉ុន-អាស៊ានបានយល់ស្របថា វិធីសាស្រ្តចម្រុះបែបនេះ គឺជាតម្រូវការចាំបាច់ដើម្បីសម្រេចបាននូវអព្យាក្រឹតភាពកាបូនតាមវិធីដែលសមស្របទៅនឹងកាលៈទេសៈនៃប្រទេសនីមួយៗ ហើយជប៉ុន និងអាស៊ាន នឹងកំណត់គោលដៅធ្វើយ៉ាងណាឲ្យមានតុល្យភាពក្នុងកិច្ចខិតខំប្រឹងប្រែងបែបនេះជាមួយនឹងកំណើនសេដ្ឋកិច្ច និងធានាសន្តិសុខថាមពលផងដែរ ។

ស្របពេលជាមួយគ្នានេះ ជប៉ុន និងអាស៊ានក៏បានព្រមព្រៀងគ្នាផងដែរក្នុងការបង្កើតសហគមន៍បំភាយឧស្ម័នសូន្យអាស៊ី (AZEC) នៅក្នុងប្រទេសឥណ្ឌូណេស៊ី ដែលនៅទីនោះសហគមន៍មួយនេះនឹងដំណើរការជាស្ថាប័នស្នូលនៃគំនិតផ្តួចផ្តើម និងមានតួនាទីគាំទ្រដល់ការធ្វើផែនការគោលនយោបាយ និងការស្រាវជ្រាវរបស់ប្រទេសនីមួយៗ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូររ៉េខាងជើង បាញ់មីស៊ីលទៅតំបន់សេដ្ឋកិច្ចផ្ដាច់មុខ ជប៉ុន ខណៈប្រទេស នេះកំពុងរៀបចំកិច្ចប្រជុំជាមួយ អាស៊ាន