មកស្គាល់អាកាសយានដ្ឋានអន្តរជាតិល្អដាច់គេនៅលើពិភពលោក

អាកាសយានដ្ឋាន iGA Istanbul របស់ប្រទេសតួកគី ត្រូវបានបោះឆ្នោតជ្រើសរើសជាអាកាសយានដ្ឋានល្អដាច់គេរបស់ពិភពលោកពីសំណាក់ប្រិយមិត្តអ្នកអានទស្សនាវដ្តីទេសចរណ៍ឈានមុខគេរបស់សហរដ្ឋអាមេរិក Global Traveler ។

ទន្ទឹមនោះ មជ្ឈមណ្ឌលអាកាសចរណ៍ដែលមានផ្ទៃដីប្រមាណ ៧,៦០០ ហិកតាមួយនេះ ក៏ត្រូវបានជ្រើសរើសជាអាកាសយានដ្ឋានល្អបំផុតរបស់អឺរ៉ុបផងដែរ ។ មិនតែប៉ុណ្ណោះ អាកាសយានដ្ឋាន iGA Istanbul ក៏ទទួលបានពានរង្វាន់ជាអាកាសយានដ្ឋានដែលមានតំបន់អាហារ និងភេសជ្ជៈល្អបំផុត ក៏ដូចជាការដើរទិញទំនិញឥតគិតថ្លៃនៅក្នុងអាកាសយានដ្ឋានផងដែរ ។

ក្រៅពីជាប់ជាអាកាសយានដ្ឋានល្អបំផុតលើលោកហើយ ប្រិយមិត្តអ្នកអានទស្សនាវដ្តី Global Traveler ប្រមាណ ៥០ ម៉ឺននាក់ក៏បានបោះឆ្នោតលើសេវាកម្មធ្វើដំណើរដែលពួកគេបានទទួល ក៏ដូចជាសណ្ឋាគារដែលពួកគេបានទៅស្នាក់នៅ រួមជាមួយក្រុមហ៊ុនអាកាសចរណ៍ដែលពួកគេបានធ្វើដំណើរជាមួយផងដែរ ។

យោងតាមការស្រាវជ្រាវបានឲ្យដឹងថា ជាមធ្យមអ្នកទេសចរចំណាយពេលហោះហើរក្នុងស្រុកចំនួន ១៨ ជើងក្នុងមួយឆ្នាំ ដោយ ៩៦ ភាគរយធ្វើដំណើរទៅក្រៅប្រទេស ខណៈអ្នកដំណើរជាង ៨០ ភាគរយគឺស្នាក់នៅក្នុងសណ្ឋាគារលំដាប់ផ្កាយ ៤ និងផ្កាយ ៥ រហូតដល់រយៈពេល ៨០ ថ្ងៃក៏មាន ៕

ប្រែសម្រួល៖ នាង រតនៈ

ប្រភព៖ Anadolu