ថៃ ប្រកាសប្រឆាំងដាច់ខាតលើកសិករដុតកាកសំណល់ដំណាំ ក្រោយប្រមូលផល

ក្រសួងធនធានធម្មជាតិ និងបរិស្ថាន រួមជាមួយក្រសួងកសិកម្ម និងសហករណ៍ថៃប្រកាសប្រឆាំង​ជាដាច់ខាតមិនឲ្យកសិករ​របស់ខ្លួន ដុតបំផ្លាញកាកសំណល់ដំណាំឡើយ ក្រោយប្រមូលផលរួច​ ដើម្បីចៀសវាងការកកើតកំហាប់ខ្យល់ពុល PM2.5 ។

PM2.5 គឺជាភាគល្អិតដែលមានអង្កត់ផ្ចិត ២.៥ មីក្រូ ឬតិចជាងនេះ ហើយនៅពេលដែលមនុស្សស្រូបចូលហើយ អាចបណ្តាលឲ្យប៉ះពាល់ដល់សុខភាពបេះដូង និងជំងឺហឺតជាដើម ។

បចុប្បន្ននៅថៃ​ កម្រិតខ្យល់ពុល PM2.5 បានកើនឡើងដល់កម្រិតកំពូលនៅអំឡុងខែធ្នូ ដល់ខែមីនា ជាពិសេសនៅតាមទីក្រុងធំៗ ដែលមានប្រភពបំពុលសំខាន់ៗដូចជា ការធ្វើចរាចរណ៍ និងការបំភាយឧស្ម័នឧស្សាហកម្ម រួមជាមួយការដុតបំផ្លាញរបស់កសិករ បន្ទាប់ពីប្រមូលផលរួច ។

ពាក់ព័ន្ធបញ្ហានេះ ថៃនឹងចាត់វិធានការតឹងរឹងបំផុតជំរុញកសិករលែងឲ្យមានការដុតបំផ្លាញទាំងស្រុងក្នុងរយៈពេលប៉ុន្មានខែខាងមុខ ជាពិសេស​កសិករ​ដាំពោត និងអំពៅ ដោយសារតែមានការដុតបំផ្លាញច្រើនជាងគេបង្អស់ ។

មិនតែប៉ុណ្ណោះ ថៃ​ក៏គ្រោងពិចារណាផ្អាកការឧបត្ថម្ភធនដល់កសិករផងដែរ ប្រសិនបើពួកគេនៅតែបំពានច្បាប់​ដុតបំផ្លាញទៀត ខណៈបច្ចុប្បន្នកសិករថៃទទួលបានការឧបត្ថម្ភ ១,០០០ បាតក្នុងមួយរ៉ៃក្នុងការដាំដុះដំណាំ ៕

ប្រែសម្រួល៖ នាង​ រតនៈ

ប្រភព៖​ The Nation