វីដេអូស្តែងៗ ថតជាប់បាតុករមីយ៉ាន់ម៉ា ត្រូវប៉ូលិសបាញ់គ្រាប់ពិតចំក្បាល

ជាពេលវេលាដ៏រន្ធត់បំផុតដែលបាតុករគាំទ្រលទ្ធិប្រជាធិបតេយ្យម្នាក់ ត្រូវបានប៉ូលិសមីយ៉ាន់ម៉ាបាញ់ចំក្បាលផ្នែកខាងក្រោយ ដោយធ្វើឲ្យនាងរងរបួសធ្ងន់ ត្រូវចូលសង្គ្រោះបន្ទាន់ក្នុងមន្ទីរពេទ្យ។

នាង Mya Thwate Thwate Khaing អាយុ២០ឆ្នាំ ត្រូវបានបាញ់ដោយក្រុមមន្រ្តីបង្ក្រាបកុបកម្មកាលពីថ្ងៃអង្គារក្នុងរដ្ឋធានី ណៃពិដោ ខណៈនាងចូលរួមជាមួយមនុស្សរាប់ម៉ឺននាក់ផ្សេងទៀតដើម្បីទាមទារឲ្យបញ្ចប់ការធ្វើរដ្ឋប្រហារដឹកនាំដោយយោធា ដែលចាប់ផ្តើមកាលពីសប្តាហ៍មុន។

វីដេអូបានបង្ហាញឲ្យឃើញថា Mya កំពុងឈរនៅផ្នែកម្ខាងនៃក្រុមមន្រ្តី និងនៅពីក្រោយចំណតឡានក្រុង មុនពេលត្រូវគ្រាប់កាំភ្លើងដែលបាញ់ចេញពីខាងក្រោយជួរប៉ូលិស។

ទោះបីជាយ៉ាងណាក៏ដោយ មន្ត្រីប៉ូលិសបានបដិសេធការប្រើគ្រាប់កាំភ្លើងពិតនិងនិយាយថា Mya ត្រូវគ្រាប់កាំភ្លើងជ័រប៉ុន្តែអ្នកជំនាញនិយាយថា បើពិតជាគ្រាប់ជ័រមែន មួកសុវត្ថិភាពដែលនាងពាក់គឺអាចការពារបានហើយ។

ការបាញ់ប្រហារនេះបានបង្កឲ្យមានកំហឹងយ៉ាងខ្លាំង ប្រឆាំងនឹងប៉ូលិសនៅក្នុងប្រទេសអាស៊ីអាគ្នេយ៍មួយនេះ។

កម្មកររាប់រយនាក់បានប្រមូលផ្តុំនៅតាមដងផ្លូវក្នុងរដ្ឋធានីណៃពិដោ ដោយស្រែកពាក្យស្លោកប្រឆាំងរដ្ឋាភិបាលយោធានិងកាន់ស្លាកគាំទ្រលោកស្រីអ៊ុងសានស៊ូជី។

មនុស្សរាប់ពាន់នាក់ក៏បានធ្វើបាតុកម្មនៅទីក្រុងយ៉ាំងហ្គោនដែលជាទីក្រុងធំបំផុតរបស់មីយ៉ាន់ម៉ាផងដែរ៕

សូមទស្សនាវីដេអូ៖

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ មេទ័ពមីយ៉ាន់ម៉ា ថ្លែងជាសាធារណៈលើកដំបូងទាក់ទងនឹងបាតុកម្ម