មុនចូលឆ្នាំថ្មី អ៊ុយក្រែន បើកការវាយប្រហារតាមអាកាសលើភាគខាងលិច រុស្ស៊ី សម្លាប់មនុស្ស ២១ នាក់

អាជ្ញាធរនៅក្នុងប្រទេសរុស្ស៊ីបាននិយាយកាលពីថ្ងៃសៅរ៍ថា មនុស្ស ២១ នាក់បានស្លាប់បាត់បង់ជីវិតនៅក្នុងការវាយប្រហារតាមអាកាសរបស់អ៊ុយក្រែនទៅលើទីក្រុង Belgorod ភាគខាងលិចរបស់រុស្ស៊ី ខណៈមនុស្សចំនួន ១១១ នាក់ក៏បានរងរបួសផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលតំបន់លោក Vyacheslav Gladkov បាននិយាយថា នេះគឺជាការវាយប្រហារដ៏សាហាវបំផុតមួយរបស់កងកម្លាំងរដ្ឋាភិបាលទីក្រុងកៀវមកលើដីរុស្ស៊ី ចាប់តាំងផ្ទុះប្រតិបត្តិការសឹករបស់ទីក្រុងមូស្គូទៅលើទឹកដីនៃប្រទេសអ៊ុយក្រែនកាលពី ២២ ខែមុន ។

ទន្ទឹមនោះ អាជ្ញាធររុស្ស៊ីក៏បានចោទប្រកាន់ទីក្រុងកៀវផងដែរថា កំពុងបើកការសងសឹកមកលើរុស្ស៊ី ស្របពេលដែលការវាយប្រហារនេះកើតមានឡើងតែមួយថ្ងៃប៉ុណ្ណោះ បន្ទាប់ពីការទម្លាក់គ្រាប់បែកពីលើអាកាសរយៈពេល ១៨ ម៉ោងនៅទូទាំងប្រទេសអ៊ុយក្រែន ដោយបានសម្លាប់ជនស៊ីវិលយ៉ាងហោចណាស់ ៤១ នាក់ ។

ពាក់ព័ន្ធនឹងបញ្ហានេះដែរ ក្រសួងការពារជាតិរុស្ស៊ីបានកំណត់អត្តសញ្ញាណគ្រាប់បែកដែលប្រើក្នុងការវាយប្រហារនោះថា ជាគ្រាប់រ៉ុកកែតបិសាច (Vampire) ផលិតនៅប្រទេសឆេក និងមីស៊ីល Olkha បំពាក់ជាមួយនឹងក្បាលគ្រាប់បែកចង្កោម ។

គិតត្រឹមខែធ្នូ ឆ្នាំ២០២៣ នេះ សង្គ្រាមរវាងរុស្ស៊ី និងអ៊ុយក្រែនបានចាយពេលអស់ ២២ ខែហើយ បន្ទាប់ពីកងកម្លាំងរដ្ឋាភិបាលមូស្គូលើកទ័ពចូលទីក្រុងកៀវក្នុងខែកុម្ភៈ ឆ្នាំ២០២២ ខណៈរហូតមកដល់ពេលនេះលោកប្រធានាធិបតី Volodymr Zelensky កំពុងដើរសុំជំនួយ ក៏ដូចជាសព្វាវុធ និងកែនទាហានជាបន្តបន្ទាប់ពីសម្ព័ន្ធមិត្តសំខាន់ៗដូចជា អឺរ៉ុប និងអាមេរិកជាដើម ។

ទោះបីជាមិនមានព័ត៌មានច្បាស់លាស់អំពីចំនួនអ្នកស្លាប់ និងរបួសក៏ដោយ ប៉ុន្តែតាមការប៉ាន់ប្រមាណរបស់អង្គការសហប្រជាជាតិបានឲ្យដឹងថា ជនស៊ីវិលអ៊ុយក្រែនជាង ១០,០០០ នាក់ត្រូវបានសម្លាប់ ខណៈយោងតាមរបាយការណ៍របស់កាសែត New York Times វិញបានអះអាងថា រហូតមកដល់ពេលនេះទាំងទាហានអ៊ុយក្រែន និងរុស្ស៊ីសរុបចូលគ្នាគឺមានជាង ៥ លាននាក់បានស្លាប់បាត់បង់ជីវិត ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ ព្រឹត្តិការណ៍ពិភពលោកក្នុងឆ្នាំ ២០២៣ ជាពិសេសការផ្ទុះយាន Titan និង​សង្គ្រាម អ៊ីស្រាអែល-ហាម៉ាស