កូរ៉េខាងជើងបាញ់កាំភ្លើងធំជាង ២០០ ដើម បង្កើនភាពតានតឹងដល់សន្តិភាពនៅឧបទ្វីបកូរ៉េ

ថ្ងៃសុក្រ ទី៥ ខែមករា នេះ ប្រទេសកូរ៉េខាងជើងបានបាញ់កាំភ្លើងធំជាង ២០០ ដើមនៅជិតព្រំដែនសមុទ្រដែលជាតំបន់ជម្លោះជាមួយកូរ៉េខាងត្បូង ។ សកម្មភាពនេះ បានធ្វើឱ្យមានភាពតានតឹងកើតឡើង ដល់ប្រជាជនកូរ៉េខាងត្បូងដែលរស់នៅតំបន់កោះដាច់ស្រយាលចំនួនពីរនៃព្រំដែនសមុទ្រខាងលើ បាននាំគ្នាជម្លៀសខ្លួនទៅកាន់ទីជម្រកសុវត្ថិភាពតាមការណែនាំរបស់យោធាកូរ៉េខាងត្បូង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះសកម្មភាពនេះ ត្រូវបានគេដឹងថា ជាសកម្មភាពធ្វើសមយុទ្ធបាញ់គ្រាប់ពិត របស់កូរ៉េខាងជើង ។ ប៉ុន្តែទោះជាយ៉ាងណាក្ដី យោធាកូរ៉េខាងត្បូងបានចាត់ទុកថា វាជាទង្វើបង្កហេតុដែលបង្កើនភាពតានតឹង និងគំរាមកំហែងដល់សន្តិភាពនៅលើឧបទ្វីបកូរ៉េ ។

អ្នកនាំពាក្យយោធាកូរ៉េខាងត្បូង លោក Lee Sung-joon បាននិយាយនៅក្នុងសន្និសីទសារព័ត៌មានមួយថា គ្រាប់កាំភ្លើងធំរបស់កូរ៉េខាងជើង ទាំងអស់បានធ្លាក់នៅផ្នែកខាងជើងនៃព្រំដែនសមុទ្រ ។ អ្នកនាំពាក្យរូបនេះបានបន្តថា យោធាកូរ៉េខាងត្បូងបាន នឹងកំពុងតាមដានចលនារបស់កូរ៉េខាងជើងនៅតាមឆ្នេរសមុទ្ររបស់ខ្លួន ដោយមានកិច្ចសហប្រតិបត្តិការពី យោធាអាមេរិក។

សូមបញ្ជាក់ផងដែរថា សកម្មភាពបាញ់កាំភ្លើងធំជាង ២០០ ដើមពីសំណាក់យោធាកូរ៉េខាងជើង នៅជិតព្រំដែនសមុទ្ររវាងកូរ៉េខាងត្បូង និងកូរ៉េខាងជើងនេះពុំមានបណ្ដាលឱ្យរងការខូចខាត ឬប៉ះពាល់ដល់ជនស៊ីវិល ឬផ្នែកយោធាណាមួយឡើយ ៕

ប្រែសម្រួលដោយ៖ កុសល
ប្រភព៖ CNA