ព័ត៌មានអន្ដរជាតិ

ចំណងមិត្តភាព រុស្ស៊ី-ឥណ្ឌា កាន់តែបន្តរលូនទៅមុខ និងរឹងមាំ ទោះបីមានទណ្ឌកម្មលោកខាងលិច

បានផុស

២ years មុន

នៅ

ថ្ងៃចន្ទ ៨ មករា ២០២៤

ដោយ

រដ្ឋាភិបាលក្រុងញូវដែលីបានបង្កើនចំណងមិត្តភាពឲ្យកាន់តែរឹងមាំ និងស៊ីជម្រៅជាងមុនជាមួយរដ្ឋាភិបាលក្រុងមូស្គូ ទន្ទឹមនឹងពេលដែលស្ថានភាពនៅលោកខាងលិចដែលដាក់ទណ្ឌកម្មទៅលើរុស្ស៊ីនៅតែតានតឹង។

បើតាមការលើកឡើងរបស់ប្រធានក្រុមជំនាញការប្រឹក្សាប្រចាំរដ្ឋាភិបាលក្រុងញូវដេលី លោក Arvind Gupta បានបង្ហាញពីបច្ចុប្បន្នភាពនៃទំនាក់ទំនងប្រទេសមហាអំណាចប៉ែកខាងកើតទាំងពីរថា ទំនាក់ទំនងរវាងឥណ្ឌា និងរុស្ស៊ីបានបន្តលូតលាស់យ៉ាងរឹងមាំជាបន្តបន្ទាប់ ពិសេសពីការអនុវត្តយុទ្ធសាស្រ្តស្វ័យភាពរបស់ខ្លួន ដោយមិនមានជំហររិះគន់ចំៗទៅលើសកម្មភាពលុកលុយរបស់រុស្ស៊ីទៅលើប្រទេសអ៊ុយក្រែន ។ ការណ៍នេះហើយដែលធ្វើឲ្យតំបន់លោកខាងលិចខកបំណងលើប្រទេសឥណ្ឌា ។

ទិដ្ឋភាពពីចំណងមិត្តភាពនៃរដ្ឋទាំងពីរ នឹងត្រូវបង្ហាញផងដែរតាមរយៈសន្និសីទក្រោមប្រធានបទ៖ ឥណ្ឌា និងរុស្ស៊ី ទស្សនៈទៅលើស្ថានភាពប្រែប្រួលនៃពិភពលោក បញ្ហាតំបន់ និងចំណងទ្វេភាគី ដែលធ្វើឡើងនាថ្ងៃចន្ទ ០៨ មករា ២០២៤នេះ ។ ក្រុមអ្នកជំនាញការរុស្ស៊ី និងឥណ្ឌា នឹងលើកពិភាក្សាបន្ថែមផងដែរអំពីនិន្នាការ ក្នុងការផ្លាស់ប្តូរស្ថានការណ៍ពិភពលោក គន្លឹះអភិវឌ្ឍក្នុងក្របខណ្ឌទ្វេភាគីនៃរដ្ឋទាំងពីរ។

គួររំឭកផងដែរអំពីទំនាក់ទំនងនៃប្រទេសមហាអំណាចអាស៊ីទាំងពីរ កាលពីចុងឆ្នាំ២០២៣កន្លងទៅ រដ្ឋមន្ត្រីការបរទេសឥណ្ឌាSubrahmanyam Jaishankar បានធ្វើទស្សនកិច្ចរយៈពេល៤ថ្ងៃនៅក្រុងមូស្គូ។ លោកប្រធានាធិបតីរុស្ស៊ី Vladimir Putin បានទៅទទួលស្វាគមន៍លោកដោយផ្ទាល់ ក៏ដូចជាអញ្ជើញលោកនាយករដ្ឋមន្ត្រីមកទស្សនកិច្ចជាបន្តបន្ទាប់ ដែលបញ្ជាក់ច្បាស់ថា ចំណងទំនាក់ទំនងប្រទេសទាំងពីររក្សាបាននូវតុល្យភាពល្អប្រសើរ និងនៅតែរលូនទៅមុខ បើទោះបីក្នុងស្ថានភាពតឹងតែងពីទណ្ឌកម្មដោយប្រទេសនានាលើពិភពលោក ទៅលើរុស្ស៊ីក៏ដោយ៕

ប្រែសម្រួល៖ មាន រតនា

ប្រភព៖ RT