ឥណ្ឌា បង្កើតកម្មវិធីបញ្ចុះតម្លៃ ៨៥ភាគរយ ទៅលើឱសថព្យាបាលជំងឺមហារីក

មហារីកត្រូវបានគេចាត់ទុកថា ជាប្រភេទជំងឺកាចសាហាវមួយ ដែលទាមទារឱ្យមានការព្យាបាលរយៈពេលយូរ និងប្រើប្រាស់ថវិការច្រើនលើសលប់ដើម្បីទទួលបានការព្យាបាលត្រឹមត្រូវ ។ ដូច្នេះហើយចំពោះអ្នកដែលមានជីវភាពខ្វះខាត អាចនឹងក្លាយជាជនរងគ្រោះដោយសារជំងឺមួយនេះ ។

ដោយសារមើលឃើញពីបញ្ហានេះ មជ្ឈមណ្ឌលមហារីក Cachar ក្នុងរដ្ឋ Assam ប្រទេសឥណ្ឌា រួមនឹងមន្ទីរពេទ្យជាច្រើនទៀត បាននាំគ្នាបង្កើតកម្មវិធីមួយ ដោយបញ្ចុះតម្លៃទៅលើថ្នាំព្យាបាលជំងឺមហារីករហូតដល់ ៨៥ភាគរយ ជូនប្រជាពលរដ្ឋក្រីក្រនៅក្នុងតំបន់ ។

យោងតាមរបាយការណ៍បានបង្ហាញថា ក្នុងមួយឆ្នាំៗ ប្រទេសឥណ្ឌាមានអ្នកជំងឺមហារីកជាមធ្យមចំនួនជិត ២លាននាក់ ប៉ុន្តែក្រុមហ៊ុនប្រឹក្សា EY និយាយថាតួលេខជាក់ស្តែងអាចនឹងកើនឡើងដល់ទៅ៣ដង នៃទិន្ន័យខាងលើ។

ជាមួយគ្នានេះដែរ BBC បានបង្ហាញថា ប្រជាជនឥណ្ឌាភាគច្រើនត្រូវចំណាយលើការថែទាំ និងព្យាបាលជំងឺមហារីកដោយខ្លួនឯង។ សូម្បីតែសម្រាប់អ្នកដែលមានការធានារ៉ាប់រង ឬតាមគម្រោងរបស់រដ្ឋាភិបាលក៏ដោយ ព្រោះការចំណាយលើការថែទាំជំងឺមហារីកច្រើនតែមិនត្រូវបានរ៉ាប់រងទាំងស្រុងនោះទេ។ លោកវេជ្ជបណ្ឌិតផ្នែកជំងឺមហារី ឈ្មោះ Pramesh បាននិយាយថា ជំងឺមហារីកបានសម្លាប់មនុស្សប្រហែល ៧០ភាគរយនៅលើពិភពលោក ហើយគេព្យាករថា ជនរងគ្រោះភាគច្រើនស្ថិតនៅក្នុងប្រទេសដែលមានចំណូលទាប និងមធ្យម ដូចជាប្រទេសឥណ្ឌា ជាដើម ។

សូមបញ្ជាក់ថា កម្មវិធីបញ្ចុះតម្លៃទៅលើសេវាកម្ម ក៏ដូចជាឱសថព្យាបាលជំងឺមហារីកនេះដែរ គឺត្រូវបានអនុវត្តជាប្រព័ន្ធ ជាមួយមន្ទីរពេទ្យជាច្រើននៅក្នុងរដ្ឋ Assam ជាពិសេសគឺ មជ្ឈមណ្ឌលមហារីក Cachar ហើយគម្រោងនេះក៏ត្រូវបានផ្ដួចផ្ដើមឡើងដោយមជ្ឈមណ្ឌលមហារីកដ៏ធំបំផុតរបស់ប្រទេសគឺមន្ទីរពេទ្យ Tata Memorial (TMH) នៅទីក្រុងបុមបៃ។ ភាពជោគជ័យនៃគម្រោងនេះបានទាក់ទាញចំណាប់អារម្មណ៍ពីមន្ទីរពេទ្យ និងរដ្ឋាភិបាលរដ្ឋនៅទូទាំងប្រទេស ៕

ប្រែសម្រួលដោយ÷ កុសល

ប្រភព÷ BBC