ទីក្រុងហូជីមិញ ត្រៀមហាមឃាត់ការ Live លក់ឱសថ លើប្រព័ន្ធផ្សព្វផ្សាយសង្គម

សារព័ត៌មាន VN Epress រាយការណ៍ថា មន្ទីរសុខាភិបាលទីក្រុងហូជីមិញ បានស្នើដល់បណ្តាអាជីវកម្មឱសថ កុំលក់ផលិតផលនៅលើប្រព័ន្ធផ្សព្វផ្សាយសង្គម ឬ Live លក់ឲ្យសោះ។

ទោះបីជាយ៉ាងណាក៏ដោយ ក្រុមហ៊ុនណាដែលមានលិខិតអនុញ្ញាតធ្វើអាជីវកម្ម អាចលក់ផលិតផលរបស់ខ្លួនតាមរយៈគេហទំព័រ, App និងវេទិកាប្រតិបត្តិការឌីជីថលដែលបានអនុម័ត ពោលគឺហាមឃាត់តែការលក់នៅលើប្រព័ន្ធផ្សព្វផ្សាយសង្គម ឬ Live លក់ប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Nguyen Hai Nam អនុប្រធានមន្ទីរសុខាភិបាលទីក្រុងហូជីមិញ បាននិយាយក្នុងកិច្ចប្រជុំសារព័ត៌មានកាលពីចុងសប្តាហ៍ថា វាជារឿងចាំបាច់បំផុត ដែលត្រូវមានបទប្បញ្ញត្តិច្បាស់លាស់ទាក់ទងនឹងពាណិជ្ជកម្មតាមប្រព័ន្ធអេឡិចត្រូនិកនៅក្នុងវិស័យឱសថ ហើយវាពិតជាចាំបាច់មែនទែន ដែលត្រូវមានការគ្រប់គ្រងឲ្យបានតឹងរ៉ឹង ដើម្បីធានាបាននូវគុណភាពនៃផលិតផលឱសថ ហើយត្រូវប្រាកដថា ប្រភពដើមរបស់ឱសថ មានភាពងាយស្រួលក្នុងការស្វែងរក។

លោក Nam គូសបញ្ជាក់ថា “សព្វថ្ងៃ ការលក់ឱសថតាមអនឡាញ គឺមិនទាន់ត្រូវបានទទួលស្គាល់ដោយច្បាប់នៅឡើយទេ ដូច្នេះហើយ ការ Live លក់ឱសថ គឺជារឿងបំពានច្បាប់”។

ស្របពេលជាមួយគ្នានោះ មន្ទីរសុខាភិបាល ក៏បាននិងកំពុងត្រួតពិនិត្យការផ្សាយពាណិជ្ជកម្ម និងការលក់ឱសថតាមបណ្តាញឌីជីថលផងដែរ ហើយថែមទាំងដាក់ចេញនូវកម្មវិធីវេជ្ជសាស្រ្ដតាមប្រព័ន្ធអ៊ីនធឺណិត និងបណ្តាញទូរស័ព្ទបន្ទាន់ទៀតផង ដើម្បីឲ្យប្រជាជនរាយការណ៍អំពីការលក់ឱសថដែលគ្មានប្រភពច្បាស់លាស់។

យ៉ាងណាក្តី សំណើរខាងលើ កំពុងត្រូវបានវាយតម្លៃដោយក្រសួងយុត្តិធម៌វៀតណាមនៅឡើយ ហើយសេចក្តីសម្រេចនឹងធ្វើឡើងក្នុងពេលឆាប់។

យោងតាមរបាយការណ៍របស់ប៉ូលិសវៀតណាម, ទំនិញក្លែងក្លាយរហូតដល់៨០ទៅ៩០% រួមទាំងថ្នាំពេទ្យផងដែរ គឺត្រូវបានជួញដូរតាមអ៊ីនធឺណិត។

អ្នក​ជំនាញ​ណែនាំ​ថា ប្រជាជន​គួរ​តែ​ទិញ​ថ្នាំ​នៅ​តាមឱសថស្ថាន​ស្រប​ច្បាប់ ដោយ​មាន​វិក្កយបត្រ និង​ឯកសារ​ពេញលេញ​ដែល​បញ្ជាក់​ពី​ប្រភព និង​គុណភាព​ឱសថ៕

អត្ថបទ៖ សុខ សុវណ្ណ

ចុចអាន៖ ប៉ូលិសក្រុងហូជីមិញ បំបែកសម្បុករត់ពន្ធ iPhone ពីកម្ពុជា យកទៅលក់នៅ វៀតណាម