ប៉ូលិស អាហ្វ្រិកខាងត្បូង ចាប់បានជនសង្ស័យដុតអគារកម្ពស់ ៥ ជាន់ សម្លាប់មនុស្ស ៧៧ នាក់

ប៉ូលិសនៅទីក្រុង Gauteng ប្រទេសអាហ្វ្រិកខាងត្បូងបានចាប់ខ្លួនជនសង្ស័យម្នាក់ពាក់ព័ន្ធនឹងអគ្គិភ័យដែលបានឆាបឆេះអគារ ៥ ជាន់នៅកណ្តាលទីក្រុង Johannesburg កាលពីឆ្នាំមុន និងបានសម្លាប់មនុស្ស ៧៧ នាក់ ។ នេះបើតាមការផ្សាយរបស់ទូរទស្សន៍សាធារណៈអាហ្រ្វិកខាងត្បូង SABC បានរាយការណ៍កាលពីថ្ងៃអង្គារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យត្រូវបានចាប់ខ្លួន បន្ទាប់ពីគាត់បានសារភាពនៅចំពោះមុខគណៈកម្មការស៊ើបអង្កេតថា​មាន​ជាប់​ពាក់ព័ន្ធ​នឹង​ការ​​ដុតភ្លើង​ដែលបណ្ដាលឲ្យមានសោកនាដកម្ម​នេះ ។ បុរសរូបនេះបានសារភាពថា ខ្លួនពិតជាបានសម្លាប់បុរសម្នាក់ដោយវាយ ច្របាច់ក និងដុតនៅបន្ទប់ក្រោមដីក្នុងអគារនៅទីក្រុង Johannesburg ដែលនាំឲ្យមានភ្លើងឆេះរាលដាលយ៉ាងសន្ធោសន្ធៅ ដែលបានសម្លាប់មនុស្សចំនួន ៧៧ នាក់ពិតប្រាកដមែន ។

បើយោងតាមការបញ្ជាក់របស់សារពត៌មាន​​ AP បានឲ្យដឹងថា បុរសរូបនេះគឺជា​អ្នក​ប្រើគ្រឿងញៀន ​​និងត្រូវបានបញ្ជាឲ្យសម្លាប់មនុស្សដោយអ្នកលក់គ្រឿងញៀនក្នុង​អគារ​នោះ ។ ជនសង្ស័យអាយុ ២៩ ឆ្នាំរូបនេះនឹងបង្ហាញខ្លួននៅក្នុងតុលាការឆាប់ៗនេះ ក្រោមការចោទប្រកាន់ពីបទ ឃាតកម្ម ៧៦ ករណី និងប៉ុនប៉ងមនុស្សឃាត ១២០ ករណី ។

គួរបញ្ជាក់ថា មនុស្ស​ជាង ៧០ ​នាក់ ក្នុង​នោះ​មាន​កុមារ ១២ ​នាក់ បាន​ស្លាប់បាត់បង់ជីវិត និង​មនុស្សជាង ៥០ នាក់ផ្សេងទៀតបានបានរងរបួស ​ដោយសារ​ភ្លើង​បាន​ឆាបឆេះ​អគារ​ ៥​ ជាន់ជាអគារដែល​មិន​បាន​បំពេញ​តាមស្ដង់ដារសុវត្ថិភាព​ និងមានភាពអនាធិបតេយ្យ ហើយត្រូវបានជួលឲ្យជនចំណាកស្រុក និងជនជាតិអាហ្វ្រិកខាងត្បូងដែលខ្វះខាតលទ្ធភាពទិញលំនៅដ្ឋាន​ ខណៈករណីភ្លើងឆេះដែលបានកើតឡើងកាលពីថ្ងៃទី​៣១​ ខែ​​សីហា​ ឆ្នាំមុននេះ គឺជាសោកនាដកម្មដែលបំផ្លាញលំនៅដ្ឋានជនចំណាកស្រុកដ៏អាក្រក់បំផុតដែលមិនធ្លាប់មានពីមុនមកនៅអាហ្រិកខាងត្បូង ៕

អត្ថបទ៖ ប៊ុន សុភាព