Connect with us

ព័ត៌មានអន្ដរជាតិ

មីយ៉ាន់ម៉ា ប្រហារជីវិតឧត្តមសេនីយ៍ផ្កាយមួយ ៣ រូប ក្រោយលើកទង់ ស ចុះចាញ់ក្រុមឧទ្ទាមទ័ពព្រៃ

បានផុស

នៅ

រដ្ឋាភិបាលយោធាមីយ៉ាន់ម៉ាបានផ្ដន្ទាទោសឧត្តមសេនីយ៍ត្រីចំនួន ៦ រូប ក្នុងនោះ ៣ រូបកាត់ទោសប្រហារជីវិត និង ៣ រូបផ្សេងទៀតជាប់គុកអស់មួយជីវិត ដោយសារតែទម្លាក់អាវុធ និងលើកទង់ ស សុំចុះចាញ់សម្ព័ន្ធក្រុមប្រដាប់អាវុធជនជាតិភាគតិចនៅទីក្រុង Laukkai ​ក្នុង​រដ្ឋ​ Shan ​ភាគ​ខាង​ជើង ។ នេះបើយោងតាមការចុះផ្សាយដោយសារព័ត៌មានមីយ៉ាន់ម៉ា The Irrawaddy កាលពីថ្ងៃទី២៤ ខែមករាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពពីរដ្ឋាភិបាលយោធាបានឲ្យដឹងថា ឧត្តមសេនីយ៍ផ្កាយមួយទាំង ៦ រូបដូចជា លោក Moe Kyaw Thu មេទីបញ្ជាការក្រុង Laukkai, លោក Tun Tun Myint ប្រធានស្តីទីនៃតំបន់គ្រប់គ្រងស្វ័យត Kokang និងលោក Zaw Myo Win មេបញ្ជាការកងពលលេខ ៥៥ ត្រូវបានកាត់ទោសប្រហារជីវិត ខណៈលោក Aye Min Oo, លោក Thaw Zin Oo និងលោក Aung Zaw Lin ប្រធានមជ្ឈមណ្ឌលប្រតិបត្តិការលេខ ១៤, ១៦ និងលេខ ១២  ត្រូវកាត់ទោសជាប់គុកអស់មួយជីវិតនៅពន្ធនាគារ Insein ក្នុង​ទីក្រុង Yangon ។

ពាក់ព័ន្ធនឹងបញ្ហានេះដែរ លោក Kaung Thu Win ដែលជាអតីតមេទ័ពចូលរួមក្នុងចលនាមិនគោរពច្បាប់ស៊ីវិលបន្ទាប់ពីរដ្ឋប្រហារបានប្រាប់សារព័ត៌មាន The Irrawaddy ថា “ឧត្តមសេនីយ៍ផ្កាយមួយទាំង ៦ រូបត្រូវបានចោទប្រកាន់ក្រោមច្បាប់ទាហានពីបទ “រត់ចោលជួរយ៉ាងអាម៉ាស់” ខណៈកន្លងមកយោធាក៏ធ្លាប់ដាក់ទោសទណ្ឌប្រហារជិវិតលើទាហានរូបណាដែលល្មើសនឹងវិន័យបែបនេះដូចគ្នា ។

លោក Min Aung Hlaing

ដោយឡែក មេដឹកនាំយោធាមីយ៉ាន់ម៉ាលោក Min Aung Hlaing ក៏បានប្រាប់សារព័ត៌មាន Popular News Journal ផងដែរថា ច្បាប់ទាហានគ្មានឡើយពាក្យថាអត់ឱនចំពោះមេទ័ពរូបណាដែលទម្លាក់អាវុធ និងលើកទង់ ស សុំចុះចាញ់សត្រូវ ក៏ដូចជារត់ប្រាស់អាយុចោលបន្ទាយទ័ពរបស់ខ្លួន ហើយការ​ដាក់​ទោសទណ្ឌ​ដ៏​តឹងតែងនេះ គឺមានមុខព្រួញ​បង្ខាំង​មេ​បញ្ជាការ​ផ្សេង​ទៀតមិនឲ្យ​ចុះញ៉ម​ ឬរត់ចោលបន្ទាយទ័ពរបស់ពួកគេតទៅទៀតនោះឡើយ ។

សម្ព័ន្ធបងប្អូន ៣ នាក់ ឬ “Three Brotherhood Alliance” បានប្រកាសពីការវាយដណ្ដើមបានទីក្រុង Laukkai បន្ទាប់ពីទីបញ្ជាការកណ្ដាលរបស់យោធារដ្ឋាភិបាលលនៅក្នុងតំបន់នោះបានលើកទង់ ស និងទម្លាក់អាវុធសុំចុះចាញ់ ហើយតំបន់ទាំងអស់ក្នុងទីក្រុងមួយនេះ បានក្លាយជាទឹកដីដែលលែងមានកងកម្លាំងរដ្ឋាភិបាលយោធាមីយ៉ាន់ម៉ាទៀតនោះដែរ ។

ជម្លោះប្រដាប់អាវុធរវាងកម្លាំងរដ្ឋាភិបាលយោធា និងក្រុមឧទ្ទាមទាំងបីបានផ្ទុះមានឡើងនៅភាគខាងជើងនៃប្រទេសមីយ៉ាន់ម៉ា ចាប់តាំងពីចុងខែតុលា ឆ្នាំ២០២៣ មកម្ល៉េះ បើទោះបីជាទីក្រុងប៉េកាំងសម្របសម្រួលបទឈប់បាញ់រវាងភាគីជម្លោះទាំងពីរក៏ដោយ ខណៈភ្លើងសង្គ្រាមកាន់តែឆេះរោលរាលឡើង នៅពេលកម្លាំងទ័ពជិត ២,៤០០ នាក់ រួមទាំងមន្ត្រីជាង ២០០ នាក់បានសុំចុះចាញ់ក្រុមឧទ្ទាមទ័ពព្រៃនៅទីក្រុង Kokang ដែលមានព្រំប្រទល់ជាប់ប្រទេសចិន រួមជាមួយទីក្រុង Paletwa និងបន្ទាយទ័ពចំនួន ៦ ផ្សេងទៀតនៅតាមបណ្ដោយព្រំដែនជាមួយប្រទេសឥណ្ឌាកាលពីពាក់កណ្ដាលខែមករា ឆ្នាំ២០២៤ កន្លងទៅ ។

សរុបមក ក្រុមទ័ពព្រៃទាំងបីនេះដណ្តើមយកបន្ទាយទ័ពជាង ៥០០ កន្លែង និងទីក្រុងចំនួន ១៧ ពីកងទ័ពរដ្ឋាភិបាលយោធាមីយ៉ាន់ម៉ា ក្រោយពេលដែលការប្រយុទ្ធគ្នាបានរាលដាលដល់ភាគខាងកើត និងភាគខាងលិចនៃប្រទេស ខណៈយោងតាមអង្គការសហប្រជាជាតិ (UN) បានឲ្យដឹងថា ប្រជាជនជាងកន្លះលាននាក់ត្រូវបង្ខំចិត្តឲ្យភៀសខ្លួនចេញពីផ្ទះសម្បែងរបស់ពួកគេ ។

គួរបញ្ជាក់ថា យោធាមីយ៉ាន់ម៉ាដែលបានដណ្ដើមអំណាចនៅក្នុងរដ្ឋប្រហារឆ្នាំ ២០២១ កំពុងបាត់បង់ការគ្រប់គ្រងទីក្រុង និងទីស្នាក់ការយោធាជាច្រើននៅជុំវិញប្រទេស ខណៈសមាជិកជាច្រើននាក់របស់កងកម្លាំងសន្តិសុខមីយ៉ាន់ម៉ា បានទម្លាក់អាវុធសុំចុះចាញ់ ក៏ដូចជាត្រូវបានចាប់ខ្លួនផងដែរក្នុងការប្រយុទ្ធគ្នាតាមតំបន់ព្រំដែនជាមួយក្រុមកងកម្លាំងចម្រុះប្រឆាំងរដ្ឋាភិបាលយោធា ៕

ដោយ ៖ សុខ ជីវ័ន្ត

ចុចអាន ៖ យន្តហោះយោធា មីយ៉ាន់ម៉ា ទៅដឹកទាហានជិត ៣០០ នាក់ដែលភ័យរត់ចូល ឥណ្ឌា ជួបហេតុការណ៍បើកធ្លាក់ផ្លូវ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានអន្ដរជាតិ៥ ថ្ងៃ មុន

ក្មេងស្រីហ្វីលីពីន-កូរ៉េ ដែលត្រូវសេដ្ឋីឌូបៃយកទៅចិញ្ចឹម ពេលនេះមានស្ថានភាពបែបណាហើយ?

ចរាចរណ៍៥ ថ្ងៃ មុន

ករណី​បុករះ​ស្លាប់​៤នាក់​នៅ​ស្ពាន​អាកាស​ឫស្សី​កែវ​ មាន​ម្នាក់​ជា​និស្សិត​ពូកែ​ជំនាញ​ស្ថាបត្យកម្ម និង​នគរូបនីយវិទ្យា

ជីវិតកម្សាន្ដ៣ ថ្ងៃ មុន

លេចមុខតួឯកប្រុសក្នុងរឿង “កងដៃចាំស្នេហ៍” ស្នាងភ្នួស​ សុំឲ្យគ្រប់គ្នាអហោសិកម្ម

ព័ត៌មានអន្ដរជាតិ៣ ថ្ងៃ មុន

យន្តហោះក្រុមហ៊ុនអាកាសចរណ៍ Jetstar មួយគ្រឿង បុកគ្នាជាមួយរថយន្តសន្តិសុខអាកាសយាដ្ឋាន

ព័ត៌មានជាតិ៥ ថ្ងៃ មុន

គម្រោង​ទឹកស្អាត​ធំបំផុត​ចាយ​ទុនជាង ១០០ លាន​​ដុល្លារ​នៅ​បាក់ខែង ​គ្រោង​​ចាប់ផ្តើម​សាងសង់​

Sokha Hotels

ព័ត៌មានពេញនិយម