តុលាការ ម៉ាឡេស៊ី ចោទអតីតរដ្ឋមន្ត្រីហិរញ្ញវត្ថុពីបទ “មិនគោរពគោល​ការណ៍ ប្រកាសទ្រព្យសម្បត្តិ”

នៅថ្ងៃចន្ទ ទី២៩ ខែមករា អតីតរដ្ឋមន្ត្រីហិរញ្ញវត្ថុម៉ាឡេស៊ី លោក Daim Zainuddin ត្រូវបានចោទប្រកាន់ពីបទ មិនគោរពតាមសេចក្តីជូនដំណឹងប្រកាសទ្រព្យសម្បត្តិរបស់គាត់ ក្រោមច្បាប់ប្រឆាំងអំពើពុករលួយរបស់ប្រទេស ចំពេលមានការបង្ក្រាបអំពើពុករលួយពាក់ព័ន្ធនឹងឥស្សរជននយោបាយ និងអាជីវកម្មធំៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទ្រព្យសម្បត្តិសរុបរបស់ លោក Daim Zainuddin ត្រូវបានគេរកឃើញមានដូចជា ក្រុមហ៊ុនចំនួន ៣៨ និងអចលនទ្រព្យចំនួន ២៥ នៅក្នុងទីក្រុង Kuala Lumpur, Selangor, Pahang, Negeri Sembilan, Perak និង Kedah ក៏ដូចជារថយន្តទំនើបៗជាច្រើនរួមមាន រថយន្ត Rolls Royce រថយន្ត Mercedes Benz ចំនួន ៣ គ្រឿង និងរថយន្ត Jaguar ចំនួន ១គ្រឿង។

លោក Daim Zainuddi បច្ចុប្បន្នមានវ័យ ៨៥ឆ្នាំ បានកាន់តំណែងជា រដ្ឋមន្ត្រីហិរញ្ញវត្ថុពីឆ្នាំ ១៩៨៤ ដល់ឆ្នាំ ១៩៩១ និងពីឆ្នាំ ១៩៩៩ ដល់ឆ្នាំ ២០០១ ។ ហើយគាត់ត្រូវបានគេស្គាល់ច្បាស់ថា ជាមិត្តភក្ដិស្និទស្នាលរបស់អតីតនាយករដ្ឋមន្ត្រី Mahathir Mohamad ដែលបានកាន់អំណាចក្នុងឆ្នាំ ១៩៨១ ដល់ឆ្នាំ​ ២០០៣ និងពីឆ្នាំ ២០១៨ ដល់ឆ្នាំ ២០២០។

នៅព្រឹកថ្ងៃចន្ទ លោក Daim Zainuddi ស្ថិតនៅក្នុងសភាពទ្រុឌទ្រោម អង្គុយលើរទេះរុញ អមជាមួយភរិយារបស់គាត់គឺលោកស្រី Na’imah Abdul Khalid និងសមាជិកសភាម្នាក់ទៀតឈ្មោះ Muar បានបង្ហាញខ្លួននៅក្នុងសាលតុលាការ ។ ហើយលោក Daim Zainuddin ត្រូវបានតុលាការ ចោទប្រកាន់ ពីបទមិនគោរពតាម សេចក្តីជូនដំណឹងប្រកាសទ្រព្យសម្បត្តិ តាមច្បាប់ត្រូវជាប់ពន្ធនាគាររយៈពេល ៥ឆ្នាំ និងពិន័យជាទឹកប្រាក់ចំនួន ២ម៉ឺនដុល្លារ ។ យ៉ាងណាមិញ អតីតរដ្ឋមន្ត្រីហិរញ្ញវត្ថុម៉ាឡេស៊ី រូបនេះបានបដិសេធមិនទទួលស្គាល់កំហុស និងទាមទារឱ្យមានការកាត់ក្ដី ។

ជាមួយគ្នានេះលោក M Puravalen មេធាវីរបស់ Daim Zainuddi បានស្នើរសុំឱ្យកូនក្ដីរបស់គាត់បាននៅក្រៅឃុំ ដោយយល់ព្រមតម្កល់ទឹកប្រាក់ ៦ម៉ឺនដុល្លារ ក្រោមហេតុផលថា លោក Daim Zainuddi កំពុងមានបញ្ហាសុខភាពដូចជា បញ្ហាតម្រងនោម និងមានជំងឺដាច់សរសៃឈាមខួរក្បាល តិចតួច។

សូមបញ្ជាក់ផងដែរថា ប្រធានាធិបតីម៉ាឡេស៊ី លោក Anwar Ibrahim កំពុងធ្វើយុទ្ធនាការលើកំណែទម្រង់ថ្មីមួយ ដោយបានប្តេជ្ញាថានឹងដោះស្រាយអំពើពុករលួយកម្រិតខ្ពស់នៅក្នុងប្រទេសរបស់ខ្លួន ប៉ុន្តែផ្ទុយទៅវិញ សកម្មភាពនេះត្រូវបានមហាជនមួយចំនួនរិះគន់ថា លោក Anwar Ibrahim កំពុងប្រើប្រាស់ទីភ្នាក់ងារប្រឆាំងអំពើពុករលួយរបស់ប្រទេស ដើម្បីកំណត់គោលដៅវាយប្រហារគូប្រជែងនយោបាយរបស់គាត់ ។

បន្ទាប់ពីត្រូវបានចោទប្រកាន់ លោក Daim Zainuddi បាននិយាយនៅក្នុងសន្និសីទសារព័ត៌មានថា រដ្ឋបាលម៉ាឡេស៊ីបច្ចុប្បន្ន កំពុងបំពានអំណាចរបស់ខ្លួន ដោយមិនគោរពកិច្ចសន្យាទាំងអស់នៃកំណែទម្រង់ ។

លោក Daim Zainuddi ​បាន​និយាយយ៉ាងដូច្នេះ​ថា​៖ «​ខ្ញុំ​មិន​ខ្វល់​អំពីជោគវាសនារបស់ខ្ញុំនៅពេលនេះឡើយ សូមលោក Anwar Ibrahim ដាក់បន្ទុកមកលើខ្ញុំចុះ ប៉ុន្តែអ្វីដែលខ្ញុំព្រួយបារម្ភនោះ គឺជោគវាសនាប្រទេសជាតិរបស់ខ្ញុំ » ៕

ដោយ៖ ប៉ោ កុសល