រុស្ស៊ី-ចិន រួមដៃគ្នា ប្រឆាំងអាវុធជីវសាស្រ្តអាមេរិក

តាមសេចក្តីរាយការណ៍របស់ RT កាលពីថ្ងៃព្រហស្បតិ៍ទី១ខែកុម្ភៈ, រដ្ឋាភិបាលរុស្ស៊ីនិងចិន បានបើកកិច្ចប្រជុំអន្តរភ្នាក់ងារក្នុងទីក្រុងប៉េកាំង ដើម្បីចែករំលែកការវាយតម្លៃជារួមអំពីកង្វល់សន្តិសុខជីវសាស្រ្ត និងដោះស្រាយការគំរាមកំហែងសន្តិសុខ ដែលបង្កឡើងដោយអាវុធជីវសាស្ត្រ ជាពិសេសពីសំណាក់យោធាអាមេរិកតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចប្រជុំនោះ ទីក្រុងមូស្គូនិងប៉េកាំង បានឯកភាពរួមដៃគ្នា ពង្រឹងអនុសញ្ញាអាវុធជីវសាស្ត្រនិងជាតិពុល (BTWC) ដែលចុះហត្ថលេខាដោយប្រទេសចំនួន១០៩ក្នុងឆ្នាំ១៩៧២ ដើម្បីទប់ស្កាត់ការអភិវឌ្ឍអាវុធកាចសាហាវបែបនេះ។

ក្រសួងការពារជាតិរុស្ស៊ីបាននិយាយក្នុងសេចក្តីថ្លែងការណ៍មួយថា “កិច្ចប្រជុំនេះ បានគូសបញ្ជាក់ពីការរួមកម្លាំងរវាងរុស្ស៊ីនិងចិន ចំពោះសន្តិសុខជីវសាស្រ្ត។ ក្នុងបរិបទនេះ ភាគីទាំងពីរបានបង្ហាញការយកចិត្តទុកដាក់ជាពិសេសចំពោះសកម្មភាពយោធា និងអាវុធជីវសាស្រ្តរបស់សហរដ្ឋអាមេរិក”។

កាលពីខែធ្នូឆ្នាំ២០២៣ រុស្ស៊ី ចិននិងប្រទេសចំនួន១៤ផ្សេងទៀត ក៏បានចេញសេចក្តីថ្លែងការណ៍រួមផងដែរ ដោយអំពាវនាវឲ្យ អង្គការសហប្រជាជាតិ ពង្រឹងគោលការណ៍ចំពោះអាវុធជីវសាស្ត្រ និងគីមី។

សេចក្តីថ្លែងការណ៍នោះអះអាងថា “ការប្រើប្រាស់អាវុធបែបនេះ នឹងធ្វើឲ្យខូចសតិសម្បជញ្ញៈរបស់មនុស្សជាតិ, យើងសូមថ្កោលទោសរាល់ការប្រើប្រាស់សារធាតុគីមីពុល ភ្នាក់ងារជីវសាស្រ្ត ឬជាតិពុលជាអាវុធដោយនរណាម្នាក់ នៅគ្រប់ទីកន្លែង ពេលវេលា ហើយអ្នកណាដែលប្រើប្រាស់អាវុធបែបនេះ ត្រូវទទួលខុសត្រូវចំពោះមុខច្បាប់”។

លើសពីនេះ ទីក្រុងមូស្គូនិងប៉េកាំង ក៏បានជំរុញម្តងហើយម្តងទៀតផងដែរ ឲ្យមានតម្លាភាពកាន់តែខ្លាំងពីសហរដ្ឋអាមេរិក និងសម្ព័ន្ធមិត្តរបស់ខ្លួន ទាក់ទងនឹងសកម្មភាពជីវសាស្ត្រយោធារបស់ពួកគេ។

ពាក់ព័ន្ធបញ្ហានេះ សហរដ្ឋ​អាមេរិកនិង​សម្ព័ន្ធមិត្ត​របស់​អង្គការ​អូតង់ ​បាន​វេតូ​លើ​សេចក្តី​សម្រេច​របស់ UN កាល​ពី​ឆ្នាំ​មុន ដែល​អំពាវនាវ​ឲ្យ​មាន​ការ​ស៊ើបអង្កេត​លើ​មន្ទីរពិសោធន៍​របស់ទី​ក្រុង​វ៉ាស៊ីនតោន​នៅ​ប្រទេស​អ៊ុយក្រែន។

កាលពីខែវិច្ឆិកាឆ្នាំ២០២៣​ ក្រសួងការពារជាតិរុស្ស៊ីអះអាងថា គម្រោងអាវុធជីវសាស្ត្រអាមេរិកមួយចំនួន បានបង្វែទៅទ្វីបអាហ្រ្វិកវិញ ចំពេលមានជម្លោះក្នុងប្រទេសអ៊ុយក្រែន។ ក្រសួងថែមទាំងចោទប្រកាន់ទីក្រុងវ៉ាស៊ីនតោនថា យកពលរដ្ឋនីហ្សេរីយ៉ាទៅពិសោធន៍ជីវសាស្រ្ត ក្រោមលេសព្យាបាលជំងឺទៀតផង៕

អត្ថបទ៖ សុខ សុវណ្ណ

ចុចអាន៖ រុស្ស៊ីកំពុងតាមដានជនជាតិអាមេរិក ១០នាក់ ពាក់ព័ន្ធការបង្កើតអាវុធជីវសាស្ត្រ នៅអ៊ុយក្រែន