ព័ត៌មានអន្ដរជាតិ

ក្រុងបាងកក ដាក់ចេញវិធានការការពារអគ្គិភ័យ ៣ ចំណុចដល់កូនចៅ ចិន ថ្ងៃសែន

បានផុស

២ years មុន

នៅ

ថ្ងៃសុក្រ ៩ កុម្ភៈ ២០២៤

ដោយ

រដ្ឋបាលក្រុងបាងកក (BMA) កាលពីថ្ងៃព្រហស្បតិ៍បានប្រកាសចេញវិធានការចំនួន ៣ ចំណុចក្នុងគោលបំណងកាត់បន្ថយអគ្គិភ័យឆាបឆេះ ក្នុងអំឡុងពិធីបុណ្យចូលឆ្នាំថ្មីប្រពៃណី ចិន-វៀតណាម ឆ្នាំ២០២៤ នេះ ។ នេះបើយោងតាមការចេញផ្សាយដោយសារព័ត៌មាន The Nation កាលពីថ្ងៃទី៨ ខែកុម្ភៈកន្លងទៅ ។

នៅក្នុងសេចក្ដីប្រកាសដែលត្រូវបានចុះហត្ថលេខាដោយលោកអភិបាលក្រុងបាងកក Chadchart Sittipunt និងប្រកាសនៅលើគេហទំព័រ BMA បានអំពាវនាវដល់កូនចៅចិន កាត់បន្ថយការអុជផាវ និងដុតក្រដាសសែនជូនដូនតារបស់ពួកគេ ព្រោះខ្លាចថា ទំនៀមទម្លាប់នេះនឹងធ្វើឲ្យមានការបំពុលខ្យល់ PM2.5 កាន់តែអាក្រក់ទៅៗ ខណៈសកម្មភាពនេះទៀតសោតក៏អាចបង្កឲ្យមានអគ្គិភ័យផងដែរ ដោយសារតែបច្ចុប្បន្នប្រទេសកំពុងជួបបញ្ហាខ្យល់ស្ងួត និងក្ដៅខ្លាំង ។

នៅក្នុងវិធានការដំបូង BMA នឹងបង្កើតចំណុចត្រួតពិនិត្យនៅក្នុងតំបន់គ្រោះថ្នាក់ទាំងអស់របស់ទីក្រុងបាងកក ជាពិសេសនៅក្នុងសហគមន៍ ដើម្បីឃ្លាំមើល និងការពារកុំឲ្យមានភ្លើងឆេះគ្រប់ពេលវេលាទាំងអស់ ខណៈកន្លែងហានិភ័យផ្សេងទៀតរួមមានទីសក្ការៈបូជាចិន ឬតំបន់ដែលប្រារព្ធពិធី ខណៈអាជ្ញាធរក៏ប្រាប់ដល់ពលរដ្ឋផងដែរអំពីការប្រើប្រាស់បំពង់ពន្លត់អគ្គិភ័យក្នុងករណីចាំបាច់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងវិធានការទី ២ BMA បានអំពាវនាវដល់ទីសក្ការៈបូជាចិន និងកូនចៅចិនឲ្យប្រើប្រាស់ធូបទៀនអគ្គិសនី និងកាត់បន្ថយការដុតក្រដាស ។ ក្នុងករណីដែលមិនអាចចៀសបាន ត្រូវធ្វើក្នុងធុងការពារភ្លើង ឬឡដុត ហើយមន្ត្រីត្រូវឈរយាមរហូតដល់ភ្លើងឆេះអស់ ។

ចំណែកវិធានការទី ៣ BMA បានអំពាវនាវដល់អាជីវកម្មដែលបិទទ្វារក្នុងឱកាសបុណ្យចូលឆ្នាំចិន ឲ្យដកឌុយភ្លើងទាំងអស់ចេញ ហើយពិនិត្យមើលថា ខ្សែភ្លើង និងសំឡេងរោទិ៍ប្រកាសអាសន្នដំណើរការស្រួលបួលឬអត់ ជាពិសេសក្បាលធុងហ្គាសដាំស្លទាំងអស់ក៏ត្រូវតែបិទផងដែរ ៕