ព័ត៌មានអន្ដរជាតិ

យោធា មីយ៉ាន់ម៉ា លេងធម៌ក្ដៅវិញ បំផ្ទុះផ្ដាច់ស្ពានសំខាន់ៗរបស់ក្រុមទ័ពព្រៃ

បានផុស

១ year មុន

នៅ

ថ្ងៃព្រហស្បតិ៍ ១៥ កុម្ភៈ ២០២៤

ដោយ

កងទ័ពរដ្ឋាភិបាលយោធាមីយ៉ាន់ម៉ាបានបំផ្ទុះផ្ដាច់ស្ពានសំខាន់ៗចំនួន ២ ដែលជាផ្លូវនាំទៅដល់ទីក្រុង Sittwe របស់រដ្ឋរ៉ាក់ឃីន ជាទីដែលកងទ័ពអារ៉ាកាន់ (AA) កំពុងបង្កើនការបាញ់បោះដើម្បីដណ្ដើមយកទីក្រុងជាច្រើនផ្សេងទៀតនៅក្នុងរដ្ឋភាគខាងលិចមួយនេះ ។ នេះបើយោងតាមការចេញផ្សាយដោយសារព័ត៌មាន The Irrawaddy កាលពីដើមសប្ដាហ៍កន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីអ្នករស់នៅក្រុង Sittwe បានបញ្ជាក់ឲ្យដឹងថា យោធាបានប្រើគ្រាប់បែកកម្ទេចស្ពាន Kisapanadi លើទន្លេ Kaladan ក្នុងសង្កាត់ Kyauktaw និងស្ពាន Min Chaung នៅច្រកចូលទីក្រុង Sittwe កាលពីវេលាម៉ោងប្រហែល ៨ យប់ថ្ងៃចន្ទ ខណៈស្ពានទាំងនេះ គឺជាផ្លូវដឹកជញ្ជូនដ៏សំខាន់របស់កងទ័ពអារ៉ាកាន់ក្នុងការចេញចូលទៅកាន់រដ្ឋរ៉ាក់ឃីន ។

ទោះយ៉ាងណា ក៏មានកម្លាំងទ័ពរបស់រដ្ឋាភិបាលយោធាមីយ៉ាន់ម៉ាយ៉ាងហោចណាស់ ៧ នាក់ត្រូវបានសម្លាប់ផងដែរនៅក្នុងការបាញ់បោះដាក់គ្នានៅជិតភូមិ Aung Thabyay ក្នុងទីក្រុង Maungdaw ជាប់ព្រំដែនជាមួយប្រទេសបង់ក្លាដែស ខណៈជាបន្តបន្ទាប់យោធាក៏បើកការវាយប្រហារតាមផ្លូវអាកាស ផ្លូវទឹក និងការបាញ់កាំភ្លើងធំទៅកាន់កងទ័ពអារ៉ាកាន់ដូចគ្នា ។

ជាក់ស្ដែង កប៉ាល់កងទ័ពជើងទឹករបស់រដ្ឋាភិបាលយោធាមីយ៉ាន់ម៉ាដែលចូលចតនៅទន្លេ Ka Lain Taung បានបាញ់កាំភ្លើងធំចំនួន ៧ គ្រាប់ចូលទៅក្នុងទីប្រជុំជន Ramree និងភូមិជុំវិញនោះ ហើយយោធាក៏បានដាក់ពង្រាយកម្លាំងទ័ពជើងទឹកនៅតាមដងទន្លេ Minbya ផងដែរ ក្រោយពេលដែលកងទ័ពអារ៉ាកាន់វាយដណ្តើមកាន់កាប់ទីប្រជុំជនដែលស្ថិតនៅភាគខាងលិចនៃទីក្រុង Sittwe ។

ប្រទេសមីយ៉ាន់ម៉ាបានស្ថិតក្នុងភាពចលាចល ចាប់តាំងពីយោធាឡើងកាន់អំណាចនៅក្នុងរដ្ឋប្រហារកាលពីថ្ងៃទី១ ខែកុម្ភៈ ឆ្នាំ២០២១ ដោយបានបិទបញ្ចប់ការគ្រប់គ្រងតាមបែបប្រជាធិបតេយ្យក្នុងរយៈពេល ១០ ឆ្នាំ ដោយបង្កឲ្យមានការតវ៉ាទ្រង់ទ្រាយធំ ហើយយោធាក៏បានបើកការបង្ក្រាបលើក្រុមអ្នកប្រឆាំងផងដែរ ។

ទន្ទឹមនោះ រយៈពេល ៣ ឆ្នាំមកនេះ រដ្ឋាភិបាលយោធាក៏កំពុងខ្នះខ្នែងដើម្បីកម្ទេចសម្ព័ន្ធក្រុមប្រដាប់អាវុធជនជាតិភាគតិចនៅភាគខាងជើង និងភាគខាងត្បូង ប៉ុន្តែហាក់ដូចជាមិនគាប់ដូចបំណងឡើយ ស្របពេលដែលថ្មីៗនេះតំបន់ភាគច្រើនរបស់ប្រទេសក៏ធ្លាក់ចូលកណ្ដាប់ដៃរបស់ក្រុមឧទ្ទាមទ័ពព្រៃទៅទៀត ៕