អ៊ីស្រាអែល ដាក់ឱសានវាទ សម្រុកចូលវាយលុកទីក្រុង Rafah 

តាមសេចក្តីរាយការណ៍របស់ Reuters នៅថ្ងៃចន្ទទី១៩ខែកុម្ភៈ, សមាជិកខុទ្ទកាល័យសង្រ្គាមអ៊ីស្រាអែលលោក Benny Gantz បានព្រមានថា បើក្រុមហាម៉ាស មិនដោះលែងចំណាប់ខ្មាំងទាំងអស់ត្រឹមថ្ងៃទី១០ខែមីនាទេនោះ ការវាយលុកនៅទីក្រុង Rafah នឹងចាប់ផ្តើមហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះ ត្រូវបានគេមើលឃើញថាជាលើកដំបូងហើយ ដែលអ៊ីស្រាអែលបញ្ជាក់ច្បាស់ៗ ពីពេលវេលាដែលកងទ័ពរបស់ខ្លួន នឹងសម្រុកចូលទៅក្នុងទីក្រុងមានមនុស្សរស់នៅច្រើន នាភាគខាងត្បូងជ្រោយហ្គាហ្សា។

លោក Gantz ដែលធ្លាប់កាន់តំណែងជារដ្ឋមន្ត្រីការពារជាតិ បាននិយាយថា “ពិភពលោកត្រូវតែដឹង ហើយមេដឹកនាំក្រុមហាម៉ាសក៏ត្រូវតែដឹងដែរ ប្រសិនបើដល់ថ្ងៃបុណ្យរ៉ាម៉ាឌន ចំណាប់ខ្មាំងរបស់យើងមិននៅផ្ទះទេនោះ ការប្រយុទ្ធនឹងបន្តគ្រប់ទីកន្លែង រួមទាំង Rafah ដែរ។ អ៊ីស្រាអែលនឹងធ្វើសកម្មភាពតាមដំណាក់កាល ដោយជួយសម្រួលដល់ការជម្លៀសជនស៊ីវិល ហើយបើកកិច្ចសន្ទនាជាមួយដៃគូអាមេរិកនិងអេហ្ស៊ីប ដើម្បីកាត់បន្ថយចំនួនជនស៊ីវិលដែលបាត់បង់ជីវិត”។

ទោះបីជាយ៉ាងណាក៏ដោយ មានការប្រឆាំងជាសកលចំពោះប្រតិបត្តិការនៅ Rafah ព្រោះថា ទីនោះមានប្រជាជនប៉ាឡេស្ទីនប្រហែល ១.៥លាននាក់កំពុងស្នាក់អាស្រ័យ ប៉ុន្តែនាយករដ្ឋមន្ត្រីអ៊ីស្រាអែល លោក Benjamin Netanyahu បានប្តេជ្ញាហើយប្តេជ្ញាទៀតថា នឹងបើកការវាយប្រហារជើងគោកនៅ Rafah ដើម្បីកម្ចាត់ខ្មាន់កាំភ្លើងក្រុមហាម៉ាស ឲ្យខ្ទេច។

ខណៈនៅសល់ពេលប៉ុន្មានសប្តាហ៍ទៀត មុនពេលពិធីបុណ្យរ៉ាម៉ាឌនចូលមកដល់, របាយការណ៍ពីទីក្រុង Rafah បានឲ្យដឹងថា មានមនុស្សជាច្រើននាក់កំពុងព្យាយាមចាកចេញ ដោយធ្វើដំណើរឆ្ពោះទៅទិសខាងលិចសំដៅឆ្នេរសមុទ្រ ប៉ុន្តែមនុស្សមួយភាគទៀតនៅកំពុងរង់ចាំមួយកន្លែង ព្រោះពួកគេមិនដឹងថាត្រូវធ្វើអ្វីជាបន្ត។

មុននេះ ទីភ្នាក់ងារសុខភាពសាធារណៈ របស់អង្គការសហប្រជាជាតិបានបញ្ជាក់ថា មន្ទីរពេទ្យដ៏សំខាន់មួយនៅហ្គាហ្សា គឺឈប់ដំណើរការទាំងស្រុងហើយ ក្រោយការវាយឆ្មក់របស់អ៊ីស្រាអែល។

យ៉ាងណា អង្គការសុខភាពពិភពលោក (WHO) ថា ខ្លួនមិនត្រូវបានគេអនុញ្ញាតឲ្យចូលមន្ទីរពេទ្យ Nasser នៅ Khan Yunis ភាគខាងជើងទីក្រុង Rafah ដើម្បីវាយតម្លៃស្ថានភាពឡើយ។

សូមបញ្ជាក់ជាថ្មី ក្រុមហាម៉ាស បានចូលលុកលុយប្រទេសអ៊ីស្រាអែល កាលពីថ្ងៃទី៧ខែតុលាឆ្នាំ២០២៣ ដោយសម្លាប់មនុស្សប្រហែល១២០០នាក់ និងជាង២៤០នាក់ ទៀត ត្រូវចាប់ជាចំណាប់ខ្មាំង។ ក្រោយមក អ៊ីស្រាអែល ក៏បើកយុទ្ធនាការសងសឹកនៅហ្គាហ្សាវិញ ដោយសម្លាប់មនុស្សចំនួន ២៨៦៦៣នាក់ ខណៈ៦៨៣៩៥នាក់ផ្សេងទៀត រងរបួស៕

អត្ថបទ៖ សុខ សុវណ្ណ

ចុចអាន៖ លោក Netanyahu៖ ការទទួលស្គាល់រដ្ឋប៉ាឡេស្ទីន គឺដូចផ្តល់រង្វាន់ធំ ឲ្យភេរវករ