រកឃើញមនុស្សស្លាប់ជាបន្តបន្ទាប់ ក្នុងគ្រោះអគ្គិភ័យដ៏សាហាវ ឆាបឆេះប្លុកអាផាតមិន នៅអេស្ប៉ាញ

តាមសេចក្តីរាយការណ៍របស់ Reuters នៅថ្ងៃសុក្រទី២៣ខែកុម្ភៈ ក្រុមជួយសង្គ្រោះបានរកឃើញមនុស្សស្លាប់ចំនួន៤នាក់ហើយ ខណៈ១៩នាក់ទៀតកំពុងបាត់ខ្លួន ក្នុងគ្រោះអគ្គិភ័យដ៏ធំ ដែលឆាបឆេះប្លុកអាផាតមិនចំនួនពីរ ក្នុងទីក្រុង Valencia នៃប្រទេសអេស្ប៉ាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយឡែកកាសែត El Pais បានរាយការណ៍ថា ប្លុកនេះមានផ្ទះល្វែងចំនួន១៣៨និងមានមនុស្សរស់នៅចំនួន៤៥០នាក់។

ដំបូងឡើយ អគ្គិភ័យបានលេបត្របាក់អគារកម្ពស់១៤ជាន់ ស្ថិតក្នុងសង្កាត់ Campanar រួចក៏រាលដាលដល់អគារនៅជាប់គ្នានោះ ខណៈអ្នកជំនាញអះអាងថា​ មូលហេតុដែលអគ្គិភ័យឆេះរាលលឿនបែបនេះ គឺដោយសារតែសន្លឹកអាលុយមីញ៉ូមដែលគេបិតលើជញ្ជាំងអគារ ហើយពួកគេកំពុងស៊ើបអង្កេតជាបន្ត។

សាក្សីម្នាក់បានប្រាប់ TVE ថា គាត់បានមើលទៅក្រៅបង្អួច ហើយឃើញអណ្តាតភ្លើងឆាបឆេះយ៉ាងសន្ធោសន្ធៅក្នុងរយៈពេលតែប៉ុន្មាននាទីប៉ុណ្ណោះ។ ខ្ញុំសឹងមិន​ជឿនឹងភ្នែក ចំពោះអ្វីដែលបានកើតឡើង​។ អគារ​ទល់​មុខ​គ្នា​ ត្រូវ​ភ្លើង​ឆេះទាំងស្រុង។

ពាក់ព័ន្ធគ្រោះអគ្គិភ័យដ៏កាចសាហាវនេះ ចៅហ្វាយក្រុង Valencia ក៏បានប្រកាសកាន់ទុក្ខរយៈពេល៣ថ្ងៃផងដែរ។

សូមបញ្ជាក់ថា នេះមិនមែនជាលើកដំបូងទេ ដែលប្រទេសអេស្ប៉ាញជួបអគ្គិភ័យកាចសាហាវបែបនេះ ពោលគឺកាលពីខែតុលាឆ្នាំមុន ភ្លើងឆេះក្លិបរាត្រីនៅតំបន់ Murcia បានឆក់យកជីវិតមនុស្សចំនួន១៣នាក់ ក្នុងអ្វីដែលត្រូវបានគេដឹងថាជា អគ្គិភ័យឆេះក្លិបរាត្រីសម្លាប់មនុស្សច្រើនបំផុតនៅអេស្ប៉ាញ នារយៈពេល៣ទសវត្សរ៍ចុងក្រោយ។

កាលនោះ មនុស្សចំនួន៦នាក់ រងការចោទប្រកាន់ ហើយអាចប្រឈមមុខ ជាប់ពន្ធនាគាររហូតដល់៩ឆ្នាំ ប្រសិនបើការស្លាប់ត្រូវបានរកឃើញថា បណ្តាលមកពីការធ្វេសប្រហែស៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ អំឡុងពេលចូលឆ្នាំចិន មានអគ្គិភ័យកើតឡើង ១៣ករណី