អាមេរិកនៅតែព្យាយាមដាក់សម្ពាធផ្នែកពាណិជ្ជកម្មបច្ចេកវិទ្យាលើប្រទេសចិន ពិសេសក្រុមហ៊ុន Huawei

ក្រសួងពាណិជ្ជកម្មអាមេរិកបានផ្អាកអាជ្ញាប័ណ្ណលក់គ្រឿងបន្លាស់ទៅឱ្យក្រុមហ៊ុន SMIC ដែលជាក្រុមហ៊ុនផលិតបន្ទះឈីបដ៏ធំបំផុតរបស់ប្រទេសចិននៅពីក្រោយភាពជោគជ័យនៃ Huawei Mate 60 Pro 5G ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Huawei Mate 60 Pro 5G គឺជាទូរស័ព្ទម៉ូដែលកំពូលរបស់ក្រុមហ៊ុន Huawei ដែលបានប្រកាសចេញលក់កាលពីថ្ងៃទី២៩ ខែសីហា ឆ្នាំ ២០២៣ ហើយទូរស័ព្ទមួយម៉ូដែលនេះហើយ ដែលបានលើកមុខមាត់ក្រុមហ៊ុនផលិតទូរស័ព្ទដៃរបស់ប្រចិនមួយនេះឡើងវិញ បន្ទាប់ពីស្ងប់ស្ងាត់មួយរយៈពេលធំ។ ហើយក្នុងរយ:ពេល ២សប្ដាហ៍ដំបូងនៃឆ្នាំនេះ តំណែងទីផ្សារទូរស័ព្ទស្មាតហ្វូនចំណាត់ថ្នាក់លេខ១ នៅប្រទេសចិន គឺ Huawei ជាអ្នកគ្រប់គ្រង ។

យោងតាម ប្រភព SCMP ផ្សាយនៅថ្ងៃទី២៤ ខែកុម្ភៈ បានឱ្យដឹងថា រដ្ឋបាលរបស់លោកប្រធានាធិបតី Joe Biden កំពុងបង្កើនសម្ពាធលើក្រុមហ៊ុន SMIC ជាពិសេសចាប់តាំងពីចុងឆ្នាំ ២០២៣ មក ក្រសួងពាណិជ្ជកម្មសហរដ្ឋអាមេរិកបានផ្ញើសំបុត្ររាប់សិបច្បាប់ទៅកាន់អ្នកផ្គត់ផ្គង់គ្រឿងបន្លាស់ក្នុងប្រទេសចិន ដើម្បីប្រកាសពីការផ្អាកអាជ្ញាប័ណ្ណលក់គ្រឿងបន្លាស់ ។ប្រភពបានឱ្យដឹងទៀតថា ទាក់ទងនឹងការព្យាយាមដាក់សម្ពាធពាណិជ្ជកម្មបច្ចេកវិទ្យាពីសំណាក់អាមេរិក មកលើប្រទេសចិននេះផងដែរ ស្ថានទូតចិនប្រចាំនៅអាមេរិក បាននិយាយថា÷ “យើងសូមអំពាវនាវឱ្យភាគីអាមេរិក បញ្ឈប់ការបំផ្លើសគំនិតនៃសន្តិសុខជាតិ និងការរំលោភអំណាច ដើម្បីគាបសង្កត់ក្រុមហ៊ុនចិន”។ នេះគឺជាកិច្ចខិតខំប្រឹងប្រែងចុងក្រោយរបស់សហរដ្ឋអាមេរិកដើម្បីកាត់បន្ថយសមត្ថភាពរបស់ SMIC ក្នុងការផលិតបន្ទះឈីបដ៏ទំនើបសម្រាប់ក្រុមហ៊ុន Huawei ។

សូមជម្រាបជូនថា កន្លងមកបន្ទាប់ពីសហរដ្ឋអាមេរិកប្រកាសមិនអនុញ្ញាតឱ្យក្រុមហ៊ុន Google លក់ប្រព័ន្ធប្រតិបត្តិការ Android ទៅឱ្យក្រុមហ៊ុន Huawei បានបង្កើតឱ្យមានការភ្ញាក់ផ្អើលយ៉ាងខ្លាំងនៅក្នុងពិភពបច្ចេកវិទ្យា ព្រោះនេះគឺជាសកម្មភាពដាក់សម្ពាធយ៉ាងធ្ងន់ធ្ងរទៅលើ Huawei ។ យ៉ាងណាមិញដើម្បីឆ្លើយតប និងការជម្នះ Huawei ក៏បានបង្កើតប្រព័ន្ធប្រតិបត្តិការផ្ទាល់ខ្លួនមួយឈ្មោះ HarmonyOS ជំនួសឱ្យ Android ប៉ុន្តែដោយសារវាមិនអាចដំណើររាល់សេវាកម្មរបស់ Google ដូច្នេះហើយ ទើបការលក់ផលិតផលស្មាតហ្វូនរបស់ក្រុមហ៊ុនចិនមួយនេះធ្លាក់ចុះយ៉ាងខ្លាំង ។

កាលពីថ្ងៃទី២៩ ខែសីហា ឆ្នាំ ២០២៣ Huawei បានប្រកាសចេញស្មាតហ្វូនម៉ូដែលកំពូលរបស់ខ្លួនមួយស៊េរី គឺ Huawei Mate 60 Pro 5G ដែលជាទូរស័ព្ទដៃដំបូងរបស់ខ្លួន ប្រើប្រាស់បន្ទះឈីប Kirin 9000S ផលិតដោយក្រុមហ៊ុន SMIC ។ ពេលនោះ Kirin 9000S បានធ្វើឱ្យ Huawei រស់ឡើងវិញម្ដងទៀត រហូតដល់ធ្វើឱ្យ Huawei Mate 60 Pro 5G ក្លាយជាស្មាតហ្វូនក្ដោបទីផ្សារខ្លាំងបំផុតចំណាត់ថ្នាក់លេខ១ នៅប្រទេសចិន ក្នុងរយ:ពេល ២សប្ដាហ៍ដំបូង នៃឆ្នាំ ២០២៤ ៕

ប្រែសម្រួលដោយ÷ ប៉ោ កុសល