អ្នកទោស៤០០០នាក់ ហែកគុក នៅប្រទេសហៃទី

ប្រភពមួយបានប្រាប់ BBC នៅថ្ងៃចន្ទទី៤ខែមីនាថា អ្នកទោសប្រមាណ៤០០០នាក់ បានហែកគុក បន្ទាប់ពីមានក្រុមបងធំប្រដាប់អាវុធ សម្រុកចូលពន្ធនាគារធំក្នុងរដ្ឋធានី Port-au-Prince នៃប្រទេសហៃទី ដើម្បីជួយពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពខាងលើ, ក្នុង​ចំណោម​អ្នក​ជាប់ឃុំទីនោះ​ ក៏មាន​សមាជិក​ក្រុមបងធំ​ដែល​ត្រូវ​បាន​ចោទ​ប្រកាន់​ពាក់ព័ន្ធ​​ការ​សម្លាប់​ប្រធានាធិបតី Jovenel Moïse កាលពីឆ្នាំ២០២១ដែរ។

ប៉ុន្មានឆ្នាំចុងក្រោយនេះ អំពើហិង្សានៅប្រទេសហៃទី កាន់តែធ្ងន់ធ្ងរឡើងៗ ព្រោះថាក្រុមបងធំ​ដែល​មាន​បំណង​បណ្តេញ​នាយករដ្ឋមន្ត្រី Ariel Henry គឺបានគ្រប់គ្រងសឹងតែ៨០% ទៅហើយនៃរដ្ឋធានី Port-au-Prince ហើយអំពើហិង្សាចុងក្រោយនេះ បានចាប់ផ្តើមកាលពីថ្ងៃព្រហស្បតិ៍សប្តាហ៍មុន នៅពេលនាយករដ្ឋមន្ត្រី ធ្វើដំណើរទៅកាន់ទីក្រុងណៃរ៉ូប៊ី ដើម្បីពិភាក្សាអំពីការបញ្ជូនកងកម្លាំងសន្តិសុខពហុជាតិសាសន៍ដឹកនាំដោយកេនយ៉ា ទៅកាន់ប្រទេសហៃទី។

លោក Jimmy Chérizier មេក្រុមរហស្សនាម Barbecue បានប្រកាសពីការវាយប្រហារបណ្តេញនាយករដ្ឋមន្ត្រី ហើយ ក៏មានការ​បាញ់​ប្រហារ​មួយ​ ​បណ្តាលឲ្យ​ប៉ូលិស​៤​នាក់​ស្លាប់ និង​៥​នាក់​រង​របួស។ ក្រោយមក សហជីពប៉ូលិសរបស់ប្រទេសហៃទី បានស្នើឲ្យកងទ័ពជួយពង្រឹងសន្តិសុខនៅពន្ធនាគារ ប៉ុន្តែទីបំផុត ទីនោះនៅតែត្រូវបានវាយលុកកាលពីល្ងាចថ្ងៃសៅរ៍ រួចរំដោះបានអ្នកទោស៤០០០នាក់ដែរ។

អំពើ​ហិង្សា​ហាក់កើនឡើងហួសពីការគ្រប់គ្រង ចាប់តាំងពី​លោកប្រធានាធិបតី Moise ត្រូវគេធ្វើឃាត ហើយមកទល់ពេលនេះ ​ប្រទេសហៃទី មិនទាន់រកអ្នក​ជំនួសតំណែងគាត់បាន​ឡើយ រីឯ​ការ​បោះឆ្នោត ​ក៏​មិន​បាន​ធ្វើ​ឡើងដែរ​តាំង​ពី​ឆ្នាំ២០១៦មក។

នៅក្រោមកិច្ចព្រមព្រៀងនយោបាយមួយ ការបោះឆ្នោតនឹងត្រូវរៀបចំឡើង ហើយលោក Henry នឹងត្រូវចុះចេញនៅថ្ងៃទី៧ខែកុម្ភៈ ប៉ុន្តែរឿងនោះមិនបានកើតឡើងទេ។

តាមរបាយការណ៍របស់អង្គការសហប្រជាជាតិ, មនុស្សជាង៨៤០០នាក់ បានក្លាយជាជនរងគ្រោះនៃអំពើហិង្សារបស់ក្រុមបងធំកាលពីឆ្នាំមុនដូចជាការសម្លាប់និងចាប់ពង្រត់ជាដើម ពោលគឺច្រើនជាងឆ្នាំ២០២២ ដល់ទៅទ្វេដងឯណោះ៕

អត្ថបទ៖ សុខ សុវណ្ណ

ចុចអាន៖ UN សម្រេចឲ្យបញ្ជូនទ័ពទៅ ហៃទី ដើម្បីកម្ចាត់ក្រុមបងធំ