មនុស្សរាប់រយនាក់ទៅផ្នូរមេបក្សប្រឆាំង រុស្ស៊ី មិនខ្លាចការព្រមានចាប់ខ្លួន

មនុស្ស​រាប់​រយ​នាក់​បាន​នាំ​គ្នា​ទៅ​កាន់ផ្នូររបស់លោក Alexey Navalny អតីត​មេបក្ស​ប្រឆាំង​រុស្ស៊ី និងដាក់ផ្កានៅទីបញ្ចុះសពតំបន់ Borisovsky ក្នុងទីក្រុងមូស្គូ បើទោះបីជាមានការគំរាមចាប់ខ្លូនក៏ដោយ ។ នេះបើយោងតាមការចេញផ្សាយរបស់សារពត៌មាន CNN នៅថ្ងៃទី​៤ ខែមីនានេះ ។

ទោះជាយ៉ាងណា អ្នកកាន់ទុក្ខរាប់ពាន់នាក់បានប្រឆាំងនឹងការគំរាមចាប់ខ្លួននេះ និងបានប្រមូលផ្តុំគ្នាសម្រាប់ពិធីបុណ្យសពរបស់លោក Navalny តាំងតែពីថ្ងៃសុក្រ ពោល ២ សប្តាហ៍ បន្ទាប់ពីគាត់បានទទួលមរណភាពក្នុងអាយុ ៤៧ ឆ្នាំ ។

ចាប់តាំងពីថ្ងៃបុណ្យសពរបស់លោក Navalny មក យ៉ាងហោចណាស់មានមនុស្ស ១០៣ នាក់ត្រូវបានចាប់ឃុំខ្លួននៅទូទាំងទីក្រុងចំនួន ២០ ក្នុងប្រទេសរុស្ស៊ី ស្របពេលដែលក៏មានការយាមកាមយ៉ាងតឹងរ៉ឹងផងដែរនៅកន្លែងបញ្ចុះសព ដែលធ្វើឲ្យអ្នកខ្លះបានលាក់ផ្កានៅក្រោមអាវធំរបស់ពួកគេដោយខ្លាចមានការចាប់ខ្លួននៅតាមផ្លូវ ។

បើទោះបីមានការគំរាមកំហែងពីការចាប់ខ្លួនក៏ដោយ ក៏មិនបានបញ្ឈប់មនុស្សមិនឲ្យមកដើម្បីនិយាយពាក្យលាទៅកាន់លោក Navalny បាននោះទេ ហើយអ្នកខ្លះទៀតបានស្រែកពាក្យស្លោកប្រឆាំងលោក ពូទីន ថែមទៀតផង ។

សូមរំលឹកថា លោក Navalny បានត្រលប់ទៅប្រទេសរុស្ស៊ីវិញនៅឆ្នាំ ២០២១ បន្ទាប់ពីចំណាយពេលជាច្រើនខែដើម្បីព្យាបាលនៅប្រទេសអាល្លឺម៉ង់ ដោយសារការបំពុល ។ ទោះយ៉ាងណា លោក​ត្រូវ​បាន​ចាប់​ខ្លួន​ភ្លាមៗ​នៅ​ពេល​​មក​ដល់រុស្ស៊ីវិញ ហើយ​បាន​ចំណាយ​ពេល​អស់​មួយ​ជីវិត​នៅ​ក្នុងការ​ឃុំ​ខ្លួន​ដោយការ​ចោទ​ប្រកាន់ពាក់ព័ន្ធនឹងនយោបាយ ខណៈការស្លាប់របស់អតីតមេដឹកនាំបក្សប្រឆាំងរូបនេះបានបង្កឲ្យមានការថ្កោលទោសពីមេដឹកនាំពិភពលោក ៕

អត្ថបទ ៖ ប៊ុន សុភាព