ព័ត៌មានអន្ដរជាតិ

សមត្ថកិច្ច ថៃ បង្ក្រាបករណីជួញដូរមេជីវិតសម្រាប់ពពោះខុសច្បាប់ចូលមក ឡាវ និងកម្ពុជា

បានផុស

១ year មុន

នៅ

ថ្ងៃពុធ ៦ មីនា ២០២៤

ដោយ

សមត្ថកិច្ចថៃកាលពីពេលថ្មីៗនេះបង្រ្កាបបានករណីបណ្តាញជួញដូរមួយទាក់ទិននឹងការនាំចេញមេជីវិតដើម្បីប្រតិបត្តិការពពោះជំនួសដោយខុសច្បាប់ចូលទៅក្នុងប្រទេសអាស៊ានចំនួន ២ រួមមាន កម្ពុជា និងឡាវ ។ នេះបើតាមការចុះផ្សាយរបស់សារព័ត៌មាន Thai Rath ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងប្រតិបត្តិការបង្រ្កាបខាងលើ កម្លាំងប៉ូលិសនៃនាយកដ្ឋានបង្រ្កាបបទល្មើសព្រហ្មទណ្ឌថៃបានឃាត់ខ្លួនបុរសម្នាក់ឈ្មោះ Theeraphong Chaisuk ជនជាតិថៃ វ័យ ៣៣ ឆ្នាំ កាលពីចុងខែកុម្ភៈកន្លងទៅនៅក្នុងខេត្ត Nonthaburi ។ បុរសជនសង្ស័យនេះ គឺជាមេខ្យល់សំខាន់ដែលពាក់ព័ន្ធករណីជួញដូរដឹកជញ្ជូនមេជីវិតឆ្លងដែនទៅកាន់ប្រទេសឡាវ និងកម្ពុជា ក្នុងទិសដៅប្រតិបត្តិការបណ្តាញពពោះជំនួសនៅក្នុងប្រទេសទាំងពីរ ។

បើតាមសម្តីអគ្គមេបញ្ជាការនៃនាយកដ្ឋានខាងលើ គឺលោក Montri Theskhan បានលើកឡើងថា សកម្មភាពនាំចេញមេជីវិតខុសច្បាប់នេះ ភាគច្រើនជាប្រតិបត្តិការជួលស្រ្តីក្នុងប្រទេសដូចជានៅអាស៊ានជាដើម ។ ទិសដៅនេះគឺសម្រាប់ឲ្យទារកដែលកើតចេញពីការពពោះជំនួស ទទួលបានសញ្ជាតិនៅប្រទេសនោះ រួចទទួលផលជាលុយពីសកម្មភាពឧក្រិដ្ឋកម្មផ្សេងៗរួមមាន ការលាងលុយកខ្វក់ជាដើម ហើយពិសេសនោះគឺភាគច្រើនជាជនជាតិចិនរកស៊ីខុសច្បាប់ នៅពីក្រោយករណីនេះ ។

ដោយឡែក សម្រាប់ជនសង្ស័យឈ្មោះ Theeraphong ខាងលើកំពុងត្រូវចោទប្រកាន់ពីការដឹកនាំចេញនូវទំនិញហាមឃាត់សំខាន់ៗមួយចំនួនរួមមាន មេជីវិត (ទឹកកាម) បង្កកច្រកក្នុងដប, ស៊ុតដែលត្រៀមវិវដ្តជាគភ៌ និងទារកក្នុងផ្ទៃដែលត្រៀមផ្សាំឆ្លងដែនចេញទៅ ។

ក្នុងការឃាត់ខ្លួន ជនសង្ស័យសារភាពថា ធ្លាប់បានចាប់ផ្តើមរកស៊ីបែបនេះពីឆ្នាំ ២០១៤ មក ដោយក្នុងការដឹកជញ្ជូនមួយជើងប្រហែល ១០០ ដប ហើយទទួលផលបទល្មើសបានប្រមាណពី ១០,០០០ ទៅ ១៥,០០០ បាតស្មើនឹង ២៧៧ ទៅ៤១៦ ដុល្លារអាមេរិកក្នុងមួយដបៗ ។

ចម្លើយសារភាពរបស់ Theeraphong ដដែលបានឲ្យដឹងបន្ថែមថា ដោយសារនៅប្រទេសថៃមានច្បាប់តឹងតែងក្នុងការប្រតិបត្តិការពពោះជំនួសដូចរូបគេក៏ទទួលរកស៊ីខុសច្បាប់ដឹកជញ្ជូនទៅកាន់ប្រទេសទីបី ពោលគឺប្រទេសជិតខាងនោះ ។

គួររំឭកផងដែរថា ប្រតិបត្តិការស្រាវជ្រាវ និងបង្រ្កាបរបស់កម្លាំងប៉ូលិសជំនាញថៃទៅលើបទល្មើសកន្លងមក បានចាប់ផ្តើមតាំងពីឆ្នាំ ២០១៧ ហើយករណីដំបូងនាឆ្នាំនោះ ប៉ូលិសថៃបង្រ្កាប និងរឹបអូសបាននូវមេជីវិត ដែលគេបង្កកលាក់ក្នុងបំពង់ឧស្ម័នសម្រាប់នាំចេញ ពីចំណុចស្ពានមិត្តភាពថៃ-ឡាវ ពីខេត្ត Nong Khai ភាគខាងជើងថៃ ឆ្ពោះទៅព្រំដែនឡាវ ខណៈសម្រាប់បទពិសោធនេះ កម្លាំងសមត្ថកិច្ចថៃក៏បានអះអាងផងដែរថា នឹងចាត់ចំណាត់ការបង្រ្កាបបោសសម្អាតការរត់ពន្ធខុសច្បាប់ជាបណ្តាញនេះឲ្យអស់ឫសគល់តែម្តង ៕

ដោយ៖ មាន រតនា