រុស្ស៊ី បញ្ជាក់ជាថ្មី នូវលក្ខខណ្ឌបាញ់នុយក្លេអ៊ែរ

អ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់យ៉ាងច្បាស់សាជាថ្មីថា រុស្ស៊ី នឹងបាញ់នុយក្លេអ៊ែរ តែក្នុងលក្ខខណ្ឌដែលប្រទេសនេះ រងការគំរាមកំហែងប៉ុណ្ណោះ ហើយនៅក្នុងគោលលទ្ធិរបស់ទីក្រុងមូស្គូ ការដាក់ពង្រាយបែបនេះត្រូវបានចាត់ទុកថាជា “អាវុធលាគ្នាជាលើកចុងក្រោយ”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងគោលលទ្ធិខាងលើ បានគូសបញ្ជាក់ថា រុស្ស៊ីនឹងបាញ់អាវុធនុយក្លេអ៊ែរសងសឹកវិញ ប្រសិនបើប្រទេសនេះឬសម្ព័ន្ធមិត្តរបស់ខ្លួន ត្រូវគេវាយប្រហារមុន។

ថ្លែងកាលពីថ្ងៃពុធទី៦ខែមីនា លោក Peskov និយាយថា “ប្រសិនបើមានអ្វីមួយគំរាមកំហែងដល់អត្ថិភាពនៃប្រទេសរបស់យើង នោះអាវុធនុយក្លេអ៊ែរនឹងហោះចេញទៅហើយ។ រឿងនេះមិនគួរមើលស្រាលឡើយ។

រម្លឹកទៅថ្ងៃព្រហស្បតិ៍សប្តាហ៍មុន ក្នុងអំឡុងពេលថ្លែងសុន្ទរកថាប្រចាំឆ្នាំទៅកាន់សភាសហព័ន្ធ លោកប្រធានាធិបតីពូទីន បានដាស់តឿនដល់អ្នកចង់ឲ្យរុស្ស៊ីដួល ដោយព្រមានថា “បើអ្នកឯងចង់ឲ្យរុស្ស៊ីបរាជ័យ អ្នកនឹងរងសោកនាដកម្មខ្លាំងជាងរុស្ស៊ីទៅទៀត។ រុស្ស៊ីមានឃ្លាំងអាវុធនុយក្លេអ៊ែរដ៏ធំ ដែលត្រៀមលក្ខណៈជានិច្ចក្នុងការដាក់ពង្រាយ”។

មេដឹកនាំរុស្ស៊ីក៏បានកត់សម្គាល់ផងដែរថា មន្ត្រីលោកខាងលិច ប្រហែលជាមិនទាន់យល់ច្បាស់អំពីរឿងនេះ ទើបចេះតែប្រើវោហាសាស្ត្រកាន់តែគឃ្លើន ចង់បញ្ឆេះសង្រ្គាមនុយក្លេអ៊ែរ។

នេះមិនមែនជារឿងថ្មីឡើយ ពាក់ព័ន្ធការព្រមានបាញ់នុយក្លេអ៊ែររបស់រុស្ស៊ី តួយ៉ាងដូចជាប៉ុន្មានខែមុន អតីតប្រធានាធិបតីរុស្ស៊ីនិងបច្ចុប្បន្នជាអនុប្រធានក្រុមប្រឹក្សាសន្តិសុខជាតិ លោក Dmitry Medvedev បានគំរាមថា បើទីតាំងបាញ់មីស៊ីលរបស់ខ្លួនរងការវាយប្រហារមែននុយក្លេអ៊ែរនឹងហោះទៅអ៊ុយក្រែនភ្លាម មិនខាន។

ក្នុងសារលើឆានែលតេឡេក្រាម លោក Medvedev សរសេរថា “មានអ្នកឈ្លក់វង្វេងនឹងសង្គ្រាមនៅអ៊ុយក្រែន បានឲ្យយោបល់ថា វិធីសាស្រ្តប្រយុទ្ធជាមួយរុស្ស៊ី គឺត្រូវប្រើមីស៊ីលរយៈចម្ងាយឆ្ងាយដែលផ្តល់ដោយលោកខាងលិច យកទៅកម្ទេចទីតាំងបាញ់បង្ហោះមីស៊ីលរបស់ទីក្រុងមូស្គូតែម្តង។ សាកធ្វើអ៊ីចឹងមើល! ផលវិបាកតែមួយគត់គឺ នឹងបង្កឲ្យមានការឆ្លើយតបដោយអាវុធនុយក្លេអ៊ែរ ជាក់ជាមិនខាន”។

លោកបន្តថា “នេះមិនមែនជាសិទ្ធិការពារខ្លួនទេ ប៉ុន្តែជាមូលដ្ឋានផ្ទាល់និងជាក់ស្តែង សម្រាប់យើងក្នុងការប្រើប្រាស់អាវុធនុយក្លេអ៊ែររបស់ខ្លួន ប្រឆាំងនឹងរដ្ឋបែបនេះ។ គោលការណ៍យោធារបស់រុស្ស៊ី អនុញ្ញាតឲ្យខ្លួនបាញ់នុយក្លេអ៊ែរយុទ្ធសាស្ត្រ ទៅលើប្រទេសណា ដែលដាក់ភាពជារដ្ឋរបស់រុស្ស៊ីស្ថិតក្នុងហានិភ័យ សូម្បីតែតាមរយៈការប្រើប្រាស់អាវុធធម្មតាក៏ដោយ”៕

អត្ថបទ៖ សុខ សុវណ្ណ

ចុចអាន៖ លោក Medvedev៖ សាកបាញ់ទីតាំងមីស៊ីលរបស់រុស្ស៊ីមើល នុយក្លេអ៊ែរនឹងហោះទៅអ៊ុយក្រែនភ្លាម!