និស្សិត រុស្ស៊ី ម្នាក់ជាប់ពន្ធនាគារ ១០ ថ្ងៃពីបទដាក់ឈ្មោះ Wi-Fi គាំទ្រ អ៊ុយក្រែន

និស្សិត​រុស្ស៊ី​ម្នាក់ត្រូវ​ជាប់​ពន្ធនាគារ​រយៈពេល ១០ ថ្ងៃ បន្ទាប់ពីប្តូរឈ្មោះ Wi-Fi របស់គាត់ទៅជាពាក្យស្លោកគាំទ្រអ៊ុយក្រែន ។ នេះបើយោងតាមការចេញផ្សាយរបស់សារព័ត៌មាន The Moscow Times កាលពីថ្ងៃទី១០ ខែ​មីនា ។

និស្សិតសាកលវិទ្យាល័យរុស្ស៊ីម្នាក់ត្រូវបានចាប់ខ្លួនកាលពីព្រឹកថ្ងៃពុធនៅទីក្រុងមូស្គូ បន្ទាប់ពីមន្ត្រីប៉ូលិសបានរកឃើញថា Wi-Fi សិស្សនិស្សិតនោះដាក់ឈ្មោះ “Slava Ukraini!” ដែលមានន័យថា “សិរីល្អចូរមានដល់អ៊ុយក្រែន!” ដែលជាពាក្យស្លោកសម្រាប់ស្រែកគាំទ្រអ៊ុយក្រែន ក្នុងអំឡុងពេលនៃការតវ៉ាប្រឆាំងនឹងសង្គ្រាមលុកលុយរបស់រុស្ស៊ីលើអ៊ុយក្រែន ។

ចាប់តាំងពីភ្លើងសង្គ្រាមលុកលុយរបស់រុស្ស៊ីលើអ៊ុយក្រែនផ្ទុះឡើងកាលពីខែកុម្ភៈ ឆ្នាំ២០២២ មក ក្រុមមន្ត្រីរុស្ស៊ីបានចេញការពិន័យដាក់ពន្ធនាគារមនុស្សរាប់ពាន់នាក់ដែលបានរិះគន់ជាសាធារណៈចំពោះប្រតិបត្តិការសឹករបស់រុស្ស៊ី ឬបង្ហាញការគាំទ្រដល់កងកម្លាំងអ៊ុយក្រែនជាដើម ។

យោងតាមអង្គការលើកលែងទោសអន្តរជាតិបានឲ្យដឹងថា កាលពីឆ្នាំ ២០២៣ កន្លងទៅ មានមនុស្សជាង ២១,០០០ នាក់ ត្រូវបានកំណត់គោលដៅដោយច្បាប់គាបសង្កត់របស់រុស្ស៊ីដែលប្រើដើម្បីបង្ក្រាបសកម្មជនប្រឆាំងសង្គ្រាម រួមទាំងការកាត់ទោសដាក់ពន្ធនាគារ និងការផាកពិន័យយ៉ាងធ្ងន់ធ្ងរ ដើម្បីបំបិទមាត់អ្នករិះគន់ចំពោះសង្គ្រាមទាំងនោះ ។

គួរបញ្ជាក់ថា និស្សិតរូបនេះគឺជាមនុស្សចុងក្រោយគេហើយស្ថិតក្នុងបញ្ជីដែលត្រូវបានដាក់ទណ្ឌកម្មចំពោះការបញ្ចេញមតិអំពីសង្គ្រាមរបស់រុស្ស៊ីលើអ៊ុយក្រែន ខណៈកាលពីខែមុន មនុស្សរាប់រយនាក់ត្រូវបានឃុំខ្លួនដោយគ្រាន់តែដាក់កម្រងផ្កាក្នុងការរំលឹកដល់មេដឹកនាំប្រឆាំងលោក Alexei Navalny ដែលបានស្លាប់នៅក្នុងពន្ធនាគារ Arctic Circle ៕

អត្ថបទ ៖ ប៊ុន សុភាព