ព័ត៌មានអន្ដរជាតិ

ប្រទេសឥស្លាមប្រកាសចាប់ផ្ដើមបុណ្យរ៉ាម៉ាដានទាំងស្ថិតក្នុងភាពសោកសៅនៃភ្លើងសង្គ្រាម

បានផុស

១ year មុន

នៅ

ថ្ងៃចន្ទ ១១ មីនា ២០២៤

ដោយ

មន្ត្រីអារ៉ាប៊ីសាអូឌីតបានប្រកាសពីការចាប់ផ្ដើមខែដ៏វិសុទ្ធនៃបុណ្យរ៉ាម៉ាដានសម្រាប់ប្រជាជនម៉ូស្លីម ១.៨ ពាន់លាននាក់នៅលើពិភពលោក ។ នេះបើយោងតាមការចេញផ្សាយរបស់សារពត៌មាន Al Jazeera នៅថ្ងៃទី១១ ខែមីនានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទូរទស្សន៍រដ្ឋអារ៉ាប៊ីសាអូឌីតបានរាយការណ៍ថា ក្រុមមន្ត្រីបានមើលឃើញព្រះចន្ទកាលពីយប់ថ្ងៃអាទិត្យ ទើបប្រកាសយកថ្ងៃចន្ទនេះជាថ្ងៃដំបូងនៃបុណ្យតមអាហាររ៉ាម៉ាដាន ។ ខែនេះមានប្រជាជនមូស្លីម តមអាហារ និងទឹក ចាប់ពីថ្ងៃរះដល់ថ្ងៃលិចដើម្បីបង្ហាញពីជំនឿរបស់ពួកគេ និងរៀបចំការជួបជុំគ្រួសារ ដោយបុណ្យនេះគឺធ្វើតាមប្រតិទិនតាមចន្ទគតិ ហើយក្បួនមើលព្រះចន្ទ មានភាពខុសប្លែកគ្នាទៅតាមប្រទេសនានា មានន័យថា ប្រទេសមួយចំនួនប្រកាសការចាប់ផ្តើមមុន ឬក្រោយ ។

យ៉ាងណាមិញ ប្រទេសអាស៊ីប៉ាស៊ីហ្វិកមួយចំនួនដូចជា អូស្ត្រាលី ព្រុយណេ ឥណ្ឌូណេស៊ី ម៉ាឡេស៊ី និងសិង្ហបុរី បាននិយាយថា ពួកគេនឹងចាប់ផ្តើមបុណ្យរ៉ាម៉ាដាននៅថ្ងៃអង្គារ បន្ទាប់ពីខកខានមិនបានឃើញព្រះចន្ទ ។

ក្នុងអំឡុងខែនេះ ប្រជាជនមូស្លីមព្យាយាមបញ្ចៀសជម្លោះ ហើយផ្តោតលើសកម្មភាពសប្បុរសធម៌ ។ ទោះជាយ៉ាងណាក៏ដោយ សង្រ្គាមរបស់អ៊ីស្រាអែលនៅលើតំបន់ហ្គាហ្សាដែលមានជនមូស្លីមជាច្រើនកំពុងរស់នៅទាំងរងទុក្ខវេទនា ស្របពេលដែលក៏កំពុងមានគ្រោះទុរ្ភិក្សថែមទៀត ។

គួរបញ្ជាក់ថា ប្រជាជនជាច្រើននៅតំបន់ហ្គាហ្សាកំពុងដាក់ក្ដីសង្ឃឹមលើកិច្ចព្រមព្រៀងឈប់បាញ់រវាងអ៊ីស្រាអែល និងក្រុមហាម៉ាស អាចសម្រេចបានមុនខែរ៉ាម៉ាដានចាប់ផ្តើម តែមកដល់ពេលនេះពួកគេនៅតែរងការគៀបសង្កត់ និងភាពភ័យខ្លាច ខណៈការរឹតបន្តឹងរបស់អ៊ីស្រាអែលលើជនមូស្លីមដែលបួងសួងនៅវិហារឥស្លាម Al-Aqsa នៃក្រុងយេរូសាឡឹម ដែលជាកន្លែងសក្ការៈបំផុតទី ៣ របស់សាសនាឥស្លាម ក៏អាចបង្កើនភាពតានតឹងនៅក្នុងតំបន់ផងដែរ ៕