នាយករដ្ឋមន្ត្រីថៃ ៣ រូបជួបជុំគ្នានៅស្រុកកំណើតលោក ថាក់ស៊ីន

នាយករដ្ឋមន្ត្រីថៃចំនួន ៣ រូបក្នុងនោះមានលោក សេដ្ឋា ថាវីស៊ីន ដែលកំពុងកាន់អំណាច រួមជាមួយអតីតនាយករដ្ឋមន្ត្រី ២ រូបទៀតគឺលោក ថាក់ស៊ីន ស៊ីណាវ៉ាត្រា និងលោក ស៊ុមឆៃ វង់សាវ៉ាត កាលពីថ្ងៃសុក្របានជួបជុំគ្នាទទួលទានអាហារពេលល្ងាចដ៏មានអត្ថន័យនៅក្នុងទីក្រុងឈៀងម៉ៃដែលជាស្រុកកំណើតរបស់លោក ថាក់ស៊ីន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយដោយសារព័ត៌មាន Thai PBS កាលពីថ្ងៃទី១៥ ខែមីនាបានឲ្យដឹងថា នេះជាអាហារពេលល្ងាចប្រជុំដោយនាយករដ្ឋមន្ត្រីជើងខ្លាំងទាំង ៣ រូប ស្របពេលដែលលោក ថាក់ស៊ីន បានហោះទៅលេងស្រុកកំណើតដើម្បីទៅគោរពវិញ្ញាណក្ខន្ធឪពុកម្ដាយរបស់លោក បន្ទាប់ពីចាកចេញឆ្ងាយអស់ពីរយៈពេល ១៧ ឆ្នាំ ។

ភ្លាមៗបន្ទាប់ពីហោះត្រឡប់ចូលក្នុងស្រុកវិញកាលពីខែសីហា ឆ្នាំ២០២៣ កន្លងទៅ លោក ថាក់ស៊ីន ត្រូវបានកាត់ទោសឲ្យជាប់ពន្ធនាគារពីបទពុករលួយ និងរំលោភអំណាច ប៉ុន្តែលោកបានចំណាយពេលត្រឹមតែប៉ុន្មានម៉ោងប៉ុណ្ណោះនៅក្នុងពន្ធនាគារ ពោលលោកត្រូវបញ្ជូនទៅកាន់មន្ទីរពេទ្យ ដោយសារតែបញ្ហាសុខភាព ។

អតីតនាយករដ្ឋមន្ត្រីដ៏មានឈ្មោះបោះសំឡេងវ័យ ៧៤ ឆ្នាំរូបនេះបានស្នាក់នៅក្នុងមន្ទីរពេទ្យរយៈពេល ១៨០ ថ្ងៃ ដោយសារតែមានជំងឺជាច្រើនមុខ មុនពេលត្រូវបានដោះលែងឲ្យនៅក្រៅឃុំកាលពីសប្តាហ៍មុន បន្ទាប់ពីអនុវត្តទោសទណ្ឌបានរយៈពេល ៦ ខែ ដោយសារតែស្ថានភាពរបស់លោកស៊ីទៅនឹងលក្ខខណ្ឌនៃការលើកលែងទោសដូចជា លោកស្ថិតក្នុងចំណោមទណ្ឌិត ៩៣០ ដែលចាត់ទុកជាមនុស្សចាស់ និងមានជំងឺ ឬមានអាយុលើស ៧០ ឆ្នាំ បូករួមទាំងស្នាដៃបម្រើប្រទេសជាតិនៅពេលកន្លងមកផងដែរ ។

ចំណែកលោក សេដ្ឋា ដែលកំពុងកាន់អំណាចបាននិយាយថា លោកបន្តស្នាក់នៅក្នុងទីក្រុងឈៀងម៉ៃ រហូតដល់ថ្ងៃចន្ទ ទី១៨ ខែមីនាដើម្បីសង្កេតមើលបញ្ហាខ្យល់ពុល PM 2.5 និងរឿងភ្លើងឆេះព្រៃ ហើយក៏ស្កាត់ជួបលោក ថាក់ស៊ីន តែម្ដង ខណៈជាបន្តបន្ទាប់មកលោកនាកយករដ្ឋមន្ត្រីទី ៣០ រូបនេះ​នឹងអញ្ជើញ​ទៅ​ខេត្ត Payao នា​រសៀល​ថ្ងៃ​ចន្ទ ហើយ​រៀបចំ​កិច្ចប្រជុំ​គណៈរដ្ឋមន្ត្រី​នៅ​ថ្ងៃ​អង្គារ ។

ដោយឡែកលោក ស៊ុមឆៃ វង់សាវ៉ាត ដែល​ធ្លាប់បាន​កាន់​តំណែង​ជា​នាយក​រដ្ឋមន្ត្រីចន្លោះ​ពី​ខែ​កញ្ញា​ដល់​ខែ​ធ្នូ ឆ្នាំ​២០០៨ ក៏មានវត្តមាននៅក្នុងការទទួលទានអាហារពេលល្ងាចនោះផងដែរ ដោយសារតែលោកគឺ​ជា​ប្អូន​ថ្លៃ​របស់​លោក ថាក់ស៊ីន បន្ទាប់ពីបាន​រៀបការ​ជាមួយលោកស្រី Yaowapa ។ អាណត្តិរបស់លោក ស៊ុមឆៃ ត្រូវបានរង្គោះរង្គើដោយភាពចលាចលនយោបាយ និងការតវ៉ាពីសំណាក់សម្ព័ន្ធប្រជាជនដើម្បីប្រជាធិបតេយ្យ (PAD) ដែលត្រូវបានគេស្គាល់ថាជា ‘ក្រុមអាវលឿង’ ។

ទោះយ៉ាងណា អាណត្តិរបស់លោក ស៊ុមឆៃ ក៏ឈានដល់ថ្ងៃអវសាន នៅពេលដែលតុលាការធម្មនុញ្ញបានចេញសេចក្ដីរំលាយគណបក្សអំណាចប្រជាជន (PPP) ដែលជាគណបក្សកាន់អំណាច និងគណបក្សចម្រុះចំនួន ២ ផ្សេងទៀតពីបទក្លែងបន្លំការបោះឆ្នោតដែលនាំទៅដល់ការដកលោកចេញពីតំណែងតែម្ដង ។

គួរបញ្ជាក់ថា ការទទួលទានអាហារនាពេលនេះគឺជាការជួបប្រជុំជើងខ្លាំងដ៏កម្រមួយ ដោយសារតែនាយករដ្ឋមន្ត្រីបច្ចុប្បន្ន និងអតីតនាយករដ្ឋមន្ត្រី ២ រូបទៀតសុទ្ធសឹងតែមេដឹកនាំខ្នងក្រាស់ ជាពិសេសប្រជាប្រិយភាពរបស់លោក ថាក់ស៊ីន ចាប់តាំងពីរជ្ជកាលដឹកនាំប្រទេសនាឆ្នាំ ២០០១ មក ៕

ដោយ ៖ សុខ ជីវ័ន្ត

ចុចអាន ៖ លោក ពូទីន មិនបានអញ្ជើញទៅបោះឆ្នោតជ្រើសរើសប្រធានាធីបតីនៅ​ការិយាល័យផ្ទាល់នោះទេ