រុស្ស៊ី ចោទ អ៊ុយក្រែន ថាប្រើយន្តហោះដ្រូនវាយប្រហាររោងចក្រនុយក្លេអ៊ែរ​របស់ខ្លួន

រុស្ស៊ីនិយាយថា យន្តហោះគ្មានមនុស្សបើករបស់អ៊ុយក្រែនបានវាយប្រហាររោងចក្រថាមពលនុយក្លេអ៊ែរ Zaporizhzhia ដែលគ្រប់គ្រងដោយរុស្ស៊ី ខណៈរដ្ឋាភិបាលទីក្រុងកៀវ​បដិសេធ​ចំពោះការ​ចោទ​ប្រកាន់​នេះ ។ នេះបើយោងតាមការចេញផ្សាយរបស់ទូរទស្សន៍ជប៉ុន​ NHK​ នៅថ្ងៃទី​៨ ខែមេសានេះ ។

ទីភ្នាក់ងារនុយក្លេអ៊ែររបស់រុស្ស៊ី Rosatom បានអះអាងកាលពីថ្ងៃអាទិត្យថា ការវាយប្រហារដោយយន្តហោះគ្មានមនុស្សបើករបស់អ៊ុយក្រែនបានវាយប្រហារលើដំបូលរ៉េអាក់ទ័រលេខ ៦ របស់រោងចក្រនុយក្លេអ៊ែរដែលមានទីតាំងនៅតំបន់ Zaporizhzhia ភាគខាងត្បូងអ៊ុយក្រែនបណ្ដាលឲ្យមានមនុស្ស ៣ នាក់បានរងរបួស ប៉ុន្តែការខូចខាតរោងចក្រមិនធ្ងន់ធ្ងរនោះទេ ហើយកម្រិតវិទ្យុសកម្មទាំងនៅក្នុង និងជុំវិញរោងចក្រគឺធម្មតា ។

ទន្ទឹមនោះ ទីភ្នាក់ងារថាមពលបរមាណូអន្តរជាតិ (IAEA ) បានឲ្យដឹងថា ការខូចខាតនៅរ៉េអាក់ទ័រលេខ ៦ មិនបានប៉ះពាល់ដល់សុវត្ថិភាពនុយក្លេអ៊ែរនោះទេ ប៉ុន្តែនេះគឺជាឧបទ្ទវហេតុដ៏ធ្ងន់ធ្ងរមួយដែលអាចបង្កហានិភ័យនៃគ្រោះថ្នាក់នុយក្លេអ៊ែរ ហើយត្រូវតែបញ្ឈប់ការវាយប្រហារមួយនេះជាបន្ទាន់ ។

ពាក់ព័ន្ធនឹងបញ្ហានេះដែរ ភាគីខាងអ៊ុយក្រែនបានចេញមុខអះអាងថា មិនបានជាប់ទាក់ទិនចំពោះការវាយប្រហារ ក៏ដូចជាការបង្កហេតុផ្នែកប្រដាប់អាវុធណាមួយនៅក្នុងតំបន់នៃរោងចក្រនុយក្លេអ៊ែរ Zaporizhzhia នេះនោះទេ ហើយថែមទាំងវាយបកទៅរុស្ស៊ីវិញថា ការចោទប្រកាន់នេះគឺមិនសមទំនងទាល់តែសោះ ។

គួរបញ្ជាក់ថា ការព្រួយបារម្ភអំពីសុវត្ថិភាពលើរោងចក្រត្រូវបានលើកឡើងជាយូរមកហើយ ដោយសាររោងចក្រនេះបានជួបប្រទះជាញឹកញាប់នូវការផ្អាកការផ្គត់ផ្គង់ថាមពលចាំបាច់ដើម្បីរក្សាប្រព័ន្ធត្រជាក់ ស្របពេលដែលកន្លងមកអ៊ុយក្រែនក៏បានព្យាយាមវាយប្រហារលើរោងចក្រថាមពលរបស់រុស្ស៊ីមួយនេះផងដែរ ៕

អត្ថបទ ៖ ប៊ុន សុភាព