ព័ត៌មានអន្ដរជាតិ

កូរ៉េខាងជើងបាញ់ផ្លោងមីស៊ីលរយៈចម្ងាយជិតចូលចន្លោះឧបទ្វីបកូរ៉េ និងជប៉ុន

បានផុស

២ years មុន

នៅ

ថ្ងៃចន្ទ ២២ មេសា ២០២៤

ដោយ

Chheang

មីស៊ីលប៉ុន្មានគ្រាប់របស់កូរ៉េខាងជើងត្រូវបានបាញ់ផ្លោងចូលក្នុងដែនសមុទ្រខាងកើតរបស់ខ្លួនដែលមានទីតាំងស្ថិតនៅចន្លោះឧបទ្វីបកូរ៉េ និងប្រទេសជប៉ុននៅថ្ងៃចន្ទ ទី២២ ខែមេសា ។ នេះបើយោងតាមការលើកឡើងរបស់យោធាកូរ៉េខាងត្បូង ។

ទន្ទឹមនោះ បន្ទាប់ពីការបាញ់សាកល្បងគ្រាប់មីស៊ីលរបស់រដ្ឋាភិបាលក្រុងព្យុងយ៉ាងហើយ ប្រទេសកូរ៉េខាងត្បូងបានធ្វើការថ្កោលទោសយ៉ាងឆាប់រហ័សមួយ ដែលយល់ឃើញថា វាជាការគំរាមគំហែងសេ្ថរភាពនៃឧបទ្វីបកូរ៉េ ។

ពាក់ព័ន្ធនឹងសកម្មភាពបាញ់ផ្លោងមីស៊ីលរបស់លោក គីម ជុងអ៊ុន ខាងរដ្ឋាភិបាលជប៉ុនវិញ បានក៏បញ្ជាក់ដែរថា គ្រាប់ដែលកូរ៉េខាងជើងបាញ់នោះជាប្រភេទមីស៊ីលប៉ាលីស្ទិក មានរយៈចម្ងាយខ្លីប្រមាណ ៣០០ គីឡូម៉ែត្រ ហើយត្រូវបានបាញ់ចេញពីតំបន់ក្បែរទីក្រុងព្យុងយ៉ាង ។ រយៈចម្ងាយប៉ុណ្ណេះ អាចបញ្ជាក់ថា សព្វាវុធកូរ៉េខាងជើងទំនងជាមានសមត្ថភាពអាចកំណត់គោលដៅបាញ់ចូលតំបន់ណាមួយបាននៅក្នុងប្រទេសកូរ៉េខាងត្បូង ។

ការិយាល័យនាយករដ្ឋមន្ត្រីជប៉ុនលោក Fumio Kishida បានណែនាំឲ្យមន្ត្រីរបស់ខ្លួនប្រមូលផ្ដុំព័ត៌មានអំពីការបាញ់សាកល្បងមីស៊ីលកូរ៉េខាងជើង និងធានាឲ្យបាននូវសុវត្ថិភាពយន្តហោះ ក៏ដូចជាកប៉ាល់ក្នុងប្រទេស ។ ឆ្មាំសមុទ្រជប៉ុន បានជំរុញឲ្យនាវានានាលើដែនសមុទ្របង្កើនការប្រុងប្រយ័ត្ន ជាពិសេសចំពោះរបស់របរដែលធ្លាក់ចុះមកពីលើមេឃ ហើយត្រូវរាយការណ៍ក្នុងករណីសង្ស័យណាមួយ ៕

ដោយ ៖ ឈាង