ព័ត៌មានអន្ដរជាតិ

ប្រធានចារកម្ម អ៊ីស្រាអែល ប្រកាសលាលែងពីតំណែង

បានផុស

២ years មុន

នៅ

ថ្ងៃអង្គារ ២៣ មេសា ២០២៤

ដោយ

Chheang

លោក Aharon Haliva ប្រមុខដឹកនាំអង្គភាពចារកម្មអ៊ីស្រាអ៊ែលបានសម្រេចចិត្តលាលែងចេញពីតំណែង ដោយទទួលយកនូវទំនួលខុសត្រូវពីភាពបរាជ័យដែលនាំឲ្យមានការវាយប្រហាររបស់ក្រុមហាម៉ាសកាលពីថ្ងៃទី៧ ខែតុលា ឆ្នាំ២០២៣ កន្លងទៅ ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី២២ ខែមេសាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជើងចាស់ក្នុងវិស័យយោធាវ័យ ៣៨ ឆ្នាំរូបនេះបានបញ្ជាក់ថា លោកបានបរាជ័យក្នុងការទាយទុកមុន ក៏ដូចជាបង្ការកុំឲ្យមានការវាយប្រហារដែលបណ្ដាលឲ្យមនុស្សស្លាប់ច្រើនបំផុតនៅក្នុងប្រវត្តិសាស្ត្រអ៊ីស្រាអ៊ែល ។

“ផ្នែកស៊ើបការណ៍សម្ងាត់ស្ថិតនៅក្រោមបញ្ជារបស់ខ្ញុំ ហើយមិនបានបំពេញភារកិច្ចដែលពួកយើងត្រូវគេដាក់ឲ្យធ្វើនោះទេ ។ ខ្ញុំចងចាំថ្ងៃដ៏ខ្មៅងងឹតនោះជាប់ខ្លួនតាំងតែពីពេលនោះមករហូត” នេះជាការលើកឡើងរបស់លោក Aharon Haliva នៅក្នុងសំបុត្រលែងលាពីតំណែង ដែលបញ្ចេញដោយក្រុមយោធាអ៊ីស្រាអែល ។

ប្រព័ន្ធផ្សព្វផ្សាយ និងក្រុមអ្នករាយការណ៍ព័ត៌មានអ៊ីស្រាអ៊ែល រំពឹងថានឹងអាចមានការលែងលាតំណែងជាបន្តទៀត បន្ទាប់ពីយុទ្ធនាការយោធាសំខាន់នៅតំបន់កាហ្សាត្រូវបានបញ្ចប់ ។

ដោយឡែក លោក Benjamin Netanyahu នាយករដ្ឋមន្ត្រីអ៊ីស្រាអ៊ែល មិនបានទទួលស្គាល់នូវទំនួលខុសត្រូវណាមួយនោះទេ ទាក់ទិននឹងការវាយប្រហារថ្ងៃទី៧ ខែតុលា ថ្វីត្បិតតែមានការស្ទង់មតិបង្ហាញថា ពលរដ្ឋអ៊ីស្រាអ៊ែលភាគច្រើនបានបន្ទោសលោកដែលបរាជ័យក្នុងការបង្ការ ព្រមទាំងការពារប្រទេសពីការវាយប្រហារ ។

គួររំលឹកថា ការវាយប្រហារថ្ងៃទី៧ ខែតុលា ឆ្នាំ២០២៣ បានទាញទម្លាក់កេរ្តិ៍ឈ្មោះផ្នែកយោធា និងទីភ្នាក់ងារចារកម្មអ៊ីស្រាអ៊ែលយ៉ាងខ្លាំង ដែលពីមុនធ្លាប់តែល្បីមិនងាយត្រូវក្រុមប៉ាឡេស្ទីនវាយឈ្នះនោះឡើយ ។ ថ្ងៃសោកនាដកម្មនោះ បានឆក់យកជីវិតមនុស្ស ១,២០០ នាក់ ដោយក្នុងនោះមានទាំងជនជាតិអ៊ីស្រាអ៊ែល និងជនបរទេស ហើយភាគច្រើនទៀតសោតគឺជាជនស៊ីវិល ។ បន្ថែមពីនេះ មានមនុស្សប្រមាណ ២៥០ នាក់ត្រូវបានជាប់ឃុំឃាំងនៅកាហ្សា ខណៈដែល ១៣៣ នាក់ផ្សេងទៀតត្រូវចាប់ជាចំណាប់ខ្មាំង ៕

ដោយ ៖ ឈាង

Related Topics:សង្គ្រាមអ៊ីស្រាអែល-ប៉ាឡេស្ទីន