ប្រទេសចំនួន ៤៩ រួមជាមួយ EU រកយន្តការថ្មីដើម្បីបន្តដាក់ទណ្ឌកម្មលើ កូរ៉េខាងជើង

ប្រទេសចំនួន ៤៩ រួមជាមួយសហភាពអឺរ៉ុប (EU) បានចេញសេចក្តីថ្លែងការណ៍រួមមួយដោយអំពាវនាវឲ្យមានយន្តការថ្មីគឺដាក់ទណ្ឌកម្មលើកូរ៉េខាងជើង ។ នេះបើយោងតាមការចេញផ្សាយដោយទូរទស្សន៍ជប៉ុន NHK នៅថ្ងៃទី២ ខែ ឧសភានេះ ។

យោងតាមឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិលោកស្រី Linda Thomas-Greenfield ដែលបានអានសេចក្តីថ្លែងការណ៍រួមនៅទីស្នាក់ការអង្គការសហប្រជាជាតិនៅទីក្រុងញូវយ៉កកាលពីថ្ងៃពុធបានឲ្យដឹងថា ការប្រើប្រាស់ការវេតូរបស់រុស្ស៊ីបានដកហូតរដ្ឋសមាជិកអង្គការសហប្រជាជាតិនូវព័ត៌មាន និងទិសដៅសំខាន់ៗ ដើម្បីអនុវត្តវិធានការដែលបានអនុម័តដោយក្រុមប្រឹក្សា ។

ទន្ទឹមនោះ ការវេតូរបស់រុស្ស៊ីនេះទៀតសោតក៏បណ្ដាលឲ្យក្រុមអ្នកជំនាញនៃក្រុមប្រឹក្សាសន្តិសុខអង្គការសហប្រជាជាតិទទួលបន្ទុកបេសកកម្មនេះត្រូវបានរំសាយផងដែរកាលពីថ្ងៃទី៣០ ខែមេសា ជាពិសេសគឺការបដិសេធរបស់រុស្ស៊ីតែម្ដងដែលមិនបន្តអាណត្តិរបស់ខ្លួននៅក្នុងក្រុមប្រឹក្សាមួយនេះ ។

ស្របពេលជាមួយគ្នានេះ លោកស្រីបានទាមទារឲ្យកូរ៉េខាងជើងបោះបង់កម្មវិធីអាវុធប្រល័យលោក និងកម្មវិធីមីស៊ីលផ្លោងរបស់ខ្លួន ខណៈកូរ៉េខាងជើងបានគេចវេសពីការដាក់ទណ្ឌកម្ម និងបន្តកម្មវិធីអភិវឌ្ឍន៍នុយឥតខ្លាចញញើត ។ លោកស្រីក៏បានជំរុញឲ្យប្រទេសជាសមាជិកទាំងអស់ បន្តធ្វើយ៉ាងណារកយន្តការថ្មីបន្តការដាក់ទណ្ឌកម្ម ដើម្បីរារាំងកូរ៉េខាងជើងពីកម្មវិធីអាវុធរបស់ខ្លួន ៕

អត្ថបទ ៖ ប៊ុន សុភាព