ក្រុមហ៊ុនផលិតស្រា អូស្ត្រាលី មានសង្ឃឹមឡើងវិញ ក្រោយ ចិន ដកពន្ធ

ក្រុមហ៊ុនផលិតស្រា​នៅទូទាំងប្រទេសអូស្ត្រាលីមានសង្ឃឹមឡើងវិញ បន្ទាប់ពីមានការប្រទាំងប្រទើសអស់រយៈកាល ៣ ឆ្នាំ ខណៈពេលដែលប្រទេសចិនបានដាក់ពន្ធលើការនាំចូលស្រារបស់អូស្ត្រាលីរហូតដល់ ២១៨ ភាគរយឯណោះ ចាប់តាំងពីឆ្នាំ ២០២០ មក ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៧ ខែ​ឧសភានេះ ។

ឧស្សាហកម្ម​នេះ​បាន​រង​ផល​ប៉ះពាល់​យ៉ាង​ខ្លាំង ដោយសារប្រហែលមួយភាគបីនៃស្រាអូស្ត្រាលីបាននាំទៅប្រទេសចិន ដែលជាទីផ្សារធំបំផុត ប៉ុន្តែប្រទេសចិនកាលពីចុងខែមីនាបានលុបចោលពន្ធគយ ដោយបញ្ចប់ការយកពន្ធរយៈពេល ៣ ឆ្នាំ និងផ្តល់ការបន្ធូរបន្ថយដែលរង់ចាំជាយូរមកហើយដល់អ្នកផលិតស្រាអូស្ត្រាលី ។

ទោះបីជាយ៉ាងណា ឥឡូវនេះ ប្រទេសអូស្ត្រាលីកំពុងប្រឈមមុខនឹងបញ្ហាតម្លៃស្រាដែលរក្សាទុកក្នុងស្តុកមិនទាន់លក់ចេញប្រមាណជា ៣ ពាន់ដប ដោយសារភាគច្រើននៃទីផ្សារទាំងនោះតូចជាងទីផ្សារប្រទេសចិន ។

ទំនាក់ទំនងការទូតរបស់អូស្ត្រាលីជាមួយចិនមានភាពតានតឹង ចាប់តាំងពីទីក្រុងកង់បេរ៉ាបានអំពាវនាវឲ្យមានការស៊ើបអង្កេតឯករាជ្យអំពីប្រភពដើមនៃជំងឺកូវីដ ១៩ ក្នុងឆ្នាំ ២០២០ ។ ដោយសារតែបញ្ហានេះហើយទើបធ្វើឲ្យចិនក្ដៅស្លឹកត្រចៀក ហើយបន្ទាប់មក​បាន​ដាក់ពន្ធលើ​ការ​នាំ​ចូល​ទំនិញ​របស់​អូស្ត្រាលី​រួម​មាន ធ្យូង​ថ្ម ឈើ គ្រាប់ធញ្ញជាតិ បង្កង និង​ស្រា ។

គួរបញ្ជាក់ថា ប្រទេសចិនមាន ២៦ ភាគរយនៃការធ្វើពាណិជ្ជកម្មទំនិញ និងសេវាកម្មសរុបរបស់ប្រទេសអូស្ត្រាលីក្នុងឆ្នាំ ២០២២​ ដល់ឆ្នាំ ​២០២៣ ។ ពាណិជ្ជកម្មទ្វេភាគីសម្រាប់រយៈពេលនេះមានចំនួន ៣១៦,៩ ពាន់លានដុល្លារអូស្ត្រាលី ដែលស្មើនឹង ២១០ ពាន់លានដុល្លារអាមេរិក ។

ពាក់ព័ន្ធនឹងការដកពន្ធនេះដែរ ធ្វើឲ្យអ្នកផលិតស្រាអូស្ត្រាលីជាច្រើនសប្បាយចិត្ត ហើយមានបំណងចង់បើកអាជីវកម្មរបស់ខ្លួនឡើងវិញ ទោះបីជាយ៉ាងណាក៏មិនមានន័យថា ពាណិជ្ជកម្មនឹងវិលមករកភាពប្រក្រតីវិញក្នុងពេលឆាប់ៗនេះនោះទេ ៕

អត្ថបទ៖ ប៊ុន សុភាព