កុមារថៃ ជាង ១០លាននាក់ រងគ្រោះដោយរលកកម្តៅធ្ងន់ធ្ងរ

ត្បិតតែភ្លៀងបង្អុរមក ហាក់ធ្វើឲ្យថៃ ធូរស្រាលមួយកម្រិតក៏ពិតមែន ប៉ុន្តែប្រទេសនេះ នៅមិនទាន់ឆ្លងផុតដំណាក់កាលកម្តៅក្តៅសឹងឆេះនោះទេ ហើយបើយោងតាមរបាយការណ៍របស់អង្គការយូនីសេហ្វ បញ្ចេញកាលពីថ្ងៃពុធទី៨ខែឧសភា, កុមារថៃជាង១០លាននាក់ ត្រូវរងផលប៉ះពាល់ដោយសាររលកកម្តៅខ្លាំង។

សីតុណ្ហភាព​ឡើងខ្ពស់ បាន​បង្ក​ជាបញ្ហា​ប្រឈម​ខ្លាំង​ដល់​កុមារ​នៅ​ក្នុង​ប្រទេស​ថៃ ក៏ដូចជា​កន្លែង​ផ្សេង​ទៀតដែរ ដោយរារាំងពួកគេមិនឲ្យចេញធ្វើ​សកម្មភាព​ក្រៅ​ផ្ទះ និង​រំខានខ្លាំងបំផុត​ដល់​ការ​អប់រំ។

ក្នុងពេលជាមួយគ្នានេះ ការផ្លាស់ប្តូរលក្ខខណ្ឌអាកាសធាតុ រួមទាំងព្យុះខុសធម្មតា ក៏អាចបណ្តាលឲ្យខូចខាតដល់ផ្ទះសម្បែងនិងហេដ្ឋារចនាសម្ព័ន្ធ ព្រមទាំងរារាំងកុមារជាច្រើនពីការទទួលបានសេវាមូលដ្ឋានផងដែរ។

របាយការណ៍ថ្មីៗរបស់អង្គការយូនីសេហ្វនេះ បានគូសបញ្ជាក់ថា កុមាររាប់លាននាក់នៅទូទាំងពិភពលោកកំពុងប្រឈមមុខនឹងឥទ្ធិពលនៃការកើនឡើងសីតុណ្ហភាព ហើយស្ថានការណ៍ ត្រូវបានគេរំពឹងថា នឹងកាន់តែធ្ងន់ធ្ងរទៅៗ ក្នុងរយៈពេលប៉ុន្មានទសវត្សរ៍ខាងមុខ។

ក្នុងរបាយការណ៍ The Coldest Year of the Rest of Their Lives: Protecting Children from the Escalating Impacts of Heatwaves បានបង្ហាញថា កុមារចំនួន៥៥៩លាននាក់នៅទូទាំងពិភពលោក​ បច្ចុប្បន្នកំពុងប្រឈមមុខនឹងរលកកម្តៅញឹកញាប់ ខណៈតួលេខ ត្រូវគេព្យាករថានឹងឡើងដល់ ២.០២ពាន់លាននៅត្រឹមឆ្នាំ២០៥០។

នៅក្នុងប្រទេសថៃ ស្ថានភាពគឺគួរឲ្យព្រួយបារម្ភបំផុត ដោយរបាយការណ៍នេះនិយាយថា កុមារជាង៧៥% ពោលគឺប្រហែល ១០.៣លាននាក់ ត្រូវរងផលប៉ះពាល់ដោយសារកត្តាកម្តៅខ្ពស់ត្រឹមមួយឆ្នាំ២០២០ ហើយបើគ្មានការអន្តរាគមន៍ទេ កុមារថៃគ្រប់រូបដែលមានអាយុក្រោម១៨ឆ្នាំ នឹងប្រឈមមុខជាមួយរលកកម្តៅកាន់តែញឹកញាប់ អូសបន្លាយដល់ឆ្នាំ២០៥០។

សូមបញ្ជាក់ថា រយៈពេលពីរខែ គឺមេសានិងឧសភា ប្រទេសថៃ ត្រូវវាយប្រហារយ៉ាងចាស់ដៃដោយរលកកម្តៅសឹងឆេះខ្លោច ខណៈស្រុកចំនួនបីនៅទូទាំងខេត្តទាំង៧៧ បានជួបប្រទះសីតុណ្ហភាពខែមេសាខ្ពស់បំផុតបំបែកកំណត់ត្រា ស្របពេលខេត្តចំនួន ២៦បានទទួលរងនូវកម្តៅកើនលើស៤០អង្សាសេ៕

អត្ថបទ៖ សុខ សុវណ្ណ

ចុចអាន៖ ថៃ ក៏ប្រកាសផ្អាកការសិក្សាដែរ បើមេឃនៅតែក្តៅខ្លាំង