លោក Blinken ព្យាយាមលើកទឹកចិត្តដល់ អ៊ុយក្រែន ខណៈ រុស្ស៊ី បង្កើនការវាយលុក

រដ្ឋមន្ត្រីការបរទេសអាមេរិកលោក Antony Blinken បានជំរុញស្មារតី ក៏ដូចជាលើកទឹកចិត្តដល់ប្រជាជនអ៊ុយក្រែនដែលកំពុងប្រឈមមុខនឹងការវាយលុកថ្មីរបស់រុស្ស៊ី ក្នុងអំឡុងពេលដំណើរទស្សនកិច្ចទៅកាន់ទីក្រុងកៀវ ខណៈជំនួយយោធាអាមេរិករាប់ពាន់លានដុល្លារកំពុងដំណើរការ បន្ទាប់ជាប់គាំងជាច្រើនខែ ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ AP នៅថ្ងៃទី១៤ ខែឧសភាកន្លងទៅ ។

លោក Blinken បានប្រាប់មេដឹកនាំអ៊ុយក្រែននៅក្នុងការអត្ថធិប្បាយមួយថា ទោះបីជាមានការពន្យារពេលដ៏យូរដែលធ្វើឲ្យអ៊ុយក្រែនរងគ្រោះចំពោះការវាយប្រហារយោធារុស្ស៊ីក៏ដោយ ក៏អាមេរិកនៅតែផ្ដល់សព្វាវុធកាន់តែច្រើន​ ខណៈអាមេរិកមានការតាំងចិត្ត និងប្តេជ្ញាចិត្តបន្តជួយអ៊ុយក្រែនឲ្យទទួលបានជោគជ័យ និងជួយកសាងអ៊ុយក្រែនឲ្យកាន់តែរឹងមាំបំផុតតាមដែលអាចធ្វើទៅបាន ។

ស្របពេលជាមួយគ្នានេះ លោក Blinken ​ក៏​បាន​ថ្កោល​ទោសទៅលោក​ប្រធានាធិបតី​រុស្ស៊ី វ្ល៉ាឌីមៀរ ពូទីន ផងដែរចំពោះការ​មើល​ស្រាល​ការ​ប្ដេជ្ញា​ចិត្ត​របស់​អ៊ុយក្រែន និងថាមេដឹកនាំរូបនេះគិតខុសហើយ ហើយចាត់ទុកពេលវេលានេះគឺជាវេនរបស់អ៊ុយក្រែនម្ដង ។

ទោះបីជាយ៉ាងណា ឆ្លៀតឱកាសដែលអ៊ុយក្រែនកំពុងខ្វះខាតទាំងផ្នែកកម្លាំងទ័ព និងសព្វាវុធ រុស្ស៊ីក្នុងប៉ុន្មានសប្តាហ៍ថ្មីៗនេះក៏បានបើកការវាយប្រហារលើហេដ្ឋារចនាសម្ព័ន្ធថាមពលរបស់អ៊ុយក្រែន និងដណ្ដើមបានទឹកដីប្រហែលពី ១០០ ទៅ ១២៥ គីឡូម៉ែត្រការ៉េនៅក្នុងតំបន់ Kharkiv រួមទាំងភូមិចំនួន ៧ ដែលធ្វើឲ្យប្រជាជនអ៊ុយក្រែនរាប់សិបនាក់ត្រូវជម្លៀសចេញ ។

គួរបញ្ជាក់ថា សភាបានអនុម័តកញ្ចប់ជំនួយបរទេសចំនួន ៦០ ពាន់លានដុល្លារដល់អ៊ុយក្រែន ហើយភាគច្រើនជាកាំភ្លើងធំ និងប្រព័ន្ធការពារដែនអាកាស ។ ចាប់តាំងពីពេលនោះមក រដ្ឋបាលលោក Biden បានប្រកាសផ្តល់ជំនួយផ្នែកយោធារយៈពេលខ្លីចំនួន ១.៤ ពាន់លានដុល្លារ និង ៦ ពាន់លានដុល្លារជាជំនួយរយៈពេលវែងបន្ថែមទៀតដល់អ៊ុយក្រែន ៕

អត្ថបទ៖ ប៊ុន សុភាព