រុស្ស៊ី នឹងនាំចេញប្រេងឡើងវិញ ក្រោយផ្អាកមួយរយៈ

រដ្ឋាភិបាលរុស្ស៊ីគ្រោងនឹងនាំចេញប្រេងឡើងវិញ បន្ទាប់ពីផ្អាកជាបណ្តោះអាសន្នមួយរយៈ ខណៈដែលទីផ្សារក្នុងស្រុកក៏ត្រូវបានផ្គត់ផ្គង់យ៉ាងល្អផងដែរ ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី២១ ខែឧសភាកន្លងទៅ ។

ដំបូងឡើយ ការហាមឃាត់នេះត្រូវបានកំណត់រយៈពេល ៦ ខែដោយចាប់ផ្តើមពីថ្ងៃទី១ ខែមីនា ប៉ុន្តែមានការលើកលែងមួយចំនួនសម្រាប់សហជីពសេដ្ឋកិច្ចដែលដឹកនាំដោយទីក្រុងមូស្គូ និងប្រទេសដែលមានកិច្ចព្រមព្រៀងផ្គត់ផ្គង់ប្រេងឥន្ធនៈដោយផ្ទាល់ ដូចជាម៉ុងហ្គោលីជាដើម ។

ការហាមប្រាមបណ្តោះអាសន្ននេះគឺជាវិធានការបង្ការប្រឆាំងនឹងការខ្វះខាតប្រេងឥន្ធនៈដែលអាចកើតមានក្នុងរដូវកាលដែលមានតម្រូវការខ្ពស់ និងជាការធានារ៉ាប់រងប្រឆាំងនឹងការរំខានដល់ការចម្រាញ់ប្រេងដែលបណ្តាលមកពីការវាយប្រហារដោយយន្តហោះគ្មានមនុស្សបើករបស់អ៊ុយក្រែន និងការជួសជុសរោងចក្រដែលរងការខូតខាតឡើងវិញ ។

បច្ចុប្បន្នរោងចក្រចម្រាញ់ប្រេង និងដេប៉ូប្រេងបានបង្កើនការស្តុកសាំងចាក់ម៉ូតូដើម្បីធានាបាននូវតម្រូវការទីផ្សារក្នុងស្រុក ដោយគិតត្រឹមថ្ងៃទី១៥ ខែឧសភា ការស្តុកទុកសាំងសម្រាប់ចាក់ម៉ូតូមានចំនួន ២.១ លានតោន និង ៣.៤ លានតោនសម្រាប់ប្រេងម៉ាស៊ូត ។ ខណៈដែលចំនួនទាំងនេះមានភាពគ្រប់គ្រាន់ក្នុងការផ្គត់ផ្កង់ទីផ្សារក្នុងស្រុកយ៉ាងល្អ ដូចនេះការផ្អាកនាំចេញនឹងត្រូវបានលុបចោល ។

គួរបញ្ជាក់ថា រុស្ស៊ីក្នុងពេលថ្មីៗនេះបានទទួលរងការវាយប្រហារតាមអាកាស ជាពិសេសការវាយប្រហារដោយយន្តហោះគ្មានមនុស្សបើកលើរោងចក្រថាមពលដែលបានធ្វើឲ្យមានផលប៉ះពាល់មួយចំនួន រួមទាំងការនាំចេញប្រេងផងដែរ ៕

អត្ថបទ៖ ប៊ុន សុភាព