ព័ត៌មានអន្ដរជាតិ

លោក Netanyahu និយាយយ៉ាងណាខ្លះ ក្រោយតុលាការ ICC ចង់ចេញដីកាចាប់ខ្លួន

បានផុស

២ years មុន

នៅ

ថ្ងៃពុធ ២២ ឧសភា ២០២៤

ដោយ

នាយករដ្ឋមន្ត្រីអ៊ីស្រាអែល លោក Benjamin Netanyahu បានចេញមុខមកឆ្លើយតបទៅកាន់ប្រធានរដ្ឋអាជ្ញាតុលាការឧក្រិដ្ឋកម្មអន្តរជាតិ (ICC) គឺលោក Karim Khan បន្ទាប់ពីស្វែងរកដីកាចាប់ខ្លួនមេដឹកនាំអ៊ីស្រាអែលរូបនេះ ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី២១ ខែឧសភាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានរដ្ឋអាជ្ញា ICC លោក Karim Khan កំពុងស្នើសុំដីកាចាប់ខ្លួនមនុស្សចំនួន ៥ នាក់ រួមទាំងលោក Netanyahu, រដ្ឋមន្ត្រីការពារជាតិអ៊ីស្រាអែលលោក Yoav Gallant ក៏ដូចជាមេដឹកនាំក្រុមហាម៉ាស Yahya Sinwar, លោក Ismail Haniyeh និង Mohammed Diab Ibrahim al-Masri ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិនៅក្នុងតំបន់ហ្គាហ្សា និងអ៊ីស្រាអែល ។

ជាការឆ្លើយតប លោក Netanyahu បានបញ្ជាក់ច្បាស់ៗនៅក្នុងសារជាវីដេអូមួយកាលពីថ្ងៃចន្ទថា “លោកសូមប្រឆាំងដាច់ខាតចំពោះការសម្រេចចិត្តរបស់តុលាការ ICC ហើយលោក Khan កំពុងបង្កើតរឿងរ៉ាវឲ្យត្របាញ់ចូលគ្នា និងបង្អាប់តម្លៃសីលធម៌ដោយខុសឆ្គងរវាងមេដឹកនាំអ៊ីស្រាអែល និងមេទ័ពនៃក្រុមប្រដាប់ប៉ាឡេស្ទីនហាម៉ាស” ។

ថ្លែងចេញពីប្រទេសអ៊ីស្រាអែលក្នុងកម្មវិធីទូរទស្សន៍អាមេរិក ABC កាលពីថ្ងៃអង្គារ លោក Netanyahu បានលើកឡើងថា លោក Khan កំពុងចាក់សាំងលើភ្លើងប្រឆាំងនឹងពួកយូដាដែលកំពុងបង្កភាពវឹកវរ និងបណ្ដាលឲ្យជម្លោះរីករាលដាលនៅជុំវិញពិភពលោក ។

ទន្ទឹមនោះ ប្រភពពីកាសែតអ៊ីស្រាអែលជាច្រើនបានរាយការណ៍កាលពីថ្ងៃអង្គារថា រដ្ឋាភិបាលអ៊ីស្រាអែលនឹងព្យាយាមបញ្ចុះបញ្ចូលរដ្ឋាភិបាលសហរដ្ឋអាមេរិក និងសភាឲ្យដាក់ទណ្ឌកម្មលើតុលាការ ICC ជាការឆ្លើយតបទៅនឹងសំណើរបស់រដ្ឋអាជ្ញាដែលចង់ចាប់ខ្លួនលោក Netanyahu ប៉ុន្តែឥទ្ធិពលលើជំហរដាក់សម្ពាធមកទីក្រុងហ្ស៊េរុយសាឡិមនឹងមានតែបង្កមហន្តរាយធ្ងន់ធ្ងរប៉ុណ្ណោះ ។

គួរបញ្ជាក់ថា ការចោទប្រកាន់ ក៏ដូចជាការស្វែងរកដីកចាប់ខ្លួនលើមេដឹកនាំអ៊ីស្រាអែល និងក្រុមហាម៉ាស គឺផ្តើមចេញពីព្រឹត្តិការណ៍ ៧ តុលា ២០២៣ នៅពេលខ្មាន់កាំភ្លើងរបស់ចលនាសកម្មប្រយុទ្ធប៉ាឡេស្ទីនមួយនេះនាំគ្នាឆ្លងដែនសម្រុកចូលវាយប្រហារភាគខាងត្បូងប្រទេសអ៊ីស្រាអែល ដោយសម្លាប់មនុស្សប្រហែល ១,២០០នាក់ និងចាប់មនុស្ស ២៥២ នាក់ទៀតធ្វើជាចំណាប់ខ្មាំង ហើយសកម្មភាពនេះហើយដែលបញ្ឆេះឲ្យមានសង្រ្គាមមកទល់សព្វថ្ងៃ និងបង្កជាវិនាសកម្មបណ្តាលឲ្យជនជាតិប៉ាឡេស្ទីនប្រមាណ ៣៥,៥០០ នាក់បាត់បង់ជីវិតនៅតំបន់ហ្គាហ្សា ៕