យោធា អាមេរិក នឹងរៀបចំធ្វើសមយុទ្ធទ្រង់ទ្រាយធំជាលើកដំបូងនៅ ជប៉ុន

យោងតាមការចេញផ្សាយរបស់ទូរទស្សន៍ជាតិជប៉ុន NHK បានឲ្យដឹងថា យោធាអាមេរិកនឹងរៀបចំធ្វើសមយុទ្ធទ្រង់ទ្រាយធំនៅប្រទេសជប៉ុនជាលើកដំបូងក្នុងកិច្ចខិតខំប្រឹងប្រែង ដើម្បីបង្កើនសមត្ថភាពឆ្លើយតបយ៉ាងឆាប់រហ័សដើម្បីដោះស្រាយគ្រោះអាសន្នដែលអាចកើតមាននៅជិតប្រទេសនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធា​អាមេរិកតែងតែ​ធ្វើ​សមយុទ្ធ​ដែល​មាន​ឈ្មោះថា Valiant Shield នៅរៀងរាល់​ ២ ​ឆ្នាំ​ម្តង​នៅ​កោះ Guam និង​កន្លែង​ផ្សេង​ទៀត ខណៈក្នុងសមយុទ្ធនោះមានទាំងការហ្វឹកហាត់កងទ័ពជើងទឹកនិង កងទ័ពអាកាស ។ សមយុទ្ធ Valiant Shield នេះផ្តោតលើកិច្ចសហប្រតិបត្តិការរវាងយោធា លើការរាវរក តាមដាន និងការចូលរួមរបស់អង្គភាពនៅសមុទ្រ លើអាកាស និងនៅលើដីគោក ដើម្បីឆ្លើយតបទៅនឹងបេសកកម្មណាមួយចាំបាច់ ខណៈការ​ធ្វើ​សមយុទ្ធ​នៅ​ឆ្នាំ​នេះ​គ្រោង​នឹង​ចាប់​ផ្តើម​នៅ​ដើម​ខែ​មិថុនាខាងមុខ ហើយនឹងមានរយៈពេលប្រហែល ២ សប្តាហ៍ ។

យន្តហោះចម្បាំងអាមេរិកគ្រោងនឹងទៅដល់មូលដ្ឋានទ័ពចំនួន ២ នៅក្នុងប្រទេសជប៉ុនដើម្បីចូលរួមហ្វឹកហាត់ជាមួយយន្តហោះ​ទ័ព​អាកាស SDF ជប៉ុន ។ ខណៈដែលមូលដ្ឋាន​ទ័ព​អាកាស SDF ទាំងពីរនោះ​​ទំនង​ជា​មូលដ្ឋាន​ទ័ព​អាកាស Hachinohe ក្នុង​ខេត្ត Aomori និង​មូលដ្ឋាន​ទ័ព​អាកាស Matsushima ក្នុង​ខេត្ត Miyagi ។

ចំណែកមូលដ្ឋាន SDF នៅភាគឦសានប្រទេសជប៉ុន ក៏នឹងបញ្ជួនយន្តហោះល្បាត យន្តហោះចម្បាំង និងយន្តហោះផ្សេងទៀតចូលរួមសមយុទ្ធនេះផងដែរ ។

គួរបញ្ជាក់ថា សហរដ្ឋអាមេរិក និងជប៉ុនក៏នឹងចូលរួមធ្វើសមយុទ្ធយោធាត្រីភាគីជាមួយចក្រភពអង់គ្លេសនៅក្នុងឥណ្ឌូប៉ាស៊ីហ្វិកផងដែរ ចាប់ពីឆ្នាំ ២០២៥ តទៅដើម្បីបង្កើនសន្តិសុខក្នុងតំបន់ និងអភិវឌ្ឍបន្ថែមទៀតនូវសមត្ថភាពរបស់កងកម្លាំងប្រដាប់អាវុធរបស់ប្រទេសនីមួយៗដើម្បីធ្វើប្រតិបត្តិការរួមគ្នា ៕

អត្ថបទ៖ ប៊ុន សុភាព