សមាជិកណាតូ ៦ប្រទេសនៅជាប់រុស្ស៊ី កសាង “ជញ្ជាំងយន្តហោះគ្មានមនុស្សបើក” ទប់ទល់ជាមួយ ពូទីន

តាមការចុះផ្សាយរបស់ AFP, នៅទីបំផុត ប្រទេសជាសមាជិកអង្គការណាតូចំនួន៦ ដែលស្ថិតនៅជាប់ព្រំដែនរុស្ស៊ី បានឯកភាពគ្នាកសាង “ជញ្ជាំងយន្តហោះគ្មានមនុស្សបើក” ហើយ ដើម្បីការពារខ្លួនប្រឆាំងនឹងទង្វើបង្ករឿងពីសំណាក់លោក វ្ល៉ាឌីមៀរ ពូទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីមហាផ្ទៃលីទុយអានី លោកស្រី Agne Bilotaite បានប្រកាសផែនការនេះ កាលពីថ្ងៃសុក្រទី២៤ខែឧសភា បន្ទាប់ពីកិច្ចពិភាក្សាជាមួយសមភាគីមកពីប្រទេសសមាជិកណាតូចំនួន៥ទៀតដូចជាអេស្តូនី ឡេតូនី ហ្វាំងឡង់ ន័រវេស និងប៉ូឡូញ។

លោកស្រីថ្លែងថា “នេះគឺជាផែនការយ៉ាងថ្មីសន្លាង! ជញ្ជាំងយន្តហោះគ្មានមនុស្សបើក នឹងលាតសន្ធឹងពីប្រទេសន័រវេស ទៅដល់ប៉ូឡូញ ដោយប្រើយន្តហោះគ្មានមនុស្សបើក និងបច្ចេកវិទ្យាផ្សេងទៀត ដើម្បីការពារព្រំដែនរបស់យើង”។

តាមការបញ្ជាក់ពីលោកស្រី ផែនការនេះ គឺត្រូវបានព្រមព្រៀងគ្នា ក្នុងបរិបទនៃការកើនឡើងក្តីបារម្ភផ្នែកសន្តិសុខកាន់តែខ្លាំងនៅក្នុងតំបន់ ព្រោះតែសង្គ្រាមរវាងរុស្ស៊ីនិងអ៊ុយក្រែន ហើយក្រៅពីហេដ្ឋារចនាសម្ព័ន្ធរូបវន្តនិងប្រព័ន្ធឃ្លាំមើល, យន្តហោះគ្មានមនុស្សបើកនិងបច្ចេកវិទ្យាផ្សេងទៀត ក៏នឹងអនុញ្ញាតឲ្យយើងការពារខ្លួន ប្រឆាំងនឹងការបង្កហេតុពីប្រទេសអមិត្តនិងទប់ស្កាត់ការរត់ពន្ធនានាផងដែរ។

បន្ថែមពីលើការដាក់ពង្រាយយន្តហោះគ្មានមនុស្សដើម្បីត្រួតពិនិត្យព្រំដែន ប្រទេសនានាក៏នឹងប្រើប្រាស់ប្រព័ន្ធប្រឆាំងយន្តហោះគ្មានមនុស្សបើក ដើម្បីការពារឧបករណ៍សត្រូវប្រភេទនេះផងដែរ។

ទោះបីជាយ៉ាងណាក៏ដោយ លោកស្រីមិនផ្តល់ព័ត៌មានជាក់លាក់អំពីពេលវេលាសម្រាប់ការអនុវត្តផែនការនេះទេ ប៉ុន្តែកត់សម្គាល់ថា “ជញ្ជាំងយន្តហោះគ្មានបើក” អាចត្រូវបានរ៉ាប់រងដោយមូលនិធិពីសហភាពអឺរ៉ុប៕

អត្ថបទ៖ សុខ សុវណ្ណ

ចុចអាន៖ ក្នុងពេលមួយយប់ រុស្ស៊ី បាញ់ទម្លាញ់យន្តហោះគ្មានមនុស្សបើករបស់ អ៊ុយក្រែនអស់ ៣១គ្រឿង