ព័ត៌មានអន្ដរជាតិ

ប្រេស៊ីល ដកទូតចេញពីអ៊ីស្រាអ៊ែល ដោយមិនបានផ្ដល់ដំណឹង

បានផុស

២ years មុន

នៅ

ថ្ងៃព្រហស្បតិ៍ ៣០ ឧសភា ២០២៤

ដោយ

Chheang

លោក Luiz Inacio Lula da Silva ប្រធានាធិបតីប្រេស៊ីល បានដកអគ្គរដ្ឋទូតពីប្រទេសអ៊ីស្រាអ៊ែល ហើយបញ្ជូនទៅបម្រើការជាតំណាងពិសេសនៅអង្គការសហប្រជាជាតិក្រុងហ្សឺណែវ ក្រោយកើតមានជម្លោះការទូតរវាងប្រទេសទាំង២។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters កាលពីថ្ងៃទី២៩ ខែឧសភាកន្លងទៅ។

លោក Luiz Inacio Lula da Silva ប្រធានាធិបតីប្រេស៊ីល (រូបភាព៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្មានខែមុនឲ្យទៅកាន់តំណែងនៅហ្សឺណែវ លោក Frederico Meyer ត្រូវបានលោក Lula ហៅឲ្យត្រឡប់ចូលក្នុងប្រទេសប្រេស៊ីលជាមុនសិន។ ការកោះហៅនេះ ធ្វើឡើងក្រោយរដ្ឋមន្ត្រីក្រសួងការបរទេសអ៊ីស្រាអ៊ែល លោក Israel Katz បានហៅលោក Meyer ទៅប្រាប់ថា ប្រធានាធិបតីប្រេស៊ីលមិនមែនជាបុគ្គលដែលត្រូវគេស្វាគមន៍ឲ្យមានវត្តមាននៅក្នុងទឹកដីអ៊ីស្រាអ៊ែលនោះឡើយ បន្ទាប់ពីលោក Lula បានប្រដូចសង្គ្រាមរបស់អ៊ីស្រាអ៊ែលនៅហ្គាហ្សាទៅនឹងរបបប្រល័យពូជសាសន៍ Holocaust។

ក្រសួងការបរទេសអ៊ីស្រាអ៊ែល បាននិយាយថា មិនមានទាន់លិខិតផ្លូវការណាមួយនៅឡើយ ពាក់ព័ន្ធនឹងបញ្ហាដកទូតរបស់ប្រេស៊ីល។ យ៉ាងណាមិញ មកទល់នឹងពេលនេះ ប្រេស៊ីលមិនមានការតែងតាំងថ្មីអ្វីឡើយ បន្ទាប់ពីអវត្តមានរបស់លោក Meyer នៅក្រុងយេរ៉ូសាឡឹម។

សូមបញ្ជាក់ថា លោក Lula ប្រធានាធិបតីប្រេស៊ីល គឺជាអ្នករិះគន់មិនសំចៃមាត់ទៅលើការវាយប្រហាររបស់កងកម្លាំងអ៊ីស្រាអ៊ែលនៅតំបន់ហ្គាហ្សា។ កាលពីខែកុម្ភៈកន្លងទៅ លោកបាននិយាយថា “អ្វីដែលកំពុងកើតឡើងនៅហ្គាហ្សាស្ទ្រីប និងលើប្រជាជនប៉ាឡេស្ទីន មិនធ្លាប់មានក្នុងពេលវេលាណាមួយនៅក្នុងប្រវត្តិសាស្ត្រទេ។ តាមពិតទៅ វាដូចទៅអ្វីដែលលោក ហ៊ីត្លែរ បានសម្រេចចិត្តសម្លាប់ជនជាតិជ្វីហ្វ”។ សម្ដីរបស់លោក Lula គឺសំដៅលើការប្រដូចទង្វើអ៊ីស្រាអ៊ែលបច្ចុប្បន្នទៅនឹងរបបប្រល័យពូជសាសន៍ Holocaust កំឡុងសង្គ្រាមលោកលើកទី២ នាចន្លោះឆ្នាំ១៩៤១ ដល់ឆ្នាំ១៩៤៥ ដែលសម្លាប់ជនជាតិជ្វីហ្វអស់ប្រមាណ ៦លាននាក់ ដោយគំនុំយ៉ាងពុះកញ្ច្រោលរបស់ អាដុហ្វ ហ៊ីត្លែរ មេដឹកនាំអាល្លឺម៉ង់ នាសម័យនោះ៕

ដោយ៖ ឈាង