គ្រាន់តែគិតចង់ចាប់ខ្លួនលោក Netanyahu សោះ, អាមេរិក ស្រាប់តែអនុម័តសំណើច្បាប់ដាក់ទណ្ឌកម្ម ICC 

តាមសេចក្តីរាយការណ៍របស់ BBC កាលពីថ្ងៃអង្គារទី៤ខែមិថុនា, សភាតំណាងរាស្រ្តអាមេរិក បានបោះឆ្នោតលើសេចក្តីព្រាងច្បាប់ ដាក់ទោសតុលាការឧក្រិដ្ឋកម្មអន្តរជាតិ (ICC) គ្រាន់តែតុលាការនេះ គិតចង់ចោទប្រកាន់មេដឹកនាំអ៊ីស្រាអែលពីឧក្រិដ្ឋកម្មសង្រ្គាម នៅក្នុងតំបន់ហ្គាហ្សា ប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋអាជ្ញា ICC លោក Karim Khan ចង់ចេញសាលដីកា ចាប់ខ្លួននាយករដ្ឋមន្ត្រីអ៊ីស្រាអែល Benjamin Netanyahu និងរដ្ឋមន្ត្រីការពារជាតិ Yoav Gallant ព្រមទាំងមេដឹកនាំកំពូល៣រូប នៃក្រុមសកម្មប្រយុទ្ធប៉ាឡេស្ទីនហាម៉ាស ប៉ុន្តែ​តុលាការនេះ ​មិន​ទាន់​បាន​អនុម័តអ្វីនៅឡើយទេ។

ជុំវិញបញ្ហានេះ ប្រធានសភាតំណាងរាស្រ្តអាមេរិកលោក Mike Johnson ខាងគណបក្សសាធារណរដ្ឋ បាននិយាយថា “គំនិត ICC ចង់ចេញដីកាចាប់ខ្លួននាយករដ្ឋមន្ត្រីអ៊ីស្រាអែល និងរដ្ឋមន្ត្រីការពារជាតិ ទាំងដែលពួកគេកំពុងប្រយុទ្ធដើម្បីអត្ថិភាពប្រទេសរបស់ខ្លួន ប្រឆាំងនឹងអំពើអាក្រក់របស់ក្រុមហាម៉ាសតំណាងរបស់អ៊ីរ៉ង់នោះ គឺយើងមិនយល់ស្របឡើយ។ ​ដូច​ដែល​ខ្ញុំធ្លាប់​និយាយ​កាល​ពី​ពីរ​សប្តាហ៍​មុនអ៊ីចឹង, ICC ត្រូវ​តែ​ទទួល​ទោស​ចំពោះ​សកម្មភាព​នេះ”។

សំណើ​ច្បាប់ខាងលើ​ ត្រូវបាន​អនុម័ត​ដោយ​សំឡេង​គាំទ្រ​២៤៧ ទល់នឹង​១៥៥​សំឡេង​ ដោយក្នុងនោះ​សមាជិក​គណបក្ស​សាធារណរដ្ឋទាំងអស់សុទ្ធតែបោះឆ្នោតគាំទ្រ ខណៈខាង​ប្រជាធិបតេយ្យ​គាំទ្រចំនួន៤២សំឡេង។ អ្នកប្រជាធិបតេយ្យផ្សេងទៀត មិនបោះឆ្នោតគាំទ្រឡើយ ព្រោះតែនេះជាសំណើច្បាប់ដែលលើកឡើងដោយគណបក្សសាធារណរដ្ឋ។

ត្បិតសេចក្តីព្រាងនេះ ​ត្រូវ​បាន​អនុម័ត​នៅ​ក្នុង​សភាតំណាងរាស្រ្ត​ក៏ពិតមែន ប៉ុន្តែវា​មិន​ត្រូវ​បាន​គេ​រំពឹង​ថា​នឹង​ក្លាយ​ជា​ច្បាប់​ពេញលេញនោះ​ទេ ព្រោះអ្នកប្រជាធិបតេយ្យនៅព្រឹទ្ធសភាទំនងជាជំទាស់ ហើយលោកប្រធានាធិបតី ចូ បៃដិន ក៏ប្រហែលជាមិនចុះហត្ថលេខាឲ្យដែរ។

បើតាមសំណើច្បាប់នេះ សហរដ្ឋអាមេរិក នឹងដាក់ទណ្ឌកម្មលើការធ្វើដំណើរនិងហិរញ្ញវត្ថុប្រ​ឆាំងមន្ត្រី ICC ដោយហាមមិនឲ្យចូលសហរដ្ឋអាមេរិក, ដកហូតទិដ្ឋាការដែលកាន់កាប់ដោយមន្ត្រី ICC និងដាក់កម្រិតពួកគេមិនឲ្យធ្វើប្រតិបត្តិការអចលនទ្រព្យនៅក្នុងសហរដ្ឋអាមេរិក។

ទោះបីជាយ៉ាងណាក៏ដោយ អ្នកប្រជាធិបតេយ្យមួយចំនួនបានព្រមានថា ទណ្ឌកម្មបែបនេះ អាចប៉ះពាល់ដល់សម្ព័ន្ធមិត្តរបស់ទីក្រុងវ៉ាស៊ីនតោនខ្លះ ដែលផ្តល់សច្ចាប័នលើលក្ខន្តិកៈទីក្រុងរ៉ូម និងទទួលយកយុត្តាធិការរបស់ ICC ខុសពីសហរដ្ឋអាមេរិក។

សូមបញ្ជាក់ថា ប្រសិនបើ ICC ចេញដីកាចាប់ខ្លួនលោក Netanyahu មែននោះ ក៏នាយករដ្ឋមន្ត្រីអ៊ីស្រាអែលរូបនេះ ទំនងជាមិនត្រូវបាននាំទៅទីក្រុងឡាអេ ដើម្បីប្រឈមមុខនឹងការកាត់ក្តីដែរ ព្រោះថា អ៊ីស្រាអែលក៏ដូចជាសហរដ្ឋអាមេរិក រុស្ស៊ី និងចិន គឺមិនមែនជាភាគីនៃលក្ខន្តិកៈទីក្រុងរ៉ូមឡើយ ហើយមិនទទួលស្គាល់យុត្តាធិការរបស់តុលាការនេះទេ។

យ៉ាងណាក្តី ដីកាអាចដាក់លោក Netanyahu ឲ្យប្រឈមនឹងការចាប់ខ្លួន ប្រសិនបើគាត់ធ្វើដំណើរទៅកាន់ប្រទេសណាមួយក្នុងចំណោមរដ្ឋជាសមាជិកទាំង១២៤ ដែលទទួលស្គាល់តុលាការនេះ៕

អត្ថបទ៖ សុខ សុវណ្ណ

ចុចអាន៖ គ្រាន់ ICC បង្ហើបចង់ចាប់ខ្លួនលោក Netanyahu, អាមេរិក គំរាមដាក់ទណ្ឌកម្មភ្លែត