Breaking News! លោកស្រី អ៊ុងសាន ស៊ូជី រងការចោទប្រកាន់មួយករណីទៀតហើយ

មេធាវីម្នាក់បានប្រាប់សារព័ត៌មាន Reuters ថា លោកស្រី អ៊ុងសាន ស៊ូជី ដែលមិនត្រូវបានគេមើលឃើញជាសាធារណៈចាប់តាំងពីខែមុន នៅពេលដែលយោធាបានដណ្តើមអំណាចនៅក្នុងប្រទេសបានបង្ហាញខ្លួនតាមរយៈវីដេអូនៅក្នុងសវនាការរបស់លោកស្រី ។

ទីប្រឹក្សារដ្ឋ និងរដ្ឋាភិបាលរបស់លោកស្រីត្រូវបានចាប់ឃុំខ្លួនដោយយោធាមីយ៉ាន់ម៉ាកាលពីមួយខែមុន ខណៈដែលកងកម្លាំងប្រដាប់អាវុធបានប្រកាសដាក់ប្រទេសក្នុងស្ថានភាពអាសន្នរយៈពេលមួយឆ្នាំពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមមេធាវីលោក Min Min Soe បានឲ្យដឹងថា ទីប្រឹក្សារដ្ឋដែលត្រូវបានទម្លាក់ពីតំណែងបានស្នើសុំជួបក្រុមមេធាវីរបស់លោកស្រីក្នុងពេលបើកសវនាការតាមរយៈលីងវីដេអូ ខណៈលោកស្រីបានទទួលការចោទប្រកាន់បន្ថែមទៀតពីបទ “ផ្សព្វផ្សាយព័ត៌មានដែលអាចបង្កការភ័យខ្លាច ឬការព្រមាន” ។

កាលពីពេលកន្លងទៅប្រព័ន្ធផ្សព្វផ្សាយព័ត៌មានក្នុងស្រុកបានរាយការណ៍ថា មេដឹកនាំដែលត្រូវបណ្តេញចេញពីតំណែងរបស់ប្រទេសមីយ៉ាន់ម៉ា លោកស្រី អ៊ុងសាន ស៊ូជី ត្រូវបានគេនិយាយថា កំពុងបាត់ខ្លួនបន្ទាប់ពីកងទ័ព ផ្ទេរលោកស្រីពីការឃុំខ្លួនក្នុងផ្ទះទៅកាន់ទីតាំងដែលគេមិនបង្ហាញមួយ ខណៈការតវ៉ាហិង្សានៅតែបន្ត ។

ក្នុងពេលបច្ចុប្បន្ននេះប្រទេសមីយ៉ាន់ម៉ាកំពុងប្រឈមមុខនឹងការតវ៉ាទូទាំងប្រទេសដោយជាទូទៅក្រុមបាតុករតែងតែប៉ះទង្គិចជាមួយប៉ូលិស និងអ្នកគាំទ្រយោធា ។

ការធ្វើបាតុកម្មបានបន្តចាប់តាំងពីខែកុម្ភៈ នៅពេលដែលយោធាដណ្តើមអំណាចនៅក្នុងប្រទេសដោយចាប់ខ្លួនលោកស្រី អ៊ុងសាន ស៊ូជី លោកប្រធានាធិបតី Win Myint ក៏ដូចជាមេដឹកនាំជាន់ខ្ពស់នៃគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) បន្ទាប់ពីមានការចោទប្រកាន់ពីបទលួចបន្លំសន្លឹកឆ្នោតយ៉ាងច្រើនអំឡុងការបោះឆ្នោតខែវិច្ឆិកា ឆ្នាំ ២០២០ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោកស្រី ស៊ូជី ត្រូវកងទ័ពនាំទៅឆ្ងាយ ពេលនេះកំពុងបាត់ខ្លួន

ចុចអាន ៖ ក្រោយបាតុករ ១៨ នាក់ស្លាប់ អាមេរិកត្រៀមវិធានការបន្ថែមប្រឆាំងយោធាមីយ៉ាន់ម៉ា