ក្រុមជួញដូរគ្រឿងញៀនម៉ិកស៊ិក បើកឆាកប្រយុទ្ធគ្នា ស្លាប់មនុស្ស ១៩នាក់

យោងតាមការចេញផ្សាយរបស់សារពត៌មាន CGTN កាលពីថ្ងៃទី ០២ ខែ កក្កដា, ក្រុមគ្រឿងញៀនចំនួនពីរ បានបើកឆាកប្រយុទ្ធគ្នានៅរដ្ឋ Chiapas ភាគខាងត្បូងប្រទេសម៉ិកស៊ិក ដោយបណ្តាលឲ្យមនុស្សយ៉ាងតិច ១៩ នាក់ស្លាប់ ក្នុងនោះក៏មានជនជាតិ ក្វាតេម៉ាឡា ៤នាក់ផងដែរ។

ហេតុការណ៍នេះកើតឡើង នៅក្នុងទីក្រុង La Concordia ជិតព្រំដែនជាមួយប្រទេស ក្វាតេម៉ាឡា ជាកន្លែងដែលអំពើហិង្សាកំពុងកើនឡើងខ្លាំងក្នុងរយៈពេលប៉ុន្មានឆ្នាំចុងក្រោយនេះ។

តាមការស៊ើបអង្កេត, ការប៉ះទង្គិចគ្នានេះគឺរវាងក្រុមជួញដូរគ្រឿងញៀន Sinaloa ដែលជាក្រុមដ៏មានឥទ្ធិពលបំផុតមួយនៅក្នុងប្រទេសម៉ិកស៊ិក ជាមួយក្រុម Chiapas and Guatemala ដោយក្រុមទាំងពីរកំពុងប្រយុទ្ធគ្នាដើម្បីគ្រប់គ្រងតំបន់ព្រំដែន ព្រោះថាតំបន់នេះគឺចំណុចស្នូលសម្រាប់ការជួញដូរគ្រឿងញៀន អាវុធ និងជនចំណាកស្រុកទៅកាន់សហរដ្ឋអាមេរិក។

គួរបញ្ជាក់ថា អំពើហិង្សានៅម៉ិកស៊ិក បានរីករាលដាលកាន់តែខ្លាំង ដោយបណ្ដាលឲ្យមនុស្សជាង ៤៥០ ០០០នាក់ស្លាប់ទូទាំងប្រទេស ចាប់តាំងពីរដ្ឋាភិបាលរបស់អតីតប្រធានាធិបតី Felipe Calderon ចាប់ផ្តើមប្រើយោធាបង្ក្រាបក្រុមជួញដូរគ្រឿងញៀនក្នុងឆ្នាំ ២០០៦៕

អត្ថបទ៖ ប៊ុន សុភាព