ព័ត៌មានអន្ដរជាតិ

ទឹកជំនន់នៅឥណ្ឌា ប្រល័យជីវិតរមាសស្នែងមួយពូជកម្រចំនួន ៩ក្បាល

បានផុស

២ years មុន

នៅ

ថ្ងៃពុធ ១០ កក្កដា ២០២៤

ដោយ

Chheang

សត្វជាង ១៥០ក្បាល ក្នុងចំណោមនោះមានសត្វរមាសពូជកម្រចំនួន ៩ក្បាល បានលង់ទឹកងាប់ក្នុងគ្រោះទឹកជំនន់នៅឯឧទ្យានជាតិ Kaziranga ក្នុងរដ្ឋ Assam ភាគឦសាននៃប្រទេសឥណ្ឌា។

យោងតាមការចុះផ្សាយរបស់សារព័ត៌មាន The Staits Times នៅថ្ងៃទី១០ ខែកក្កដា ឆ្នាំ២០២៤ នេះ, មួយភាគបីនៃឧទ្យានជាតិ Kaziranga ត្រូវបានជន់លិច។ វាគឺជាជម្រកសំខាន់សម្រាប់ពូជសត្វរមាសស្នែងមួយដ៏កម្រ ចំនួនប្រហែលជាង ២៤០០ក្បាល ស្មើនឹងជិតពាក់កណ្ដាលនៃពូជរមាសស្នែងមួយទាំងអស់នៅលើពិភពលោក។

គួរបញ្ជាក់ថា រដ្ឋ Assam កំពុងប្រឈមនឹងទឹកជំនន់ភ្លាមៗ ដែលបង្កឡើងដោយភ្លៀងធ្លាក់ខ្លាំងក្នុងរយៈពេល២ខែកន្លងមកនេះ។ យ៉ាងហោចណាស់ មនុស្ស ៧៩នាក់ បានស្លាប់នៅក្នុងទឹកជំនន់ ដែលបានជន់លិចកសិដ្ឋាន តំបន់លំនៅដ្ឋាន ព្រមទាំងមានមនុស្សរាប់ពាន់នាក់ទៀតត្រូវផ្លាស់ទីលំនៅ។ យោងតាមអាជ្ញាធរគ្រប់គ្រងគ្រោះមហន្តរាយរដ្ឋ Assam បានឲ្យដឹងថា គ្រាន់តែក្នុងរយៈពេល២ថ្ងៃនេះ មានករណីមនុស្សស្លាប់ចំនួន៧នាក់រួចមកហើយ។

របាយការណ៍វាយតម្លៃរបស់រដ្ឋាភិបាលឥណ្ឌា បានបញ្ជាក់ថា កម្រិតទឹកនៅក្នុងទន្លេចំនួន៩ ក្នុងរដ្ឋ Assam គឺខ្ពស់ជាងកម្រិតគ្រោះថ្នាក់ ខណៈដែលដៃទន្លេ Brahmaputra ត្រូវបានគេរំពឹងថានឹងកើនឡើងបន្ថែមទៀតរហូតដល់ថ្ងៃពុធនេះ។

នាយកដ្ឋានអាកាសធាតុរបស់ប្រទេសឥណ្ឌា បានប្រកាសនៅថ្ងៃនេះថា ភ្លៀងធ្លាក់ខ្លាំង នឹងវាយប្រហាររដ្ឋភាគខាងជើង និងភាគឦសានរបស់ឥណ្ឌា ក្នុងរយៈពេល ២-៣ថ្ងៃខាងមុខ ដែលអាចធ្វើឲ្យស្ថានភាពកាន់តែអាក្រក់ទៅៗ៕

ដោយ៖ ឈាង