ឆ្នាំក្រោយ ភពព្រះអង្គារ មកជិតផែនដីបំផុត ដែលនឹងផ្តល់ឱកាសមាសដល់អ្នកតារាសាស្ត្រ

នៅដើមឆ្នាំក្រោយ បាតុភូតតារាសាស្រ្តដ៏គួរឲ្យចាប់អារម្មណ៍មួយនឹងកើតឡើងនោះគឺ ភពព្រះអង្គារស្ថិតនៅចំណុចផ្ទុយ ឬ Mars at Opposition។ វាជាព្រឹត្តិការណ៍ពិសេសដែលអ្នកតារាសាស្ត្រទន្ទឹងរង់ចាំបំផុត ព្រោះវាជាឱកាសមាសក្នុងការសង្កេតមើលភពក្រហមនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Sky At Night Magazine, បាតុភូតនេះនឹងកើតឡើងនៅថ្ងៃទី១៩ខែកុម្ភៈឆ្នាំ២០២៧ ពេលដែលផែនដី ស្ថិតនៅចន្លោះកណ្ដាលចំជួររវាងព្រះអាទិត្យនិងភពព្រះអង្គារ។ នៅក្នុងស្ថានភាពនេះ ភពព្រះអង្គារនឹងស្ថិតនៅត្រង់ជួរ ១៨០ ដឺក្រេផ្ទុយពីព្រះអាទិត្យ បើធៀបនឹងផែនដី។

ទោះបីជាគន្លងតារាវិថីរបស់ភពទាំងពីរជារង្វង់ពងក្រពើក៏ដោយ ប៉ុន្តែនៅពេលចំចំណុចផ្ទុយ ភពព្រះអង្គារនឹងខិតចូលមកក្បែរផែនដីបំផុតក្នុងវដ្ត២៦ខែម្ដង។

ភពព្រះអង្គារនឹងមានពន្លឺភ្លឺខ្លាំងជាងផ្កាយដទៃទៀតនៅលើមេឃ ដោយមានពណ៌ក្រហមឆ្អៅប្លែកពីគេ ដែលយើងហៅថា «ភពក្រហម»។ ភពព្រះអង្គារនឹងរះឡើងនៅពេលព្រះអាទិត្យលិច និងលិចទៅវិញនៅពេលព្រះអាទិត្យរះ ដែលអាចឲ្យយើងសម្លឹងមើលវាបានពេញមួយយប់។

នៅពេលភពព្រះអង្គារ មកស្ថិតនៅចម្ងាយប្រហែល ៨១ លានគីឡូម៉ែត្រ ពីផែនដី នោះវាផ្តល់ឱកាសដល់អ្នកតារាសាស្រ្តឲ្យសិក្សាបានកាន់តែច្បាស់ អំពីព័ត៌មាននិងរឿងរ៉ាវផ្សេងរបស់ភពកក្រហមមួយនេះ៕

អត្ថបទ៖ សុខ សុវណ្ណ