ព័ត៌មានអន្ដរជាតិ

អាជ្ញាធរឥណ្ឌូណេស៊ីចាប់ជនជាតិឥណ្ឌាបីនាក់ដែលប៉ងនាំគ្រឿងញៀនឆ្លងដែនចូលអូស្រ្តាលីដោយបំពាក់ទង់ជាតិសិង្ហបុរី

បានផុស

២ years មុន

នៅ

ថ្ងៃព្រហស្បតិ៍ ១៨ កក្កដា ២០២៤

ដោយ

ការចេញផ្សាយរបស់សារពត៌មាន CNA នៅថ្ងៃទី១៨ខែកក្កដានេះបានឲ្យដឹងថា អាជ្ញាធរឥណ្ឌូណេស៊ី បានចាប់ជនជាតិឥណ្ឌា៣នាក់ ដើម្បីរារាំងការប៉ុនប៉ងរត់ពន្ធគ្រឿងញៀននៅលើនាវាដែលមានទង់ជាតិសិង្ហបុរីនៅកោះ Riau ។

អាជ្ញាធរឥណ្ឌូណេស៊ីបានរកឃើញថ្នាំញៀនមេតំហ្វេតាមីនគ្រីស្តាល់ប្រហែល១០៦គីឡូក្រាម នៅលើនាវា Legend Aquarius ដែលមានទង់ជាតិសិង្ហបុរី កំពុងឆ្លងកាត់ដែនទឹកនៃកោះ Riau របស់ឥណ្ឌូណេស៊ី មានគោលដៅនាំចូលប្រទេសអូស្រ្តាលី។

ប្រធានទីភ្នាក់ងារជាតិប្រយុទ្ធប្រឆាំងគ្រឿងញៀនឥណ្ឌូណេស៊ី លោក Marthinus Hukom បានឲ្យដឹងថា ជាលទ្ធផលនៃការសហការគ្នារវាងឥណ្ឌូណេស៊ីនិងសិង្ហបុរី និង តាមរយៈការជួយរាយការណ៍ពីសាធារណៈជន ជនជាតិឥណ្ឌាបីនាក់ដែលនៅលើកប៉ាល់នោះត្រូវបានចាប់ខ្លួន។ ជនសង្ស័យទាំងបីមានឈ្មោះជាអក្សរកាត់ថា RN, SD, និង GF ជាមេក្លោងនៅពីក្រោយការប៉ុនប៉ងរត់ពន្ធគ្រឿងញៀននេះ។

ជនសង្ស័យទាំងបីមិនមែនជាសមាជិកនាវិកទេ ប៉ុន្តែពួកគេបានរស់នៅប្រទេសសិង្ហបុរីប្រហែល៦ទៅ៨ឆ្នាំ ហើយពួកគេម្នាក់ៗមានលិខិតបញ្ជាក់ការសិក្សាផ្នែកវិស្វកម្មនាវា។ ពួកគេបានរចនាកន្លែងពិសេសមួយ ដោយដាក់គ្រឿងញៀននៅក្នុងធុងឥន្ធនៈដើម្បីរក្សាទុកថ្នាំញៀន ហើយលាក់នៅក្នុងបន្ទប់ម៉ាស៊ីនលើនាវា។

ការចុះផ្សាយនោះ បានឱ្យដឹងថា ប្រទេសឥណ្ឌូណេស៊ីនឹងធ្វើការជាមួយសមភាគីសិង្ហបុរីរដើម្បីផ្លាស់ប្តូរព័ត៌មាន និងទិន្នន័យ ក៏ដូចជាកិច្ចសហប្រតិបត្តិការលើការអនុវត្ត និងប្រតិបត្តិការរួមគ្នាបន្ថែមទៀត ដើម្បីស៊ើបអង្កេតបន្ថែមលើករណីនេះ។ ការផ្តន្ទាទោសអតិបរមាសម្រាប់ការចោទប្រកាន់ពាក់ព័ន្ធនឹងការជួញដូរគ្រឿងញៀនខុសច្បាប់គឺត្រូវបានកាត់ទោសប្រហារជីវិត។ នេះយោងតាមច្បាប់ប្រឆាំងគ្រឿងញៀនឆ្នាំ២០០៩របស់ប្រទេសឥណ្ឌូណេស៊ី៕