ព័ត៌មានអន្ដរជាតិ

លោក ត្រាំ យល់ព្រមជជែកដេញដោលជាមួយលោកស្រី ហារីស នៅដើមខែក្រោយ

បានផុស

២ years មុន

នៅ

ថ្ងៃអាទិត្យ ៤ សីហា ២០២៤

ដោយ

Chheang

បេក្ខភាពប្រធានាធិបតីមកពីគណបក្សសាធារណរដ្ឋលោក ដូណាល់ ត្រាំ បានយល់ព្រមជាមួយសារព័ត៌មាន Fox News ដើម្បីជជែកដេញដោលតតាំងនឹងអនុប្រធានាធិបតីដែលមកពីគណបក្សប្រជាធិបតេយ្យលោកស្រី កាម៉ាឡា ហារីស នៅថ្ងៃទី៤ខែកញ្ញាខាងមុខ។

លោកស្រី កាម៉ាឡា ហារីស និងលោក ដូណាល់ ត្រាំ (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានបង្ហោះសារនៅលើបណ្ដាញសង្គម Truth Social ថា៖ «ខ្ញុំបានយល់ព្រមជាមួយ FoxNews ដើម្បីជជែកដេញដោលជាមួយ កាម៉ាឡា ហារីស នៅថ្ងៃពុធទី៤ខែកញ្ញា។ ការជជែកដេញដោលត្រូវបានគ្រោងទុកកាលមុនជាមួយ ចូ បៃដិន ដែលងងុយតែដេក នៅលើប៉ុស្ដិ៍ ABC ប៉ុន្តែត្រូវបានលុបចោលវិញ ព្រោះលោក បៃដិន លែងជាបេក្ខភាពចូលរួមទៀតហើយ»។ យ៉ាងណាមិញ គេនៅមិនទាន់ច្បាស់ទេថាតើលោកស្រី ហារីស បានយល់ព្រមលើការជជែកដេញដោលនោះដែរឬក៏អត់។

លោក ត្រាំ ក៏បានបញ្ជាក់ទៀតថា ការជជែកដេញដោលថ្មីនេះ នឹងធ្វើឡើងនៅរដ្ឋ Pennsylvania សម្របសម្រួលដោយពិធីករ Fox News ២រូបគឺលោក Bret Baier និងអ្នកនាង Martha MacCallum។

ការប្រជែងតំណែងប្រធានាធិបតីអាមេរិករបស់លោក ត្រាំ ត្រូវបានប្រែប្រួលខ្លាំង បន្ទាប់ពីលោក ចូ បៃដិន បានប្រកាសដកខ្លួនចេញពីការឈរឈ្មោះជាបេក្ខភាពគណបក្សប្រជាធិបតេយ្យ កាលពីថ្ងៃទី២១ខែកក្កដា ហើយបង្ហាញការគាំទ្រយ៉ាងពេញទំហឹងចំពោះលោកស្រីអនុប្រធានាធិបតីអាមេរិក កាម៉ាឡា ហារីស។ ការដកខ្លួនរបស់លោក បៃដិន ធ្វើឡើងព្រោះតែកត្តាសុខភាព និងវ័យរបស់លោក ហើយជាពិសេសគឺសម្លេងគាំទ្រហាក់ថមថយខ្លាំងក្រោយជជែកដេញដោលចាញ់លោក ត្រាំ ដាច់តែម្ដងកាលពីពាក់កណ្ដាលខែមិថុនាកន្លងទៅ។

សូមបញ្ជាក់ថា ការបោះឆ្នោតលើកទី៦០នៅសហរដ្ឋអាមេរិក នឹងប្រព្រឹត្តឡើងនៅថ្ងៃទី៥ខែវិច្ឆិកាឆ្នាំ២០២៤ ហើយនេះក៏ជាការបោះឆ្នោតដែលគ្រប់គ្នាមិនថាតែនៅលើទឹកដីអាមេរិកនោះទេ បានផ្ដោតការយកចិត្តទុកដាក់ជាខ្លាំង ស្របពេលពិភពលោកកំពុងកើតមានជម្លោះភូមិសាស្ត្រយ៉ាងសកម្មនារយៈពេលប៉ុន្មានឆ្នាំចុងក្រោយ៕

ដោយ៖ ឈាង