ព័ត៌មានអន្ដរជាតិ

ជាង៩០នាក់ស្លាប់ក្នុង១ថ្ងៃក្នុងការតវ៉ាដ៏ហិង្សានៅទូទាំងប្រទេសបង់ក្លាដែស

បានផុស

២ years មុន

នៅ

ថ្ងៃចន្ទ ៥ សីហា ២០២៤

ដោយ

ត្រឹមរយៈពេលមួយថ្ងៃ មនុស្សជាង៩០នាក់បានស្លាប់នៅក្នុងការតវ៉ាជាថ្មីនៅក្នុងប្រទេសបង់ក្លាដែស ខណៈដែលការតវ៉ាដ៏ចម្រូសចម្រាសនេះបានស្ងប់ស្ងាត់តែមួយភ្លែតប៉ុណ្ណោះ។ នេះបើយោងតាមការចេញផ្សាយរបស់ទូរទស្សន៍ជាតិជប៉ុន NHK នៅថ្ងៃទី០៥ ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បាតុកម្មទ្រង់ទ្រាយធំដែលដឹកនាំដោយនិស្សិតសកលវិទ្យាល័យបានរីករាលដាលនៅទូទាំងប្រទេសកាលពីខែមុនលើប្រព័ន្ធកូតាបមុ្រងទុកការងាររបស់រដ្ឋាភិបាលសម្រាប់កូនរបស់មន្ត្រីចាស់ៗដែលធ្លាប់បានតស៊ូឯករាជ្យជាតិ។ មនុស្សជាង ២៨០នាក់ត្រូវបានរាយការណ៍បានស្លាប់នៅក្នុងការប៉ះទង្គិចជាមួយប៉ូលីស ខណៈការតវ៉ាបានស្ងប់ស្ងាត់មួយភ្លែត ប៉ុន្តែបានកើនឡើងម្តងទៀតក្នុងរយៈពេលប៉ុន្មានថ្ងៃកន្លងមកនេះ។

ក្នុងនោះអ្នកគាំទ្រគណបក្សប្រឆាំងបានចូលរួមជាមួយបាតុករដោយអ្នកខ្លះបានប្រែក្លាយការតវ៉ាជាអំពើហិង្សា ខណៈប៉ូលីសបានបាញ់ឧស្ម័នបង្ហូរទឹកភ្នែកទៅលើក្រុមបាតុករ ជាមួយគ្នានេះអ្នកគាំទ្រគណបក្សកាន់អំណាចក៏បានប៉ះទង្គិចជាមួយបាតុករដែរ។ ការតវ៉ាថ្មីនេះនិសិត្សកំពុងរិះគន់នាយករដ្ឋមន្ត្រី Sheikh Hasina ដោយនិយាយថា ប៉ូលីសបានប្រើកម្លាំងហួសហេតុ ដែលបណ្តាលឱ្យមានអ្នកស្លាប់ជាច្រើន និងថែមទាំងតវ៉ាទាមទារឱ្យនាយករដ្ឋមន្រ្តី Hasina លាលែងពីតំណែងផងដែរ។

យ៉ាងណានាយករដ្ឋមន្ត្រីនៅតែរក្សាជំហររបស់នាង ថែមទាំងបាននិយាយថាអ្នកដែលចូលរួមក្នុង «ការតវ៉ាដ៏បំផ្លិចបំផ្លាញ» មិនមែនជាសិស្សនិសិត្សទេតែជាភេរវករ ហើយរដ្ឋាភិបាលបានដាក់បម្រាមគោចរមិនកំណត់ថែមទៀត។

គួរបញ្ជាក់ថា ក្រុមអ្នកតវ៉ាកំពុងទាមទារឱ្យបញ្ចប់ប្រព័ន្ធកូតាការងារដែលបម្រុងទុកការងាររដ្ឋាភិបាលរហូតដល់៣០ភាគរយ សម្រាប់សាច់ញាតិរបស់អតីតយុទ្ធជនដែលបានប្រយុទ្ធក្នុងសង្គ្រាមឯករាជ្យរបស់ប្រទេសបង់ក្លាដែសក្នុងឆ្នាំ ១៩៧១ ដែលអ្នកតវ៉ាអះអាងថា ប្រព័ន្ធនេះគឺជាការរើសអើង និងផ្តល់ផលប្រយោជន៍ដល់អ្នកគាំទ្រនាយករដ្ឋមន្ត្រី Sheikh Hasina។ ក្នុងការតវ៉ាដ៏ចម្រូងចម្រាសនេះរដ្ឋាភិបាលប្រទេសនេះបានផ្ដាត់សេវាអ៊ីនធឺណែត ក្នុងរយៈពេលប្រមាណ១១ថ្ងៃដែលទើបតែបើកដំណើរការឡើងវិញកាលពីសប្ដាហ៍មុនប៉ុណ្ណោះ រួចហើយក៏បញ្ជាឱ្យក្រុមហ៊ុនផ្តល់សេវាទូរស័ព្ទចល័តផ្តាច់បណ្តាញទំនាក់ទំនងសង្គមថែមទៀត។

សូមរំលឹកថារដ្ឋាភិបាលរបស់នាយករដ្ឋមន្រ្តី Hasina កាលពីមុនបានបញ្ឈប់ប្រព័ន្ធកូតាការងារ បន្ទាប់ពីការតវ៉ារបស់និស្សិតយ៉ាងច្រើននៅក្នុងឆ្នាំ២០១៨ ប៉ុន្តែកាលពីខែមុន តុលាការកំពូលរបស់ប្រទេសបង់ក្លាដែសបានចាត់ទុកជាមោឃៈនូវសេចក្តីសម្រេចនោះ ហើយបានកំណត់ប្រព័ន្ធកូតាការងារឡើងវិញ បន្ទាប់ពីសាច់ញាតិរបស់អតីតយុទ្ធជនឆ្នាំ ១៩៧១បានដាក់ញត្តិ។ សេចក្តីសម្រេចរបស់តុលាការកំពូលនោះបង្កឱ្យមានបាតុកម្មដ៏ចម្រូងចម្រាសចុងក្រោយបង្អស់នេះ៕